एका महिलेला तिने ऑर्डर न केलेलंच एक कॅश-ऑन-डिलिव्हरी (COD) पार्सल आलं आहे. या पार्सलमध्ये चक्क एक जुना आणि फाटका कुर्ता निघाल्याने एक्स (X) वर एकच खळबळ उडाली आहे.
मुंबई : एका महिलेला तिने ऑर्डर न केलेलंच एक कॅश-ऑन-डिलिव्हरी (COD) पार्सल आलं आहे. या पार्सलमध्ये चक्क एक जुना आणि फाटका कुर्ता निघाल्याने एक्स (X) वर एकच खळबळ उडाली आहे. किरण मनराल या एक्स युजरने सांगितलं की, हे पार्सल 'डिलिव्हरी' (Delhivery) या कुरिअर कंपनीमार्फत आलं होतं. त्यावर तिचं नाव, फोन नंबर आणि पत्ता अगदी बरोबर होता. पण, हे पार्सल नक्की कोणी पाठवलंय, याची कोणतीही माहिती त्यावर नव्हती. त्यामुळे हे पार्सल कोणी पाठवलं असावं, असा प्रश्न तिला पडला.
किरणने सांगितलं की, हे पार्सल COD होतं. पार्सल उघडण्यापूर्वी तिच्या मुलाने त्याचे पैसेही दिले. पण जेव्हा त्यांनी ते पार्सल उघडलं, तेव्हा आतमध्ये एक 'अर्धा फाटलेला जुना कुर्ता' पाहून सगळ्यांनाच धक्का बसला.
आपला हा अनुभव एक्सवर शेअर करताना किरणने सवाल उपस्थित केला की, असं न मागवलेलं पार्सल तिच्यापर्यंत कसं पोहोचलं? आणि आणखी किती लोक अशा फसवणुकीला बळी पडले असतील? तिने लिहिलं, "हे पार्सल कोणी पाठवलंय, याची मला काहीच कल्पना नाही. अशा प्रकारे किती लोकांची फसवणूक झाली असेल, याचा मी विचार करतेय."
या घटनेला एक "मोठा स्कॅम" म्हणत, किरणने चिंता व्यक्त केली की, अशा प्रकारे न मागवलेल्या पार्सलचे पैसे देऊन अनेक निष्पाप ग्राहकांची फसवणूक केली जात असावी. तिने यावर जोर दिला की, जरी यात गेलेली रक्कम छोटी असली, तरी हा प्रश्न फक्त पैशांचा नाही.
किरणने लिहिलं, "रक्कम छोटी असली तरी, हा तत्त्वाचा प्रश्न आहे."
किरणच्या या पोस्टची 'डिलिव्हरी'च्या हेल्पडेस्कनेही दखल घेतली. त्यांनी एक्सवर तिच्या तक्रारीला उत्तर दिलं. कंपनीने या समस्येची दखल घेत सांगितलं की, हे प्रकरण तपासासाठी त्यांच्या अंतर्गत टीमकडे पाठवण्यात आलं आहे.
डिलिव्हरीच्या हेल्पडेस्कने लिहिलं, "हाय किरण, तुमच्या डिलिव्हर झालेल्या पार्सलमधील चुकीच्या वस्तूबाबतची तुमची तक्रार आम्ही नोंदवून घेतली आहे आणि या गैरसोयीबद्दल आम्ही दिलगीर आहोत. हे प्रकरण आमच्या अंतर्गत टीमकडे तपासासाठी पाठवण्यात आलं आहे, आणि आम्ही लवकरच तुम्हाला यावर तोडगा कळवू."
या घटनेनंतर न मागवलेल्या COD पार्सलबाबत अनेक प्रश्न निर्माण झाले आहेत. विशेषतः जेव्हा ग्राहकांनी कोणतीही ऑर्डर दिलेली नसते, तेव्हा पैसे देण्यापूर्वी पार्सल तपासून पाहण्याची गरज या निमित्ताने अधोरेखित झाली आहे.
