मोहम्मद इस्लाम नावाचे एक गृहस्थ अचानक घरातल्या बाहेर कोसळले. पण त्यांच्या Apple Watch ने आपोआप इमर्जन्सी सर्व्हिसला फोन लावला आणि त्यामुळे त्यांचा जीव वाचला.
मोहम्मद इस्लाम यांच्या ॲपल वॉचने त्यांचा जीव वाचवल्याचं श्रेय आता दिलं जात आहे. झालं असं की, ते अचानक घराबाहेर कोसळले आणि त्यांच्या वॉचने आपोआप इमर्जन्सी सर्व्हिसला फोन लावला.
काही आठवड्यांपूर्वी, इस्लाम यांना बरं वाटत नसल्यामुळे त्यांनी कामावरून सुट्टी घेतली होती. त्यांच्या कानाजवळ दुखत होतं, पोटात गडबड होती आणि श्वास घ्यायलाही त्रास होत होता. इतकंच नाही, तर काही पावलं चालल्यावरही त्यांना धाप लागत होती. त्यामुळे ते क्लिनिकमध्ये गेले, पण डॉक्टरांना त्यांच्या त्रासाचं नेमकं कारण कळू शकलं नाही. डॉक्टरांनी काही औषधं लिहून दिली आणि त्यांना घरी पाठवलं.
घरी आल्यानंतर काही तासांतच, कचरा बाहेर टाकायला जात असताना इस्लाम अचानक बेशुद्ध पडले.
Related Articles
इस्लाम यांनी सांगितलं, "मी मागे वळलो आणि तसाच खाली कोसळलो. मी बेशुद्ध झालो, त्यानंतर काय झालं हे मला काहीच आठवत नाही."
ही घटना खूप गंभीर होती. कारण त्यावेळी त्यांची पत्नी घरात नव्हती आणि त्यांच्या मुली तर काही तासांच्या अंतरावर दुसऱ्या शहरात राहतात. त्यामुळे त्यांच्या मदतीला लगेच कोणीही येऊ शकलं नाही.
ते पुढे म्हणाले, "मी किती वेळ तिथे पडून होतो, मला माहीत नाही. अचानक माझे डोळे उघडले, तेव्हा मी जमिनीवर होतो आणि मला प्रचंड घाम फुटला होता. मी उठायचा प्रयत्न केला, पण उठू शकलो नाही. जवळच एक खुर्ची होती, तिचा आधार घेऊन मी कसाबसा बसलो. तेवढ्यात मला सायरनचा आवाज ऐकू येऊ लागला."
नंतर इस्लाम यांना कळालं की, त्यांच्या ॲपल वॉचने ते जोरात पडल्याचं ओळखलं आणि आपोआप 911 या इमर्जन्सी नंबरवर (आपल्याकडे जसा 108 असतो तसा) फोन लावला होता.
इस्लाम म्हणाले, "मला माहीत होतं की ॲपल वॉचमध्ये असं काहीतरी फीचर आहे. कारण बागेत काम करताना किंवा काही करताना माझा हात जोरात आपटला की वॉच विचारायचं, 'तुम्ही पडलात का? आम्ही कॉल करू का?' पण त्याने खरंच 911 ला फोन केला असेल, हे माझ्या डोक्यातही आलं नाही."
काही मिनिटांतच इमर्जन्सी टीम तिथे पोहोचली आणि त्यांना तातडीने हॉस्पिटलमध्ये नेण्यात आलं. तिथे डॉक्टरांनी निदान केलं की, त्यांच्या फुफ्फुसात रक्ताच्या धोकादायक गुठळ्या (blood clots) झाल्या होत्या. यावर वेळेत उपचार झाले नसते, तर त्यांचा जीवही जाऊ शकला असता.
इस्लाम यांना वाटतं की, त्यांच्या वॉचचं इमर्जन्सी फीचर आणि त्यानंतर पॅरामेडिक्स व UC मधील मेडिकल स्टाफने दाखवलेली तत्परता, यामुळेच आज ते जिवंत आहेत.
"मी अजूनही विचार करतोय की हे सगळं नक्की काय झालं आणि मी जिवंत का आहे. जर माझ्या वॉचने 911 डायल केला नसता आणि पॅरामेडिक्स पाच-दहा मिनिटांत आले नसते, तर काय झालं असतं, याची कल्पनाही करवत नाही," असं इस्लाम भावुक होऊन म्हणाले.
विशेष म्हणजे, हे ॲपल वॉच त्यांना त्यांच्या मुलींनी गिफ्ट दिलं होतं. आता त्या रोज त्यांना आठवणीने वॉच घालायला सांगतात.
इस्लाम सांगतात, "त्यांना (मुलींना) प्रचंड आनंद झाला. त्यांनी त्यांच्या आईलाही एक ॲपल वॉच गिफ्ट केलं आहे. आणि त्या रोज मला फोन करून विचारतात, 'तुम्ही ॲपल वॉच घातलंय ना?' त्यांच्या गिफ्टमुळे माझा जीव वाचला, याचा त्यांना खूप आनंद आहे."
इस्लाम यांच्या शरीरात अचानक रक्ताच्या गुठळ्या का तयार झाल्या, याचा डॉक्टर अजूनही शोध घेत आहेत. जोपर्यंत याचं मूळ कारण समजत नाही, तोपर्यंत त्यांना औषधं सुरू ठेवण्यास सांगण्यात आलं आहे, जेणेकरून असलेल्या गुठळ्या विरघळतील आणि नवीन तयार होणार नाहीत.
