- Home
- Utility News
- Most Expensive Pen : जगातला सर्वात महागडा पेन, किंमत 67 कोटी; काय आहे यात एवढं खास?
Most Expensive Pen : जगातला सर्वात महागडा पेन, किंमत 67 कोटी; काय आहे यात एवढं खास?
जगातला सर्वात महागडा पेन: एका पेनच्या किंमतीत तुम्ही 10 आलिशान बंगले विकत घेऊ शकता. इतकंच नाही, तर आयुष्यभर काम न करता आरामात बसून खाऊ शकता. पण या पेनमध्ये असं आहे तरी काय?
अत्यंत महागडा पेन..
सामान्यतः आपण वापरतो ते पेन 10 ते 100 रुपयांपर्यंत मिळतात. थोडे महागडे ब्रँडेड पेन हजारात येतात. अगदी लक्झरी पेन असले तरी लाखात मिळतात. पण, एका पेनची किंमत चक्क 67 कोटी रुपये आहे, यावर तुमचा विश्वास बसेल का? हो, हे खरं आहे. 'फुल्गोर नॉक्टर्नस बाय टिबाल्डी' (Fulgor Nocturnus by Tibaldi) हा जगातला सर्वात महागडा पेन म्हणून गिनीज बुकमध्ये नोंदवला गेलाय. या पेनची किंमत एवढी का आहे? यामागची गोष्ट आपण आज जाणून घेऊया.
संपूर्ण जगात हा एकच पेन आहे...
टिबाल्डी ही इटलीतील एक प्रसिद्ध लक्झरी पेन बनवणारी कंपनी आहे. त्यांनी हा अप्रतिम फाउंटन पेन तयार केलाय. हा पेन सामान्य विक्रीसाठी नसून, जगातला सर्वात खास आणि 'वन ऑफ अ काईंड' मास्टरपीस म्हणून बनवलाय. याचा अर्थ, जगात असा दुसरा पेन नाही. हा फक्त एकच आहे.
हा पेन एवढा महाग का..?
या पेनवर हिरे जडवले आहेत. पण फक्त हिऱ्यांमुळेच हा पेन महाग झालेला नाही. यामागे अजून एक कारण आहे. याच्या निर्मितीमागे एक उत्तम इंजिनिअरिंग आणि गणिताचा नियम वापरलाय. लिओनार्दो दा विंचीसारख्या महान चित्रकारांनी वापरलेल्या 'डिव्हाईन प्रपोर्शन' (Phi - 1.618) या गणितीय प्रमाणावर हा पेन आधारित आहे. पेनच्या झाकणाची लांबी आणि पेनच्या उर्वरित भागाची लांबी यांचं गुणोत्तर बरोबर 1.618 येईल, अशा प्रकारे हे डिझाईन केलंय. म्हणूनच या पेनची किंमत एवढी आहे. या पेनवर अत्यंत दुर्मिळ असे 945 काळे हिरे मोठ्या कौशल्याने बसवले आहेत. लॅटिन भाषेत 'फुल्गोर नॉक्टर्नस' चा अर्थ 'रात्रीची चमक' असा होतो. हा पेन रात्रीच्या वेळीही चमकताना दिसतो. या पेनवर 945 हिऱ्यांसोबत 123 माणिकही बसवले आहेत. याव्यतिरिक्त, यात 18 कॅरेट सोन्याचा वापर केलाय आणि रुथेनियमचा थर दिलाय, ज्यामुळे हा पेन खूप मऊ चालतो.
67 कोटींना विकला गेलेला पेन...
2010 मध्ये चीनमधील शांघायमध्ये एका विशेष चॅरिटी लिलावात हा पेन ठेवण्यात आला होता. जगातल्या सर्वात श्रीमंत व्यक्तींनी या लिलावात सहभाग घेतला होता. एका व्यक्तीने हा पेन चक्क 8 दशलक्ष डॉलर्सला (भारतीय चलनात सुमारे 67 कोटी रुपये) विकत घेतला.
