चिक्कोडीच्या खासदार प्रियांका जारकीहोळी यांचा साखरपुडा बेळगावमध्ये गौतम पाटील यांच्यासोबत अगदी साधेपणाने पार पडला. राजकीय मतभेद विसरून जारकीहोळी बंधू या कौटुंबिक सोहळ्यासाठी एकत्र आले होते.
बेळगाव: चिक्कोडी लोकसभा मतदारसंघाच्या तरुण खासदार आणि सार्वजनिक बांधकाम मंत्री सतीश जारकीहोळी यांची कन्या प्रियांका जारकीहोळी यांचा साखरपुडा बेळगावमध्ये अगदी साधेपणाने पण पारंपारिक पद्धतीने पार पडला. बेळगावच्या क्लब रोडवर असलेल्या सतीश जारकीहोळी यांच्या 'हिल गार्डन' या निवासस्थानी हा सोहळा झाला. फक्त जवळचे नातेवाईक आणि मोजक्याच पाहुण्यांच्या उपस्थितीत दोघांनी एकमेकांना अंगठी घातली आणि हा साखरपुडा संपन्न झाला.
सतीश जारकीहोळींचा भावी जावई कोण आहे?
प्रियांका जारकीहोळी यांच्या भावी पतीचं नाव गौतम पाटील आहे. गौतम हे व्यवसायाने चार्टर्ड अकाउंटंट (CA) असून ते रायचूर जिल्ह्यातील देवदुर्गचे रहिवासी आहेत. त्यांचे वडील निवृत्त आरटीओ (RTO) अधिकारी आहेत. या कुटुंबाची पार्श्वभूमी उच्चशिक्षित आहे. मात्र, जारकीहोळी कुटुंबाने सध्या तरी जावयाच्या कुटुंबाबद्दल जास्त माहिती दिलेली नाही.
कौटुंबिक सोहळ्यासाठी जारकीहोळी बंधू एकत्र
राजकीय मैदानात जारकीहोळी भावांमध्ये कितीही मतभेद असले, तरी घरच्या या शुभकार्यासाठी सगळे भाऊ एकत्र आले होते. हेच या सोहळ्याचं मुख्य आकर्षण ठरलं. आमदार बालचंद्र जारकीहोळी, विधान परिषद सदस्य लखन जारकीहोळी, आमदार रमेश जारकीहोळी आणि प्रियांका यांचा भाऊ राहुल जारकीहोळी यांच्यासह संपूर्ण कुटुंबाने या साखरपुड्याला हजेरी लावली आणि भावी जोडप्याला आशीर्वाद दिले.
राजकीय मैदानातून आता संसाराकडे
२०२४ च्या लोकसभा निवडणुकीत चिक्कोडी मतदारसंघातून काँग्रेसच्या तिकीटावर प्रियांका जारकीहोळी यांनी दणदणीत विजय मिळवला होता. देशातील सर्वात तरुण खासदारांपैकी एक म्हणून त्यांनी संसदेत पाऊल ठेवलं. आपल्या साधेपणासाठी आणि विकासाच्या विचारांसाठी ओळखल्या जाणाऱ्या प्रियांका आता नव्या आयुष्याची सुरुवात करणार आहेत. लग्नाची तारीख आणि इतर माहिती लवकरच कुटुंबाकडून जाहीर केली जाण्याची शक्यता आहे.
भव्यतेला फाटा, फक्त घरचेच उपस्थित
नुकतीच सतीश जारकीहोळी यांच्या घरावर सक्तवसुली संचालनालयाने (ED) धाड टाकली होती आणि या प्रकरणाचा तपास अजूनही सुरू आहे. याच कारणामुळे कोणताही बडेजाव न करता, फक्त घरच्या लोकांना बोलावून हा साखरपुडा अगदी साध्या पद्धतीने उरकण्यात आला. या कार्यक्रमाला काँग्रेसचा कोणताही मोठा नेता, मंत्री किंवा आमदार उपस्थित नव्हता, अशी माहिती सूत्रांनी दिली आहे.
