YouTube Copyright : तुमचा व्हिडीओ दुसऱ्याने युट्यूबवर अपलोड केलाय? मग असं करा!
Youtube: तुम्ही खूप मेहनत घेऊन तयार केलेला व्हिडीओ तुमच्या परवानगीशिवाय दुसऱ्याने त्यांच्या चॅनेलवर अपलोड केलाय का? अशा वेळी काय करायचं? यावर काही उपाय आहे का? याबद्दल सविस्तर माहिती आता आपण जाणून घेऊयात.
कॉपीराईट म्हणजे नक्की काय?
एखाद्या व्यक्तीने स्वतः तयार केलेल्या क्रिएटिव्ह कंटेंटवर त्याला जो कायदेशीर हक्क मिळतो, त्याला कॉपीराईट म्हणतात. व्हिडीओ, फोटो, गाणी, कथा, लेख यासारख्या गोष्टी तयार करणाऱ्यांना त्यावर हा अधिकार असतो. मूळ निर्मात्याच्या परवानगीशिवाय त्या कॉपी करणे, स्वतःच्या नावाने प्रसिद्ध करणे किंवा व्यावसायिक कारणासाठी वापरणे हे कॉपीराईट उल्लंघनामध्ये येते. जर कोणी तुमचा व्हिडीओ डाऊनलोड करून त्यांच्या युट्यूब चॅनेलवर अपलोड केला, तर तुम्ही कॉपीराईटची तक्रार करू शकता. पण त्यासाठी त्या व्हिडीओ कंटेंटवर तुमचा खरंच अधिकार असायला हवा. जर तुम्ही दुसऱ्याचा कंटेंट वापरला असेल, तर तक्रार करण्यापूर्वी त्याच्या हक्कांची माहिती घ्यायला हवी.
व्हिडीओ हटवण्याचे कोणते मार्ग आहेत?
तुम्ही तयार केलेला व्हिडीओ दुसऱ्याने तुमच्या परवानगीशिवाय अपलोड केला, तर तो हटवण्यासाठी युट्यूब दोन मुख्य मार्ग देतं. पहिला मार्ग म्हणजे युट्यूब स्टुडिओद्वारे ऑनलाईन कॉपीराईट काढण्याची विनंती (Copyright Removal Request) पाठवणे. दुसरा मार्ग म्हणजे ईमेलद्वारे कॉपीराईटची तक्रार करणे. या दोन्ही प्रक्रियांमध्ये मूळ व्हिडीओची माहिती, कॉपी केलेल्या व्हिडीओची लिंक आणि तुमचे संपर्क तपशील द्यावे लागतात. तुमची तक्रार मिळाल्यानंतर युट्यूब त्याची तपासणी करते. तक्रार योग्य असल्याची खात्री झाल्यावर तो व्हिडीओ हटवला जातो.
युट्यूब स्टुडिओमध्ये वेबफॉर्म कसा भरायचा?
तुमचा व्हिडीओ हटवण्यासाठी ऑनलाईन तक्रार करायची असेल, तर खालील स्टेप्स फॉलो करा.
* सर्वात आधी तुमच्या युट्यूब अकाऊंटवर लॉग इन करा.
* त्यानंतर YouTube Studio ओपन करा.
* डाव्या बाजूला दिसणाऱ्या मेनूमध्ये Copyright सेक्शनवर क्लिक करा.
* तिथे New Removal Request हा पर्याय निवडा.
* आता ओपन होणाऱ्या फॉर्ममध्ये तुमच्या परवानगीशिवाय अपलोड केलेल्या व्हिडीओची लिंक टाका.
* तसेच तुमच्या मूळ व्हिडीओची माहिती आणि तो कुठे अपलोड केलाय याची माहिती द्या.
* तुमचं पूर्ण नाव, ईमेल, पत्ता यांसारखी माहिती भरा.
* फॉर्ममध्ये विचारलेले कायदेशीर नियम वाचून त्याला संमती द्या.
* भविष्यात त्याच व्हिडीओच्या कॉपी YouTube वर पुन्हा अपलोड होऊ नयेत असं वाटत असेल, तर त्यासाठी दिलेला पर्याय निवडा.
* शेवटी सर्व माहिती पुन्हा तपासून Submit बटणावर क्लिक करा.
तक्रार पाठवल्यानंतर युट्यूब तुमच्या विनंतीची तपासणी करतं. जर काही माहिती चुकीची असेल किंवा अपूर्ण असेल, तर तक्रार फेटाळली जाण्याची शक्यता असते. त्यामुळे सर्व माहिती काळजीपूर्वक भरणे गरजेचे आहे.
ईमेलद्वारे कॉपीराईट तक्रार कशी करायची?
जर तुम्हाला युट्यूब स्टुडिओमध्ये फॉर्म भरायचा नसेल, तर तुम्ही ईमेलद्वारेही कॉपीराईट काढण्याची विनंती पाठवू शकता. यासाठी copyright@youtube.com या अधिकृत पत्त्यावर तक्रार पाठवायची असते. ईमेलमध्ये काही महत्त्वाची माहिती देणं आवश्यक आहे. तुमचं पूर्ण कायदेशीर नाव, पत्ता, फोन नंबर आणि ईमेल द्या. तुम्ही स्वतः तयार केलेल्या मूळ व्हिडीओची माहिती सांगा. तो व्हिडीओ पहिल्यांदा कुठे आणि कधी अपलोड केला तेही सांगा. तुमच्या परवानगीशिवाय इतरांनी अपलोड केलेल्या व्हिडीओची लिंक द्या. त्या व्हिडीओला वापरण्याची तुम्ही कोणतीही परवानगी दिली नाही, हे स्पष्टपणे सांगा. युट्यूबने मागितलेली कायदेशीर माहिती द्या. शेवटी तुमच्या पूर्ण कायदेशीर नावाने स्वाक्षरी करा.
ही माहिती पाठवल्यानंतर YouTube तुमच्या तक्रारीची तपासणी करते. गरज पडल्यास ते आणखी माहिती मागू शकतात. तक्रारीत खोटी माहिती दिल्यास किंवा इतरांच्या अधिकारांचे उल्लंघन केल्यास तुम्हाला कायदेशीर अडचणींचा सामना करावा लागू शकतो.
भविष्यात तुमचा व्हिडीओ पुन्हा अपलोड होण्यापासून कसा रोखायचा?
जेव्हा तुम्ही तुमचा व्हिडीओ हटवण्याची तक्रार करता, तेव्हा युट्यूब तुम्हाला आणखी एक महत्त्वाची सुविधा देते. ती म्हणजे भविष्यात त्या व्हिडीओच्या कॉपी पुन्हा अपलोड होण्यापासून रोखण्याची. कॉपीराईट काढण्याची विनंती करताना तुम्ही हा पर्याय निवडला, तर युट्यूब त्यांच्या सिस्टीमद्वारे त्या व्हिडीओच्या कॉपी शोधून काढते आणि त्या पुन्हा अपलोड होण्यापासून थांबवण्याचा प्रयत्न करते. पण ही सिस्टीम प्रत्येक वेळी सर्व कॉपी शोधून काढेलच याची खात्री नसते. कॉपीराईट तक्रार ही कायदेशीर प्रक्रिया असल्यामुळे, त्या व्हिडीओचे अधिकार तुमच्याकडेच आहेत याची खात्री केल्यानंतरच विनंती पाठवा. तुमचा कंटेंट जर कोणी परवानगीशिवाय वापरत असेल, तर त्याकडे दुर्लक्ष न करता योग्य पुराव्यासह तक्रार करणं केव्हाही चांगलं.
