पंजाबच्या अमृतसरमध्ये खंडणीची मागणी पूर्ण न केल्याने विशाल नावाच्या कपडा व्यापाऱ्यावर अज्ञातांनी गोळीबार केला. ही संपूर्ण घटना सीसीटीव्ही कॅमेऱ्यात कैद झाली आहे. या हल्ल्यामुळे पंजाबमधील कायदा आणि सुव्यवस्थेवर पुन्हा एकदा मोठे प्रश्नचिन्ह निर्माण झाले आहे.
अज्ञातांनी गुरुवारी पंजाबच्या अमृतसरमधील सुंदर नगर भागात एका कपडा व्यापाऱ्यावर गोळीबार केला. या हल्ल्यात तो व्यापारी गंभीर जखमी झाला आहे. ही संपूर्ण घटना सीसीटीव्हीमध्ये कैद झाली आहे. खंडणी न दिल्याने हा हल्ला झाल्याचा संशय आहे. पंजाबमध्ये नुकतीच आणखी एक गोळीबाराची घटना घडली होती. तिथे एका मेडिकल दुकानदाराने नशाविरोधी कार्यकर्त्याची हत्या केली होती. नशेची औषधे विकण्यावरून कार्यकर्त्याने त्याला जाब विचारला होता, त्यातूनच हा खून झाला होता.
जखमी व्यापाऱ्याचे नाव विशाल उर्फ गोरी आहे. तो अमृतसरमध्ये कपड्यांचा व्यवसाय करतो. अज्ञातांनी त्याच्या घराजवळच त्याच्यावर गोळ्या झाडल्या. सीसीटीव्ही फुटेजमध्ये विशाल एका व्यक्तीसोबत दुचाकीवरून येताना दिसत आहे. ते दोघे तिथे पोहोचताच दोन हल्लेखोर त्यांच्याजवळ आले आणि त्यांनी थेट गोळीबार सुरू केला. त्यानंतर ते हल्लेखोर तिथून पळून गेले.
विशाल गोळी लागताच जमिनीवर कोसळला आणि गंभीर जखमी झाला. त्याने खंडणी देण्यास स्पष्ट नकार दिला होता, आणि याच रागातून त्याच्यावर हा हल्ला झाल्याचे बोलले जात आहे.
हा व्हायरल व्हिडीओ पाहा
विशालवर सध्या रुग्णालयात उपचार सुरू आहेत. या घटनेमुळे अमृतसरमधील कायदा आणि सुव्यवस्था, तसेच नागरिकांच्या सुरक्षेचा प्रश्न पुन्हा एकदा ऐरणीवर आला आहे. खंडणीसाठी होणारे असे हल्ले रोखण्यात पोलीस किती यशस्वी ठरत आहेत, यावरही आता लोक चिंता व्यक्त करत आहेत.
नशाविरोधी कार्यकर्त्याची गोळ्या झाडून हत्या
पंजाबमधील मानसा येथे नुकत्याच घडलेल्या गोळीबाराच्या घटनेनंतर लगेचच ही दुसरी घटना समोर आली आहे. एका मेडिकल दुकानदाराने मानसा येथे परविंदर सिंग झोटा या नशाविरोधी कार्यकर्त्याची हत्या केली होती. परविंदरने त्या दुकानदाराला नशेची औषधे विकण्यावरून जाब विचारला होता.
परविंदर जेव्हा या वादाचा व्हिडिओ आपल्या मोबाईलमध्ये रेकॉर्ड करत होता, तेव्हाच त्या केमिस्टने त्याच्यावर गोळी झाडली. लोकांनी त्याला तातडीने रुग्णालयात नेले, पण उपचारादरम्यान त्याचा मृत्यू झाला. या घटनेनंतर आम आदमी पार्टीच्या (AAP) नेतृत्वाखालील पंजाब सरकारविरोधात लोकांमध्ये प्रचंड संताप पाहायला मिळाला. संतप्त नागरिकांनी मानसा येथे जोरदार निदर्शने केली आणि पोलिसांच्या उपस्थितीतच त्या मेडिकल दुकानात घुसून दुकानाला आग लावली.
