World Food Programme Warns 45 Million Face Starvation in West Asia by June Due to War: पश्चिम आशियातील युद्ध थांबलं नाही, तर जूनपर्यंत साडेचार कोटींहून अधिक लोक भीषण उपासमारीला सामोरे जातील, असा गंभीर इशारा वर्ल्ड फूड प्रोग्रामने (WFP) दिला आहे. युद्धामुळे पुरवठा साखळी विस्कळीत झाली असून, मदत पोहोचवण्यातही अडथळे येत आहेत.
World Food Programme Warns 45 Million Face Starvation in West Asia by June Due to War: तेहरान: पश्चिम आशियात सुरू असलेल्या युद्धामुळे मोठं अन्नसंकट निर्माण होऊ शकतं, असा गंभीर इशारा वर्ल्ड फूड प्रोग्रामने (WFP) दिला आहे. WFP ही संयुक्त राष्ट्रांच्या अंतर्गत काम करणारी एक संस्था आहे. त्यांनी दिलेल्या रिपोर्टनुसार, जर हे युद्ध असंच सुरू राहिलं, तर येत्या जून महिन्यापर्यंत तब्बल साडेचार कोटींहून अधिक लोक भीषण उपासमारीच्या खाईत ढकलले जातील. या युद्धामुळे संपूर्ण भागातील पुरवठा साखळी (सप्लाय चेन) विस्कळीत झाली आहे आणि जीवनावश्यक वस्तूंचे दर गगनाला भिडले आहेत, असंही रिपोर्टमध्ये म्हटलं आहे.
युद्धामुळे पश्चिम आशियातील अनेक भागांमधील शेतजमीन उद्ध्वस्त झाली आहे. वाहतुकीचे मार्ग बंद झाले आहेत. त्यामुळे इराण आणि त्याच्या शेजारी देशांमध्ये अन्नधान्याचा मोठा तुटवडा निर्माण झाला आहे. त्यातच आधीपासूनच सुरू असलेलं आर्थिक संकट आणि बेरोजगारीमुळे परिस्थिती आणखी बिकट झाली आहे. वेळीच योग्य पावलं उचलली नाहीत, तर येत्या काही महिन्यांत लाखो लोकांना जेवण मिळणंही कठीण होईल. या संकटाचा सर्वात जास्त फटका महिला आणि लहान मुलांना बसेल, असंही रिपोर्टमध्ये स्पष्ट करण्यात आलं आहे.
या भागांमध्ये माणुसकीच्या नात्याने मदत पोहोचवण्याच्या कामातही युद्धामुळे मोठे अडथळे येत आहेत. मदतीसाठी येणाऱ्या गाड्यांवरही हल्ले होत आहेत. त्यामुळे, तात्काळ युद्धविराम जाहीर करून विनाअडथळा मदत पोहोचवू दिली नाही, तर पश्चिम आशियातील हे आतापर्यंतचं सर्वात मोठं मानवनिर्मित उपासमारीचं संकट ठरेल, असा स्पष्ट इशारा रिपोर्टमध्ये देण्यात आला आहे. आंतरराष्ट्रीय समुदायाने यात तातडीने हस्तक्षेप करावा, अशी मागणीही वर्ल्ड फूड प्रोग्रामने केली आहे.
