१९८४ सिख विरोधी दंगल: सज्जन कुमार दोषी

नवी दिल्ली : १९८४ मध्ये झालेल्या सिख विरोधी दंगलीत सरस्वती विहार परिसरात झालेल्या दोन व्यक्तींच्या हत्येप्रकरणी दिल्ली न्यायालयाने बुधवारी काँग्रेसचे माजी खासदार सज्जन कुमार यांना दोषी ठरवले आहे. या प्रकरणी त्यांना मृत्युदंड किंवा जन्मठेपेची शिक्षा होण्याची शक्यता आहे.

माजी पंतप्रधान इंदिरा गांधी यांच्या हत्येनंतर सिख समुदायाला लक्ष्य करून मोठ्या प्रमाणात नरसंहार करण्यात आला होता. या दंगलीत जसवंत सिंग आणि त्यांचा मुलगा तरुणदीप सिंग यांची १९८४ च्या नोव्हेंबर १ रोजी हत्या करण्यात आली होती.

या प्रकरणात सज्जन कुमार हे मुख्य आरोपी होते. त्यांच्याविरुद्ध अनेक गुन्हे दाखल झाले होते. आधीच दोन प्रकरणांमध्ये ते दोषी आढळले आहेत आणि आणखी दोन प्रकरणांचा निकाल येणे बाकी आहे. सज्जन सध्या दिल्ली कॅन्टोन्मेंटमध्ये जन्मठेपेची शिक्षा भोगत आहेत.