DRDO ने विकसित केलेल्या 'अॅडव्हान्स्ड हाय-अल्टिट्यूड पॅराशूट'ची लडाखमधील न्योमा येथे यशस्वी चाचणी झाली. १६,००० फुटांवरून ही उडी मारण्यात आली. खराब हवामानातही जवानांना सुरक्षितपणे खाली उतरवणे हा या नव्या तंत्रज्ञानाचा मुख्य उद्देश आहे.
संरक्षण संशोधन संस्था म्हणजेच DRDO ने विकसित केलेल्या 'अॅडव्हान्स्ड हाय-अल्टिट्यूड पॅराशूट'ची चाचणी यशस्वी झाली आहे. देशातील सर्वात उंचावरील ड्रॉप झोनपैकी एक असलेल्या लडाखच्या न्योमामध्ये ही चाचणी घेण्यात आली. समुद्रसपाटीपासून तब्बल १६,००० फूट उंचीवरून ही पॅराशूट जंप करण्यात आली. १५,५०० फूट उंचीवर पॅराशूट उघडलं आणि त्यानंतर समुद्रसपाटीपासून १३,७०० फूट उंचीवर असलेल्या न्योमा ड्रॉप झोनमध्ये सुरक्षित लँडिंग झालं.
ऑक्सिजनची कमतरता आणि खराब हवामान असलेल्या अतिउंचीवरील भागात जवानांना सुरक्षितपणे उतरवण्याची या पॅराशूटची क्षमता तपासण्यासाठी ही मोहीम राबवण्यात आली. अशा उंचावरील भागात पॅराशूटने उतरणं खूप धोकादायक असतं. पण हे नवीन पॅराशूट कमी वेगात आणि अत्यंत सुरक्षितपणे लँडिंग करता येईल अशा पद्धतीने बनवण्यात आलं आहे. समुद्रसपाटीपासून १८,००० फुटांपर्यंतच्या उंचीवर हे पॅराशूट उत्तम प्रकारे काम करू शकतं. भारतीय संरक्षण दलातील जवानांसाठी हिमालयीन भागात वापरण्यासाठी हे एकदम योग्य आहे.
आग्रा येथील ADRDE ने या पॅराशूटचं डिझाईन आणि विकास केला आहे. विमानातून एकाच वेळी अनेक जवानांना खाली उतरवण्यासाठी वापरली जाणारी ही एक 'स्टॅटिक लाईन पॅराशूट' सिस्टीम आहे. कानपूरच्या ऑर्डनन्स पॅराशूट फॅक्टरीने याची निर्मिती केली आहे. 'डायरेक्टरेट जनरल ऑफ एरोनॉटिकल क्वालिटी अ‍ॅश्युरन्स'ने तपासणी पूर्ण केल्यानंतरच ही चाचणी घेण्यात आली. या पॅराशूटला 'सेंटर फॉर मिलिटरी एअरवर्दीनेस अँड सर्टिफिकेशन'नेही मान्यता दिली आहे.
