TVS iQube : ओला, एथरलाही टाकलं मागे! १० लाख लोकांनी का खरेदी केली ही स्कूटर? पाहा फीचर्स

भारतात इलेक्ट्रिक वाहनांची (EV) क्रेझ दिवसेंदिवस वाढत आहे. याच संधीचं सोनं करत TVS मोटर कंपनीने एक मोठा रेकॉर्ड केलाय. कंपनीने देशभरात तब्बल १० लाख इलेक्ट्रिक टू-व्हीलर विकून एक नवा मैलाचा दगड गाठला आहे.

Image Credit : TVS

TVS iQube सह प्रवासाची सुरुवात

TVS मोटरने जानेवारी २०२० मध्ये आपली पहिली इलेक्ट्रिक स्कूटर TVS iQube बाजारात आणली. सुरुवातीला फक्त काही शहरांमध्ये उपलब्ध असल्याने विक्री कमी होती. पण हळूहळू देशभरात विक्री वाढवल्यावर ग्राहकांचा प्रतिसाद वाढला. पहिल्या १ लाख गाड्या विकायला जवळपास तीन वर्षं लागली, पण त्यानंतर पुढच्या १ लाख गाड्या फक्त १० महिन्यांत विकल्या गेल्या.

Image Credit : x

ग्राहकांचा विश्वास हेच यशाचे कारण

२०२३ आणि २०२४ मध्ये सप्लाय चेनच्या काही अडचणींमुळे इलेक्ट्रिक वाहन उद्योगाचा वेग मंदावला होता. तरीही TVS ने आपली प्रगती थांबवली नाही. एप्रिल २०२५ पर्यंत कंपनीने ३ लाख इलेक्ट्रिक वाहन विक्रीचा टप्पा ओलांडला. कंपनीवर ग्राहकांचा वाढता विश्वास आणि देशभरात पसरलेलं डीलर नेटवर्क यामुळे विक्री झपाट्याने वाढली.

Image Credit : Google

तीन महिन्यांत लाखांची विक्री

२०२५ च्या ऑक्टोबर ते डिसेंबर या काळात TVS ने जबरदस्त वाढ नोंदवली. फक्त तीन महिन्यांत कंपनीने ७ लाखांवरून ८ लाख युनिट्स विक्रीचा टप्पा गाठला. याच काळात कंपनीने नवीन इलेक्ट्रिक वाहन प्लॅटफॉर्म आणि नवीन उत्पादनं बाजारात आणली, ज्यामुळे मागणी आणखी वाढली.

Image Credit : Google

एका महिन्यात ५१ हजारांहून अधिक स्कूटरची विक्री

२०२६ मध्ये TVS ने एकूण १० लाख इलेक्ट्रिक वाहनांच्या विक्रीचा टप्पा पूर्ण केला. मे २०२६ मध्ये तर एकाच महिन्यात ५१,६०५ इलेक्ट्रिक स्कूटर विकल्या. हा कंपनीच्या इतिहासातील सर्वाधिक मासिक विक्रीचा विक्रम आहे. २०२० मध्ये फक्त १% मार्केट शेअर असलेल्या TVS ने २०२३ पर्यंत २०% पेक्षा जास्त मार्केट शेअर मिळवला. आता ही कंपनी बजाज, एथर आणि ओलासारख्या कंपन्यांना जोरदार टक्कर देत आहे.

Image Credit : TVS website

२०२६ मध्ये आणखी एका मोठ्या विक्रमाची शक्यता

२०२६ मध्ये आतापर्यंत TVS ने २.१९ लाखांपेक्षा जास्त इलेक्ट्रिक स्कूटर विकल्या आहेत. हाच वेग कायम राहिल्यास, विशेषतः सणासुदीच्या काळात मागणी वाढल्यास, या एका वर्षात ५ लाख ईव्ही विक्रीचा विक्रम होऊ शकतो, असा बाजाराचा अंदाज आहे. वाढते पेट्रोलचे दर आणि प्रवासाचा खर्च यामुळे लोक आता इलेक्ट्रिक वाहनांकडे वळत आहेत. त्यामुळे या क्षेत्रात वाढीला मोठी संधी आहे.

Image Credit : Google

आकर्षक फीचर्स

या स्कूटरमध्ये २.२ kWh लिथियम-आयन बॅटरी आणि ४.४ kW BLDC मोटर आहे. तिचा टॉप स्पीड ताशी ७५ किमी आहे. एकदा पूर्ण चार्ज केल्यावर ही स्कूटर ९४ किमीपर्यंत रेंज देते, असा कंपनीचा दावा आहे. ० ते ८०% चार्जिंगसाठी फक्त २ तास ५० मिनिटं लागतात. यात रिव्हर्स असिस्ट, ५-इंचाचा TFT डिस्प्ले, ब्लूटूथ, नेव्हिगेशन, कॉल-एसएमएस अलर्ट, USB चार्जिंग पोर्ट आणि ३० लीटरची मोठी डिकी (अंडरसीट स्टोरेज) यांसारखे स्मार्ट फीचर्स आहेत. सुरक्षिततेसाठी जिओफेन्सिंग, अँटी-थेफ्ट अलर्ट आणि फॉल अलर्टसारखे फीचर्सही दिले आहेत.