South Korea Fire : दक्षिण कोरियातील डेजॉन शहरात कारच्या पार्ट बनवणाऱ्या फॅक्टरीला लागलेल्या भीषण आगीत १० कामगारांचा मृत्यू झाला आहे. या दुर्घटनेत ५९ जण जखमी झाले असून ४ जण अजूनही बेपत्ता आहेत. फॅक्टरीत २०० किलो सोडियम असल्याने बचावकार्यात मोठे अडथळे येत आहेत. हा अपघात होता की सुरक्षेतील हलगर्जीपणा, यावर प्रश्नचिन्ह निर्माण झालं आहे.
South Korea Factory Fire : दक्षिण कोरियाच्या डेजॉन शहरातील एका कार पार्ट बनवणाऱ्या फॅक्टरीला लागलेल्या भीषण आगीने संपूर्ण देश हादरला आहे. या वेदनादायक दुर्घटनेत आतापर्यंत १० कामगारांचा मृत्यू झाला आहे, तर ५९ जण जखमी असल्याचं समजतंय. जखमींपैकी २५ जणांची प्रकृती अत्यंत गंभीर आहे, त्यामुळे मृतांचा आकडा वाढण्याची भीती व्यक्त केली जात आहे. ज्यावेळी ही आग लागली, तेव्हा फॅक्टरीमध्ये जवळपास १७० कामगार काम करत होते.
आत असलेलं धोकादायक केमिकल आगीचं मुख्य कारण ठरलं?
रिपोर्ट्सनुसार, सगळ्यात धक्कादायक गोष्ट म्हणजे फॅक्टरीमध्ये जवळपास २०० किलो सोडियम ठेवण्यात आलं होतं. सोडियम हे एक अत्यंत धोकादायक रसायन आहे, जे हवा किंवा पाण्याच्या संपर्कात आल्यास त्याचा स्फोट होऊ शकतो. याच कारणामुळे अग्निशमन दलाच्या जवानांना लगेच आत जाण्यात खूप अडचणी आल्या. आगीच्या दरम्यान मोठा स्फोट होण्याची त्यांना भीती होती.
Related Articles
१७० कामगारांपैकी किती अडकले, किती जणांनी वाचवला जीव?
ही दुर्घटना घडली तेव्हा फॅक्टरीत सुमारे १७० कामगार होते. दुपारी साधारण १ वाजता अचानक आग भडकली आणि पाहता पाहता तिने संपूर्ण इमारतीला वेढलं. अनेक कामगार आतच अडकले आणि त्यांना बाहेर पडण्याची संधीच मिळाली नाही. बचाव पथकांच्या माहितीनुसार, आतापर्यंत १० जणांचा मृत्यू झाला आहे, तर २५ जण गंभीर जखमी आहेत. ३४ जणांना किरकोळ दुखापत झाली असून ४ जण अजूनही बेपत्ता आहेत. यावरून आतली परिस्थिती किती भयंकर असेल याचा अंदाज येतो.
अग्निशमन दलाचे जवान लगेच आत का जाऊ शकले नाहीत?
रिपोर्टनुसार, इमारत कोसळण्याचा धोका इतका जास्त होता की अग्निशमन दलाचे जवान लगेच आत शिरू शकले नाहीत. याचा अर्थ अनेक कामगार बराच वेळ आत अडकून पडले असावेत. एक मृतदेह दुसऱ्या मजल्यावर सापडला, तर बाकीचे मृतदेह तिसऱ्या मजल्यावर सापडले. यावरून आग वरच्या दिशेने वेगाने पसरली असावी, ज्यामुळे तिथे अडकलेल्या कामगारांना वाचण्याची संधी मिळाली नसावी, असा अंदाज वर्तवला जात आहे.
बचावकार्यात सर्वात मोठं आव्हान कोणतं?
बचावकार्याला उशीर होण्याचं एक मोठं कारण म्हणजे इमारत कोसळण्याचा धोका, आत असलेली केमिकल्स, धूर आणि उष्णतेमुळे काहीच स्पष्ट दिसत नव्हतं. रेस्क्यू टीमसमोर हेच सर्वात मोठं आव्हान होतं. अग्निशमन दलाच्या टीमला खूप काळजीपूर्वक आत जावं लागलं. या सगळ्या अडचणी असूनही सध्या बचावकार्य सुरू आहे आणि ४ बेपत्ता लोकांचा शोध घेतला जात आहे.
सरकारने कोणता मोठा निर्णय घेतला?
अधिकाऱ्यांनी अद्याप आगीचं कारण स्पष्ट केलेलं नाही, पण तपास सुरू करण्यात आला आहे. दक्षिण कोरियाचे अध्यक्ष ली जे म्युंग यांनी या घटनेची गंभीर दखल घेतली आहे. त्यांनी सर्व यंत्रणांना बचावकार्यात कोणतीही कमतरता भासू देऊ नका आणि शक्य ती सर्व साधनसामुग्री वापरा, असे निर्देश दिले आहेत. येत्या काही दिवसांत तपास अहवाल आल्यानंतरच स्पष्ट होईल की हा केवळ एक अपघात होता की यामागे मोठी चूक लपलेली आहे. सध्या संपूर्ण देशाचं लक्ष या रेस्क्यू ऑपरेशन आणि तपासाकडे लागलं आहे.
