टाटा मोटर्स २०२७ मध्ये त्यांची लोकप्रिय कॉम्पॅक्ट एसयूव्ही नेक्सॉनचं नवं मॉडेल लाँच करणार आहे. नव्या ॲटलस प्लॅटफॉर्मवर आधारित या कारमध्ये आधुनिक डिझाईन, प्रीमियम इंटिरिअर आणि पॅनोरमिक सनरूफसारखे भन्नाट फीचर्स मिळतील.
टाटा मोटर्स देशातील कॉम्पॅक्ट एसयूव्ही (SUV) मार्केटमध्ये पुन्हा एकदा धमाका करायला सज्ज झाली आहे. ४ मीटरपेक्षा लहान एसयूव्ही सेगमेंटमध्ये टाटा पंच आणि नेक्सॉनला ग्राहकांची मोठी पसंती मिळते. या वर्षाच्या सुरुवातीलाच पंचचं फेसलिफ्ट व्हर्जन लाँच झालं होतं. आता टाटा नेक्सॉनलाही पूर्णपणे नवा लूक देण्याची तयारी सुरू आहे. नेक्सॉनचं नेक्स्ट जनरेशन मॉडेल २०२७ मध्ये लाँच होऊ शकतं. सध्या या कारचं टेस्टिंग सुरू आहे. हे नवं मॉडेल डिझाईन, इंटिरिअर आणि टेक्नॉलॉजीमध्ये मोठे बदल घेऊन मार्केटमध्ये एन्ट्री करेल. मात्र, इंजिनचे जुनेच पर्याय कायम राहण्याची शक्यता आहे.
डिझाईनमध्ये काय बदल होणार?
टेस्टिंगदरम्यान समोर आलेल्या फोटोंनुसार, नव्या नेक्सॉनचं बेसिक डिझाईन जुन्या मॉडेलसारखंच असेल. ड्युअल-टोन अलॉय व्हील्स, स्लोपिंग रूफ आणि आऊटसाईड रिअर व्ह्यू मिरर (ORVM) आधीसारखेच राहतील. पण कारच्या साईड प्रोफाईलमध्ये थोडेफार बदल दिसू शकतात. शार्प ए-पिलर, मागचे दरवाजे आणि स्पॉयलर नव्या डिझाईनमध्ये पाहायला मिळतील. याशिवाय नव्या नेक्सॉनमध्ये नव्या डिझाईनचे एलईडी (LED) टेल लाईट्स, अपडेटेड टेलगेट आणि नवा बंपरही मिळेल.
नवा प्लॅटफॉर्म हे सर्वात मोठं सरप्राईज
कारच्या आकारात फारसा मोठा बदल होणार नाही. पण नव्या नेक्सॉनमधला सर्वात मोठा अपडेट म्हणजे तिचा नवा ॲटलस (ATLAS) प्लॅटफॉर्म. याचं पूर्ण नाव ॲडॉप्टिव्ह टेक-फॉरवर्ड लाईफस्टाईल आर्किटेक्चर असं आहे. सध्या टाटा कर्व्ह (Curvv) एसयूव्हीमध्येही याच प्लॅटफॉर्मचा वापर केला जातोय. हा प्लॅटफॉर्म वेगवेगळ्या बॉडी स्टाईल्स, पॉवरट्रेन सिस्टीम आणि भविष्यातील टेक्नॉलॉजी लक्षात घेऊन डिझाईन केला गेलाय. क्लाउड कनेक्टेड टेक्नॉलॉजीलाही हा प्लॅटफॉर्म चांगला सपोर्ट करतो.
नवं इंटिरिअर आणि टेक्नॉलॉजी
नव्या नेक्सॉनमध्ये ग्राहकांना अधिक आधुनिक इंटिरिअर पाहायला मिळेल. अपडेटेड युझर इंटरफेस (UI) सोबतच नवी टचस्क्रीन इन्फोटेनमेंट सिस्टीम आणि नव्या केबिन डिझाईनची अपेक्षा आहे. या नव्या मॉडेलमध्ये इलेक्ट्रिकली ॲडजस्टेबल फ्रंट सीट्स, व्हेंटिलेटेड फ्रंट सीट्स आणि पॅनोरमिक सनरूफसारखे प्रीमियम फीचर्सही दिले जाऊ शकतात.
इंजिनमध्ये मोठे बदल नाहीत
नेक्स्ट जनरेशन नेक्सॉनच्या इंजिनमध्ये मोठे बदल होण्याची शक्यता कमीच आहे. रिपोर्ट्सनुसार, यात आधीचंच १.२ लिटर टर्बो पेट्रोल इंजिन आणि १.५ लिटर टर्बो डिझेल इंजिन कायम राहील. गिअरबॉक्सचे पर्यायही जुनेच मिळतील. टाटा याचं सीएनजी (CNG) व्हर्जनही सुरू ठेवेल. कारच्या खालच्या बाजूला असलेली सीएनजी टँक यातही वापरली जाईल. एआरएआय (ARAI) सर्टिफाईड मायलेजचा विचार केल्यास, एका किलोमध्ये २४ किलोमीटरचं मायलेज मिळण्याची अपेक्षा आहे.
किंमत ५० हजार रुपयांपर्यंत वाढू शकते
नव्या जनरेशनच्या नेक्सॉनची किंमत सध्याच्या मॉडेलपेक्षा थोडी जास्त असू शकते. रिपोर्ट्सनुसार, ही किंमत ५० हजार रुपयांपर्यंत वाढू शकते. सध्या टाटा नेक्सॉनची एक्स-शोरूम किंमत ७.४० लाख ते १४.४० लाख रुपयांच्या दरम्यान आहे. नव्या मॉडेलची सुरुवातीची किंमत ८ लाख रुपयांच्या आसपास असू शकते, असा अंदाज आहे. नवी नेक्सॉन मार्केटमध्ये ह्युंदाई व्हेन्यू (Hyundai Venue), किया सोनेट (Kia Sonet), मारुती सुझुकी ब्रेझा (Maruti Suzuki Brezza), स्कोडा कायलाक (Skoda Kylaq) आणि महिंद्रा एक्सयूव्ही ३एक्सओ (Mahindra XUV 3XO) यांसारख्या कार्सना तगडी टक्कर देईल. २०२७ मध्ये नवा प्लॅटफॉर्म, ॲडव्हान्स्ड टेक्नॉलॉजी आणि नव्या डिझाईनसह बाजारात येऊन नेक्सॉन टाटाच्या कॉम्पॅक्ट एसयूव्ही लाईनअपमध्ये आपला दबदबा कायम ठेवेल.
