धावसंख्येचा पाठलाग करताना ऑस्ट्रेलियाला पहिल्याच षटकात धक्का बसला. नवोदित फलंदाज नाथन मॅक्सवेलला बुमराहने बाद केले.
पर्थ: ५३४ धावांचे आव्हान स्वीकारणाऱ्या ऑस्ट्रेलियाचा दुसऱ्या डावातही बॅटिंगचा कडेलोट झाला. तिसऱ्या दिवसाचा खेळ संपला तेव्हा ऑस्ट्रेलियाची धावसंख्या ३ बाद १२ अशी होती. उस्मान ख्वाजा ३ धावांवर खेळत आहे. नाथन मॅक्सवेल (०), कर्णधार पॅट कमिन्स (२) आणि मार्नस लाबुशेन (३) यांच्या विकेट्स ऑस्ट्रेलियाने गमावल्या. जसप्रीत बुमराहने २ आणि मोहम्मद सिराजने १ विकेट घेतली.
धावसंख्येचा पाठलाग करताना ऑस्ट्रेलियाला पहिल्याच षटकात धक्का बसला. नवोदित फलंदाज नाथन मॅक्सवेलला बुमराहने बाद केले. रात्रीचा पहारेकरी म्हणून आलेला कमिन्स सिराजच्या चेंडूवर बाद झाला. त्यानंतर लाबुशेनलाही बुमराहने बाद केले.
यापूर्वी विराट कोहलीने शतक झळकावले आणि यशस्वी जयस्वालनेही चांगली खेळी केली. १४३ चेंडूत ८ चौकार आणि २ षटकारांसह कोहली १०० धावांवर नाबाद राहिला. भारताने दुसरा डाव ६ बाद ४८७ धावांवर घोषित केला आणि ऑस्ट्रेलियासमोर ५३४ धावांचे आव्हान उभे केले. २७ चेंडूत ३८ धावा करून नितीश कुमार रेड्डी नाबाद राहिला. कोहलीचे हे ३० वे कसोटी शतक आहे. यापूर्वी जयस्वालने १६१ धावांची खेळी केली होती.
तिसऱ्या दिवशी भारताने खेळ सुरू केला तेव्हा त्यांची धावसंख्या विनाविकेट १७२ होती. चहापानाच्या वेळेस भारताची धावसंख्या ५ बाद ३५९ होती. चहापानानंतर कोहलीने जलद गतीने धावा केल्या आणि शतक पूर्ण केल्यानंतर भारताने डाव घोषित केला. के एल राहुल (७७), देवदत्त पडिक्कल (२५), यशस्वी जयस्वाल (१६१), ऋषभ पंत (१), ध्रुव जुरेल (१) आणि वॉशिंग्टन सुंदर (२९) यांच्या विकेट्स भारताने गमावल्या.
पहिल्या सत्रात ७७ धावा करणाऱ्या राहुलची विकेट गमावल्यानंतर दुसऱ्या सत्रात पडिक्कल (२५) बाद झाला. कोहली आणि जयस्वालने भारताची धावसंख्या ३०० पार नेली. त्यानंतर १६१ धावा करणाऱ्या जयस्वालला मिचेल मार्शने बाद केले.
त्यानंतर भारताने ८ धावांत पंत आणि जुरेल यांच्या विकेट्स गमावल्या. पंतला लायनने बाद केले, तर जुरेलला कमिन्सने बाद केले. कोहली आणि सुंदर (२९) यांनी भारताची धावसंख्या ४०० पार नेली. नितीशच्या जलद खेळीमुळे भारताची धावसंख्या ५०० पार गेली. पहिल्या सत्रात २०१ धावांची सलामी भागीदारी तोडून राहुलला बाद करणारा मिचेल स्टार्कने ऑस्ट्रेलियाला पहिली यश मिळवून दिली.
