Indian Navy Deploys Warships in Persian Gulf : पश्चिम आशियात तणाव वाढल्याने, भारतीय नौदलाने पर्शियन आखातात युद्धनौका तैनात केल्या आहेत. 'ऑपरेशन संकल्प' अंतर्गत भारतीय मालवाहू जहाजांना होर्मुझच्या सामुद्रधुनीतून सुरक्षितपणे बाहेर काढणं हा याचा मुख्य उद्देश आहे.
Indian Navy Deploys Warships in Persian Gulf : पश्चिम आशियातील तणावाच्या पार्श्वभूमीवर, पर्शियन आखाताच्या परिसरात अडकलेल्या भारतीय मालवाहू जहाजांच्या सुरक्षेसाठी भारतीय नौदलाने युद्धनौका तैनात केल्या आहेत. होर्मुझच्या सामुद्रधुनीतून होणारा भारताचा इंधन पुरवठा सुरळीत राहावा आणि भारतीय जहाजांवर हल्ले होण्याचा धोका टाळावा, यासाठी हे तातडीचं पाऊल उचलण्यात आलं आहे. मिळालेल्या माहितीनुसार, सध्या तीन भारतीय युद्धनौका ओमानच्या आखातात तैनात असून, त्या जहाजांना एस्कॉर्ट करण्यासाठी पूर्णपणे सज्ज आहेत.
नुकतंच भारतीय नौदलाच्या सुरक्षेत 'शिवालिक' आणि 'नंदादेवी' या दोन LPG मालवाहू जहाजांनी होर्मुझची सामुद्रधुनी सुरक्षितपणे पार केली. या जहाजांवर भारतीय ध्वज होता. कतारमधून सुमारे 85,000 मेट्रिक टन गॅस घेऊन येणारी ही जहाजे येत्या काही दिवसांत गुजरातमधील मुंद्रा आणि कांडला बंदरांवर पोहोचतील. २८ फेब्रुवारीला संघर्ष सुरू झाल्यापासून पहिल्यांदाच भारतीय जहाजांनी नौदलाच्या थेट संरक्षणात हा सागरी मार्ग पार केला आहे.
सध्या पर्शियन आखाताच्या परिसरात अनेक भारतीय जहाजे अडकून पडली आहेत. एका अंदाजानुसार, या भागात वेगवेगळ्या जहाजांवर सुमारे २३,००० भारतीय खलाशी काम करत आहेत. जहाजांचा सुरक्षित प्रवास सुनिश्चित करण्यासाठी पंतप्रधान नरेंद्र मोदी आणि परराष्ट्र मंत्री एस. जयशंकर इराणच्या अधिकाऱ्यांशी चर्चा करत आहेत. सुरक्षेचा धोका लक्षात घेता, केंद्र सरकारने 'ऑपरेशन संकल्प' अंतर्गत भारतीय जहाजांना नौदलाचं संरक्षण देणं सुरूच ठेवण्याचा निर्णय घेतला आहे.
