जर्मनीच्या कोलोन बॉन एअरपोर्टवर कस्टम अधिकाऱ्यांनी एका ४५ वर्षीय मेक्सिकन फायर फायटरला पकडले. त्याच्या बॅगेत चक्क ९२ साप आणि सरडे लपवून ठेवले होते. यात ३७ विषारी साप आणि ५५ सरड्यांचा समावेश असून काही प्राण्यांना अत्यंत वाईट अवस्थेत ठेवण्यात आले होते.
कस्टम अधिकाऱ्यांनी जर्मनीच्या कोलोन बॉन एअरपोर्टवर एका मेक्सिकन फायर फायटरला पकडले आहे. या प्रवाशाच्या बॅगेत चक्क ९२ जिवंत साप आणि सरडे सापडले. यात ३७ विषारी साप आणि ५५ सरड्यांचा समावेश आहे. यातील काही प्राण्यांना अत्यंत वाईट अवस्थेत ठेवण्यात आले होते, तर काहींचा प्रवासादरम्यान मृत्यू झाला. हा ४५ वर्षीय व्यक्ती एअरपोर्टवरील 'ग्रीन चॅनेल'मधून बाहेर पडण्याचा प्रयत्न करत होता. (ग्रीन चॅनेल म्हणजे ज्या प्रवाशांकडे डिक्लेअर करण्यासारखे काही नसते त्यांच्यासाठीचा मार्ग). पण तो खूपच घाबरलेला दिसत असल्याने कस्टम अधिकाऱ्यांना संशय आला.
अधिकाऱ्यांनी आधी त्याची ड्रग टेस्ट केली, ज्यामध्ये तो कोकेन पॉझिटिव्ह आढळला. त्याच्या बॅगेत कोणतेही ड्रग्स सापडले नाहीत. पण शॅम्पू आणि क्रीमच्या बाटल्या, प्लास्टिकचे डबे आणि मोज्यांमध्ये लपवून ठेवलेले वायपर, रॅटलस्नेक, इग्वाना आणि इतर सरपटणारे प्राणी अधिकाऱ्यांना सापडले.
बॅगेत लपवले होते प्राणी
बीबीसीच्या वृत्तानुसार, कोलोन कस्टम ऑफिसचे प्रवक्ते जेन्स अहलँड यांनी सांगितले की, प्रवाशांच्या बॅगेत विचित्र वस्तू पाहण्याची अधिकाऱ्यांना सवय आहे. पण मेक्सिकोमधून जिवंत सरपटणाऱ्या प्राण्यांचा एवढा मोठा साठा त्यांनी यापूर्वी कधीच पाहिला नव्हता.
यातील काही प्राण्यांना अत्यंत वाईट अवस्थेत ठेवण्यात आले होते. तर मेक्सिको सिटीहून इस्तंबूलमार्गे येताना काही प्राण्यांचा प्रवासातच मृत्यू झाला.
या व्यक्तीने अधिकाऱ्यांना सांगितले की, एका ब्राझिलियन ओळखीच्या व्यक्तीसाठी त्याने हे प्राणी युरोपमध्ये आणले होते. त्याला जर्मनीत प्रवेश नाकारण्यात आला आणि परत इस्तंबूलला पाठवण्यात आले.
वाचलेल्या सरपटणाऱ्या प्राण्यांची आता जर्मनीतील एका स्नेक फार्ममध्ये काळजी घेतली जात आहे.
जर्मनीत वन्यजीवांच्या तस्करीची हजारो प्रकरणे
या घटनेमुळे संरक्षित वन्यजीवांची बेकायदेशीर तस्करी रोखण्यात कस्टम अधिकाऱ्यांसमोर किती मोठी आव्हाने आहेत, हे पुन्हा एकदा समोर आले आहे.
अहलँड यांनी सांगितले की, जर्मन कस्टम अधिकाऱ्यांनी गेल्या वर्षी देशभरातून १,३०० हून अधिक कारवाया केल्या. यात ५६,६०० हून अधिक संरक्षित प्राणी, वनस्पती आणि त्यांच्यापासून बनवलेल्या उत्पादनांचा समावेश होता.
अधिकाऱ्यांनी त्या ब्राझिलियन व्यक्तीबद्दल किंवा हे प्राणी नेमके कुठे नेले जाणार होते, याबाबत अधिक माहिती दिलेली नाही. जिवंत सरपटणाऱ्या प्राण्यांना अशा अयोग्य डब्यांमध्ये लांबच्या प्रवासाला नेल्याने वन्यजीवांना किती धोका असतो, यावरही या घटनेमुळे चिंता व्यक्त केली जात आहे.
