लिओनेल मेस्सीने आंतरराष्ट्रीय फुटबॉलला रामराम ठोकला आहे. अर्जेंटिनाकडून बेनिनविरुद्धचा शेवटचा सामना खेळल्यानंतर या विश्वविजेत्या कर्णधाराने निवृत्ती घेतली. गेल्या दोन दशकांपासून ज्याच्यासोबत त्याची मैदानावर टक्कर होती, त्या ख्रिस्तियानो रोनाल्डोनेही मेस्सीबद्दल आदर व्यक्त केला आहे.
Lionel Messi Farewell Match: अर्जेंटिनाच्या राष्ट्रीय संघाकडून शेवटचा सामना खेळल्यानंतर लिओनेल मेस्सीला ख्रिस्तियानो रोनाल्डोने खास मानवंदना दिली. गेल्या दोन दशकांपासून या दोघांमधल्या चुरशीमुळे फुटबॉल जगतात नेहमीच चर्चा असायची. पण मेस्सीने आंतरराष्ट्रीय फुटबॉलला निरोप दिल्यानंतर रोनाल्डोने सोशल मीडियावर एक भावुक पोस्ट लिहिली. तो म्हणाला, 'लिओ, तू इतकी वर्षे तुझ्या देशाचं प्रतिनिधित्व केलंस आणि असा इतिहास रचलास जो कायम स्मरणात राहील. अर्जेंटिनासाठी तू जे काही मिळवलंस, त्याबद्दल माझ्या मनात खूप आदर आहे. तुला घट्ट मिठी.' या पोस्टमधून रोनाल्डोने हेच दाखवून दिलंय की, मैदानावर जरी ते एकमेकांचे कट्टर प्रतिस्पर्धी असले, तरी एक फुटबॉलपटू म्हणून तो मेस्सीचा खूप आदर करतो.
आंतरराष्ट्रीय फुटबॉलला निरोप देताना मेस्सी भावुक
मंगळवारी मेस्सीने राष्ट्रीय संघासाठी आपला शेवटचा सामना खेळला. मोन्युमेंटल स्टेडियमवर बेनिनविरुद्धच्या या सामन्यात मेस्सीने एक गोल केला आणि आपल्या सहकाऱ्यांना दोन गोल करण्यासाठी मदतही केली. सामना संपल्यानंतर या दिग्गज खेळाडूने इन्स्टाग्रामवर एक मोठी पोस्ट शेअर केली. अर्जेंटिनाची जर्सी घालण्याची भावना आपण आतापासूनच मिस करत असल्याचं त्याने या पोस्टमध्ये म्हटलंय. ३९ वर्षीय या स्टार खेळाडूच्या मते, राष्ट्रीय संघातून बाजूला होण्यासाठी हीच योग्य वेळ आहे. यासोबतच त्याने आपले कुटुंबीय आणि सहकाऱ्यांचे आभार मानले. दिवंगत दिग्गज दिएगो मॅराडोना यांचीही त्याने आठवण काढली. मेस्सीच्या मते, अर्जेंटिनाला जागतिक फुटबॉलमधील एक बलाढ्य संघ बनवण्यात मॅराडोना यांची भूमिका खूप महत्त्वाची होती.
मेस्सीच्या पाठीशी रोनाल्डो
रोनाल्डोने इन्स्टाग्रामवर मेस्सीला पाठिंबा देण्याची ही पहिलीच वेळ नाही. याआधी मेस्सीचे वडील जॉर्ज मेस्सी यांच्या निधनावरही रोनाल्डोने शोक व्यक्त करत या अर्जेंटिनाच्या स्टारला सांत्वन दिलं होतं. रोनाल्डो आणि मेस्सी यांच्यातील चुरस ही आधुनिक फुटबॉलमधील सर्वात मोठी स्पर्धा मानली जाते. २००७ मध्ये काका आणि या दोन स्टार्समध्ये बॅलन डी'ओर पुरस्कारासाठी झालेल्या शर्यतीपासून या स्पर्धेला सुरुवात झाली. त्यानंतर जवळपास एक दशक फिफा द बेस्ट आणि बॅलन डी'ओर या दोन्ही पुरस्कारांवर मेस्सी आणि रोनाल्डोचंच वर्चस्व राहिलं. रोनाल्डो रिअल माद्रिदमध्ये गेल्यानंतर ही चुरस आणखीनच वाढली. ला लीगामध्ये रोनाल्डोचा रिअल माद्रिद आणि मेस्सीचा बार्सिलोना यांच्यातील लढत, विशेषतः प्रत्येक 'एल क्लासिको' सामना हा जागतिक फुटबॉलच्या आकर्षणाचा केंद्रबिंदू असायचा. पण मैदानावरची स्पर्धा कितीही तीव्र असली, तरी मेस्सी आणि रोनाल्डोने नेहमीच एकमेकांचा आदर केला आहे. मैदानाबाहेरही हे दोन्ही महानायक एकमेकांच्या पाठीशी उभे राहताना दिसले आहेत. आंतरराष्ट्रीय फुटबॉलमध्ये मेस्सी आणि रोनाल्डो दोनदा आमनेसामने आले आहेत. या दोन्ही भेटींमध्ये दोघांनीही प्रत्येकी एक विजय मिळवला आहे.
