ग्रेटर नोएडामध्ये एका ३१ वर्षीय तरुणाचा २१ व्या मजल्यावरून पडून मृत्यू झाला. पत्नीसोबतचा वाद टाळण्यासाठी तो बाल्कनीतून खाली उतरण्याचा प्रयत्न करत होता. पत्नीने सिक्युरिटी गार्डला बोलावून दरवाजा उघडायला लावल्याने तो घाबरला आणि पळ काढताना त्याचा पाय घसरला. पोलीस या प्रकरणाचा तपास करत असून सीसीटीव्ही फुटेज तपासले जात आहे.
ग्रेटर नोएडामध्ये एका ३१ वर्षीय तरुणाचा २१ व्या मजल्यावरून पडून दुर्दैवी मृत्यू झाला. बायकोसोबतचा वाद टाळण्यासाठी तो आपल्या फ्लॅटच्या बाल्कनीतून खाली उतरण्याचा प्रयत्न करत होता. ही घटना या आठवड्याच्या सुरुवातीला ग्रेटर नोएडातील 'सेंच्युरियन पार्क ट्रॉपिकल गार्डन सोसायटी'मध्ये घडली.
हर्षित लवानिया असं या तरुणाचं नाव आहे. २०२४ मध्येच त्याचं लग्न झालं होतं. पण, बायकोसोबत सतत वाद होत असल्याने गेल्या सहा महिन्यांपासून ते दोघे वेगळे राहत होते. हर्षित एका भाड्याच्या फ्लॅटमध्ये एकटाच राहायचा. घटनेच्या दिवशी त्याची बायको अचानक फ्लॅटवर आली. पण, पुन्हा भांडण होईल या भीतीने हर्षितने दरवाजा उघडला नाही, असं पोलिसांनी सांगितलं.
बायकोने त्याला बाहेरून आवाज दिला आणि बोलण्याचा प्रयत्न केला. पण हर्षितने काहीच दाद दिली नाही. त्यानंतर तिने सोसायटीच्या सिक्युरिटी गार्डला बोलावून दरवाजा उघडायला लावला.
दरवाजा उघडला जात असल्याचं पाहून हर्षितने बाल्कनीतून खालच्या मजल्यावर पळून जाण्याचा प्रयत्न केला. पण, याच गडबडीत त्याचा पाय घसरला आणि तो थेट २१ व्या मजल्यावरून खाली कोसळला. यात तो गंभीर जखमी झाला.
सोसायटीतल्या लोकांनी त्याला तातडीने जवळच्या रुग्णालयात दाखल केलं. पण, डॉक्टरांनी त्याला मृत घोषित केलं. बायकोसोबतच्या सततच्या भांडणामुळे हर्षित खूप मानसिक तणावाखाली होता, असा दावा त्याच्या कुटुंबीयांनी केला आहे. या प्रकरणी अद्याप कोणतीही अधिकृत तक्रार दाखल झालेली नाही, असं पोलिसांनी स्पष्ट केलं.
बिसरख पोलीस या संपूर्ण प्रकरणाचा कसून तपास करत आहेत. नेमकं काय घडलं हे समजून घेण्यासाठी पोलीस हर्षितच्या बायकोची चौकशी करत आहेत. तसंच, सोसायटीत लावलेले सीसीटीव्ही कॅमेरेही तपासले जात आहेत.
या प्रकरणात अद्याप कुणीही तक्रार दिलेली नाही. तपासात जे काही समोर येईल, त्यानुसार पुढची कारवाई केली जाईल, असं पोलिसांनी सांगितलं आहे.
