ऑस्ट्रेलियातील क्वीन्सलँडमध्ये एका टीव्ही रिपोर्टरने आणि एका नागरिकाने पुराच्या पाण्यात बुडणाऱ्या ट्रकमधून ड्रायव्हरचा जीव वाचवला. विल मरे असं या रिपोर्टरचं नाव असून या थरारक रेस्क्यूचा व्हिडिओ सध्या व्हायरल होत आहे.
कॅमेऱ्यात कैद झालेला एक अंगावर काटा आणणारा व्हिडिओ सध्या चर्चेत आहे. ऑस्ट्रेलियातील क्वीन्सलँडमधील मोरेफिल्डमध्ये एका टीव्ही रिपोर्टरने स्वतःचा माईक बाजूला ठेवून पुराच्या पाण्यात बुडणाऱ्या एका पिकअप ट्रक ड्रायव्हरचा जीव वाचवला. विल मरे असं या धाडसी रिपोर्टरचं नाव आहे.
सोशल मीडियावर, विशेषतः एक्सवर (पूर्वीचे ट्विटर) हा व्हायरल व्हिडिओ वेगाने पसरत आहे. एबीसी (ABC) वृत्तवाहिनीसाठी काम करणारा रिपोर्टर विल मरे आणि तिथे उपस्थित असलेल्या एका धाडसी नागरिकाने या ड्रायव्हरला वाचवण्यासाठी पाण्यात उडी मारली. रिपोर्टर विल मरे हा पूर्ण सूटमध्ये होता. जेव्हा त्याने पाहिलं की गाडी पाण्यावरचं नियंत्रण गमावून वेगाने वाढणाऱ्या पुरात बुडत आहे, तेव्हा त्याने क्षणाचाही विचार न करता पाण्यात उडी घेतली.
क्वीन्सलँडमध्ये अचानक आलेल्या भयंकर पुरामुळे स्थानिक रस्ते अक्षरशः मृत्यूचे सापळे बनले आहेत. यामुळे अडकलेल्या वाहनचालकांना स्वतःहून बाहेर पडणं जवळपास अशक्य झालं होतं.
हा थरारक रेस्क्यू नेमका कसा झाला?
क्वीन्सलँडमधील मोरेफिल्ड भागात मुसळधार पावसामुळे हाहाकार उडाला आहे. नद्या-नाले दुथडी भरून वाहत आहेत आणि सखल भागातील रस्ते काही मिनिटांतच पाण्याखाली गेले. ऑस्ट्रेलियन टीव्ही रिपोर्टर विल मरे या खराब हवामानाचं ग्राऊंड रिपोर्टिंग करत होता. त्याचवेळी त्याने पाहिलं की, पुराच्या पाण्यात एक पिकअप ट्रक आणि त्याचा ड्रायव्हर अडकला आहे.
पा पाण्याच्या प्रचंड दाबामुळे ड्रायव्हरला गाडीचे दरवाजे उघडता येत नव्हते. हे पाहताच मरेने क्षणाचाही विलंब न लावता त्याला वाचवण्याचा निर्णय घेतला. आपलं ब्रॉडकास्टिंगचं सामान आणि अंगावरचा फॉर्मल सूट याची पर्वा न करता, 7News च्या या रिपोर्टरने छातीइतक्या खोल पाण्यात उडी मारली. त्याच्यासोबत तिथे उपस्थित असलेल्या एका नागरिकानेही पाण्यात धाव घेतली.
पाण्याचा प्रवाह खूप वेगवान होता. मरे आणि त्या नागरिकाने प्रवाहाच्या विरुद्ध दिशेने पोहत गाडी गाठली. पाण्याच्या दाबामुळे पुढचे दरवाजे उघडणार नाहीत हे लक्षात येताच, या ऑस्ट्रेलियन रिपोर्टरने गाडीच्या मागच्या बाजूला जाऊन मागचा दरवाजा उघडला. यामुळे अडकलेल्या ड्रायव्हरला सुखरूप बाहेर काढता आलं.
विल मरे आणि त्या नागरिकाने एकमेकांच्या मदतीने ड्रायव्हरला खोल पाण्यातून सुरक्षितपणे कोरड्या जागेवर आणलं. गाडीतून सुखरूप बाहेर आल्यावर त्या ड्रायव्हरने मरेला मिठी मारली. त्यानंतर काही वेळातच आपत्कालीन पथक घटनास्थळी दाखल झालं.
सुदैवाने, या थरारक घटनेत कोणालाही दुखापत झाली नाही. गाडीत वेगाने पाणी शिरत होतं, जर थोडा जरी उशीर झाला असता, तर ड्रायव्हर गाडीसह पाण्याखाली बुडाला असता.
रिपोर्टरच्या धाडसावर सोशल मीडियाच्या प्रतिक्रिया
ऑस्ट्रेलियन टीव्ही रिपोर्टर विल मरे आणि एका नागरिकाने केलेल्या या रेस्क्यूचा व्हिडिओ सोशल मीडियावर, विशेषतः एक्सवर (X) तुफान व्हायरल झाला आहे. हजारो युजर्स या दोघांच्या धाडसाचं आणि प्रसंगावधानाचं कौतुक करत आहेत.
अनेकांनी एक्सवर पोस्ट करत मरे आणि त्या नागरिकाला 'हिरो' म्हटलं आहे. स्वतःच्या जीवाची पर्वा न करता, रिपोर्टिंगचं काम बाजूला ठेवून एका माणसाचा जीव वाचवल्याबद्दल लोक रिपोर्टरला सलाम करत आहेत.
काही युजर्सनी पुराच्या वेगवान पाण्यात उतरण्याच्या धोक्याकडेही लक्ष वेधलं आहे. पाण्याचा प्रवाह इतका वेगवान होता की वाचवणाऱ्यांचाही जीव धोक्यात येऊ शकला असता. बातमी देण्यापासून ते स्वतः बातमीचा विषय बनण्यापर्यंतचा मरेचा हा प्रवास खरोखरच कौतुकास्पद असल्याचं नेटकरी म्हणत आहेत. तर काहींनी ड्रायव्हरला वाचवण्यासाठी पुढे आलेल्या त्या नागरिकाचंही तोंडभरून कौतुक केलं आहे.
दरम्यान, ऑस्ट्रेलियन टीव्ही रिपोर्टर विल मरेने वाहनचालकांना पुराच्या पाण्यातून गाड्या न चालवण्याचं आवाहन केलं आहे. वरवर सुरक्षित वाटणारा रस्ता किती वेगाने जीवघेणा ठरू शकतो, हे या घटनेवरून सिद्ध होतं, असा इशारा त्याने दिला.
डॅनियल हेनी या नागरिकाच्या मदतीने बुडणाऱ्या गाडीतून ड्रायव्हरला सुखरूप बाहेर काढल्यानंतर, सगळे सुरक्षित असल्याचा आपल्याला मोठा दिलासा मिळाला, अशी भावना मरेने व्यक्त केली.
