नेतान्याहू म्हणाले- मै अभी जिंदा हू... इराणचे प्रत्युत्तर- शोधून मारू; अफवांना व्हिडिओतून दिलं उत्तर!

Netanyahu Dispels Death Rumors with Video : इस्रायलचे पंतप्रधान बेंजामिन नेतान्याहू यांचा इराणच्या हल्ल्यात मृत्यू झाल्याची अफवा पसरली होती. यानंतर रविवारी रात्री नेतान्याहूंनी 'X' वर एक व्हिडिओ पोस्ट करून 'मी जिवंत आहे' असं सांगत या चर्चांना पूर्णविराम देण्याचा प्रयत्न केला आहे.

Netanyahu Dispels Death Rumors with Video

Netanyahu Dispels Death Rumors with Video : इस्रायलचे पंतप्रधान बेंजामिन नेतान्याहू यांचा इराणच्या हल्ल्यात मृत्यू झाल्याची जोरदार अफवा पसरली होती. यानंतर रविवारी रात्री नेतान्याहूंनी स्वतः 'X' (पूर्वीचे ट्विटर) वर एक व्हिडिओ शेअर केला आणि आपण जिवंत असल्याचं स्पष्ट केलं. यामुळे या सर्व चर्चांना पूर्णविराम मिळण्याची शक्यता आहे.

मात्र, यावर इराणने प्रतिक्रिया दिली आहे. 'जर नेतान्याहू जिवंत असतील, तर आम्ही त्यांना शोधून ठार मारू,' अशी धमकीच इराणने दिली आहे.

अफवांना आलं होतं उधाण:

युद्ध सुरू झाल्यानंतर काही दिवसांतच इराणने आपल्या हल्ल्यात नेतान्याहू बळी पडल्याचा संशय व्यक्त केला होता. त्यानंतर ते सार्वजनिक ठिकाणी कुठेच दिसले नव्हते. त्यामुळे ते खरंच जिवंत आहेत की नाही, याबाबत शंका निर्माण झाली होती. इराणच्या क्षेपणास्त्र हल्ल्यात इस्रायलच्या पंतप्रधानांचा मृत्यू झाल्याच्या बातम्या सोशल मीडियावर वेगाने पसरल्या होत्या.

या अफवांना आणखी खतपाणी मिळालं, जेव्हा नेतान्याहूंच्या अध्यक्षतेखाली होणाऱ्या इस्रायलच्या लष्करी परिषदेच्या बैठकीला ते गैरहजर राहिले. मात्र, त्यांच्या कार्यालयाने 'नेतान्याहू जिवंत आहेत,' असं स्पष्टीकरण दिलं होतं.

यानंतर, इराणचे शक्तिशाली निमलष्करी दल असलेल्या 'रेव्होल्यूशनरी गार्ड्स'ने धमकी दिली की, 'मुलांचा गुन्हेगार मारेकरी आमच्या हल्ल्यात आधीच मारला गेला आहे... आणि जर नेतान्याहू जिवंत असतील, तर आम्ही त्यांना शोधून ठार करू.'

'X' वरून दिलं उत्तर:

आपल्या मृत्यूच्या बातम्या पसरत असताना, नेतान्याहूंनी 'X' वर स्वतःचा एक व्हिडिओ पोस्ट करून 'मी जिवंत आहे' हेच एकप्रकारे जाहीर केलं. या व्हिडिओमध्ये ते एका कॅफेमध्ये बसलेले दिसत आहेत. कॉफी पिताना ते म्हणतात, 'मी इथे जिवंत आणि सुरक्षित आहे.'

सहा बोटांची चर्चा खोटी:

या व्हिडिओत त्यांनी आपले दोन्ही हात कॅमेरासमोर दाखवले. त्यांचा आधीचा एक व्हिडिओ AI ने तयार केला होता आणि त्यात त्यांना सहा बोटं होती, अशी अफवा पसरली होती. आपले हात दाखवून त्यांनी ही अफवा खोडून काढली आहे.

नेमकं काय घडलं?

• सोशल मीडियावर नेतान्याहू यांचा इराणच्या हल्ल्यात मृत्यू झाल्याची चर्चा सुरू झाली.
• यानंतर नेतान्याहूंच्या कार्यालयाने ते 'जिवंत' असल्याचं स्पष्ट केलं.
• त्यातच, 'नेतान्याहू जिवंत असतील तर शोधून मारू,' अशी धमकी इराणच्या लष्कराने दिली.
• अखेरीस, नेतान्याहूंनी स्वतः व्हिडिओ शेअर करून आपण जिवंत असल्याचं स्पष्ट केलं.