Prathamesh Parab On Laxman Utekar : अभिनेता प्रथमेश परब यांनी दिग्दर्शक लक्ष्मण उतेकर यांना मराठी चित्रपटसृष्टीत मिळालेल्या वागणुकीबद्दल माफी मागितली. उतेकर यांच्यासारख्या दिग्दर्शकाला योग्य संधी मिळाली नाही, त्यांचा संघर्ष पाहून प्रथमेश भावूक झाला.
मुंबई : ‘टाईमपास’मधून घराघरात पोहोचलेला दगडू म्हणजेच अभिनेता प्रथमेश परब सध्या त्याच्या आगामी चित्रपट गाडी नंबर 1760 मुळे चर्चेत आहे. मात्र, या दरम्यान दिलेल्या एका मुलाखतीत त्याने थेट दिग्दर्शक लक्ष्मण उतेकर यांच्याविषयी भावुक खुलासा करत 'सॉरी' म्हणत अनपेक्षित मनोगत व्यक्त केलं आहे.
लक्ष्मण उतेकरांसारख्या हिऱ्याला आपण ओळखू शकलो नाही – प्रथमेश परब
“ते जेव्हा मराठी इंडस्ट्रीत आले, त्यांना कोणी संधीच दिली नाही. एवढा प्रतिभावान दिग्दर्शक असूनही त्यांना इथं संघर्ष करावा लागला. त्यांच्यासाठी मला इंडस्ट्रीच्या वतीने माफीनामा द्यायचा आहे,” असं स्पष्टपणे प्रथमेश परब म्हणाला.
'छावा' नाय झाला, 'मुंज्या' हिंदीत गेला, का?
उतेकर यांनी 'छावा'सारखा ऐतिहासिक सिनेमा मराठीत करायचा प्रयत्न केला होता, पण अर्थसंकल्प आणि मर्यादांमुळे तो प्रकल्प हिंदीकडे वळवावा लागला. पुढे ‘मुंज्या’सारख्या सिनेमालाही मराठी ओळख न मिळाल्याने हिंदीत उतरावं लागलं. “आपण वेळेत सावध झालो नाही तर असे हिरे हातातून निसटतील,” अशी खंत प्रथमेशने व्यक्त केली.
Related Articles
"हातात डबा घेऊन काम करणारा आज सुपरहिट दिग्दर्शक आहे!"
लक्ष्मण उतेकरांचा प्रवास अत्यंत संघर्षमय होता. प्रथमेश म्हणतो, “एकेकाळी डबा घेऊन फोटोग्राफरकडे असिस्टंट म्हणून काम करणारा माणूस आज मोठा दिग्दर्शक आहे. पण आम्हीच त्याला ओळखू शकलो नाही, ही चूक झाली.”
दक्षिणेकडून शिकण्याची वेळ आली आहे
प्रथमेशने दक्षिण भारतीय सिनेसृष्टीचं उदाहरण देत म्हटलं, “ते त्यांच्या लेखक-दिग्दर्शकांना जपतात, त्यामुळेच त्यांचे सिनेमे ओटीटीवरही गाजतात. आपण मात्र अशा रत्नांना दुर्लक्षित करतो.”
चाहत्यांकडून प्रचंड पाठिंबा
प्रथमेशच्या या भावनांनी सोशल मीडियावर जोरदार प्रतिक्रिया उमटवल्या. अनेकांनी म्हटलं, “आपण वेळेत शहाणं होणं गरजेचं आहे, नाहीतर आणखी ‘लक्ष्मण उतेकर’ गमावू.”
ही केवळ एका अभिनेत्याची माफी नाही, तर संपूर्ण मराठी इंडस्ट्रीला अंतर्मुख करणारा आरसा आहे. प्रतिभेला साथ द्या, मगच आपण उज्ज्वल सिनेसंस्कृती घडवू शकतो.
