WhatsApp Security: सावधान! तुमचा फोन हॅक होऊ शकतो, व्हॉट्सॲपने दिलाय गंभीर इशारा
WhatsApp Security: WhatsApp वापरणाऱ्यांसाठी एक मोठी बातमी आहे. व्हॉट्सॲपमध्ये दोन गंभीर त्रुटी सापडल्या असून, हॅकर्स तुमचा फोन आणि डेटा चोरू शकतात. त्यामुळे कंपनीने तात्काळ ॲप अपडेट करण्याचा सल्ला दिला आहे.
व्हॉट्सॲप युझर्ससाठी हाय-अलर्ट
जगभरातील कोट्यवधी लोक व्हॉट्सॲप वापरतात. आता व्हॉट्सॲपची मालकी असलेल्या मेटा कंपनीने ॲपमध्ये दोन गंभीर बग्स (त्रुटी) शोधल्या आहेत. या बग्समुळे युझर्सचा खासगी डेटा आणि स्मार्टफोन हॅकर्सच्या ताब्यात जाऊ शकतो, असा इशारा कंपनीने दिला आहे. ही समस्या सोडवण्यासाठी व्हॉट्सॲपने एक नवीन अपडेट जारी केले आहे.
व्हॉट्सॲपमधील सुरक्षा त्रुटी नेमक्या काय आहेत?
मेटाने दिलेल्या माहितीनुसार, व्हॉट्सॲपमध्ये दोन प्रकारच्या त्रुटी आढळल्या आहेत. याचा परिणाम विंडोज, अँड्रॉइड आणि आयओएस युझर्सवर होऊ शकतो.
१. विंडोज युझर्सना धोका: व्हॉट्सॲपच्या विंडोज व्हर्जनमध्ये 'अटॅचमेंट स्पूफिंग' नावाचा बग सापडला आहे. यामुळे हॅकर्सनी पाठवलेली धोकादायक फाइल सामान्य डॉक्युमेंटसारखी दिसते. पण युझरने त्यावर क्लिक करताच, तो एक प्रोग्राम म्हणून रन होतो आणि फोन किंवा कॉम्प्युटरला नुकसान पोहोचवतो.
२. अँड्रॉइड आणि आयओएस युझर्सना धोका: दुसरा बग मीडिया मेसेजशी संबंधित आहे. याच्या मदतीने हॅकर्स फोनमध्ये बाहेरून धोकादायक कंटेंट लोड करू शकतात. यामुळे केवळ फोनची सिस्टीम हॅक होत नाही, तर तुमचा खासगी डेटाही चोरीला जाण्याची शक्यता आहे.
या बग्सबद्दल मेटाने काय सांगितले?
मेटाने आपल्या 'बग बाऊंटी' प्रोग्रामद्वारे या दोन्ही त्रुटी शोधल्या. कंपनीने या त्रुटींना 'मीडियम रिस्क' कॅटेगरीमध्ये ठेवले आहे. सध्या या त्रुटींचा गैरवापर करून कोणी हॅकिंग केल्याचा कोणताही पुरावा नाही, असे मेटाने स्पष्ट केले आहे. युझर्सच्या सुरक्षेसाठी कंपनीने यापूर्वीच अपडेट जारी केले आहे.
तुम्ही तातडीने काय करायला हवं?
तुमचा फोन आणि डेटा सुरक्षित ठेवण्यासाठी खालील गोष्टींची काळजी घ्या..
• तात्काळ अपडेट करा: तुमच्या फोनमधील गुगल प्ले स्टोअर किंवा ॲपल ॲप स्टोअरवर जाऊन व्हॉट्सॲप लेटेस्ट व्हर्जनवर अपडेट करा.
• अनोळखी लिंक्सवर क्लिक करू नका: अनोळखी लोकांकडून आलेल्या संशयास्पद अटॅचमेंट्स किंवा फाइल्स उघडू नका. कोणत्याही लिंकवर क्लिक करणे टाळा.
• सावध राहा: कोणतीही फाइल डाउनलोड करण्यापूर्वी ती विश्वासार्ह आहे की नाही, हे तपासा.
या डिजिटल युगात हॅकर्सपासून वाचण्यासाठी सॉफ्टवेअर अपडेट्स हाच एकमेव मार्ग आहे. त्यामुळे उशीर न करता तुमचे व्हॉट्सॲप लगेच अपडेट करा.
