'देवरा' चित्रपटातील 'चुट्टमल्ले' गाण्याच्या AI फेक व्हिडिओवर जान्हवी कपूरने संताप व्यक्त केला आहे. असे फेक व्हिडिओ बनवून शेअर करू नका, असं आवाहन करत तिने दोषींवर कडक कायदेशीर कारवाईचा इशारा दिला आहे.
मुंबई : ज्युनियर एनटीआरच्या 'देवरा' चित्रपटातील 'चुट्टमल्ले' गाण्याला AI तंत्रज्ञानाचा वापर करून अश्लील पद्धतीने मॉर्फ करण्यात आलं आहे. या प्रकारावर अभिनेत्री जान्हवी कपूरने तीव्र संताप व्यक्त केला आहे. असे फेक व्हिडिओ बनवणं, ते शेअर करणं आणि त्यांना प्रमोट करणं हा AI तंत्रज्ञानाचा स्पष्ट गैरवापर असल्याचं तिने म्हटलं आहे. हे कृत्य करणाऱ्यांवर कठोर कायदेशीर कारवाई केली जाईल, असा इशारा जान्हवीने दिला आहे.
सध्या सगळीकडेच AI व्हिडिओंची चर्चा आहे. विशेषतः सोशल मीडिया आणि यूट्यूबसारख्या प्लॅटफॉर्मवर वेगवेगळ्या विषयांवरील AI कंटेंट व्हायरल होत असतो. तंत्रज्ञानाने अनेक क्षेत्रांमध्ये नवीन संधी निर्माण केल्या असल्या, तरी काही लोक त्याचा गैरवापर करत आहेत, ही खरोखरच चिंतेची बाब आहे.
चित्रपटसृष्टीत मोठी चर्चा
Related Articles
AI तंत्रज्ञानाचा वापर करून अभिनेता-अभिनेत्रींचे फोटो अश्लील पद्धतीने मॉर्फ करण्याच्या घटना अलीकडे खूप वाढल्या आहेत. आता हा प्रकार फक्त फोटोंपुरता मर्यादित राहिलेला नाही. 'देवरा' चित्रपटातील लोकप्रिय 'चुट्टमल्ले' गाण्यालाच AI च्या मदतीने अश्लील पद्धतीने मॉर्फ करण्यात आलं आहे. या प्रकरणाची सध्या चित्रपटसृष्टीत जोरदार चर्चा सुरू आहे.
या AI व्हिडिओवर 'मॅन ऑफ मासेस' ज्युनियर एनटीआरने आधीच आपली प्रतिक्रिया दिली आहे. हे कृत्य करणाऱ्यांना अजिबात सोडणार नाही, असा इशारा तारकने दिला होता. आता 'चुट्टमल्ले' वादावर जान्हवी कपूरनेही मौन सोडलं आहे. AI तंत्रज्ञानाचा अशा प्रकारे गैरवापर होत असल्याबद्दल तिने तीव्र चिंता आणि नाराजी व्यक्त केली आहे.
सोशल मीडियावर केलं आवाहन
AI च्या माध्यमातून तयार केलेले असे फेक व्हिडिओ कृपया कोणीही बनवू नका. ते इतरांसोबत शेअर करू नका किंवा त्यांना प्रमोट करू नका, अशी विनंती जान्हवी कपूरने सोशल मीडियावर केली आहे. हा AI तंत्रज्ञानाचा स्पष्ट गैरवापर आहे. त्यामुळे असे कृत्य करणाऱ्यांवर नक्कीच कठोर कायदेशीर कारवाई केली जाईल, असा सज्जड दम जान्हवी कपूरने दिला आहे. सध्या अभिनेत्रीची ही पोस्ट सोशल मीडियावर चांगलीच व्हायरल होत आहे.
