Investment Advice : SIP हा दीर्घकालीन गुंतवणुकीचा प्रभावी मार्ग असला, तरी त्याबाबत अनेक गैरसमज आहेत. SIP मधून त्वरित नफा मिळतो, बाजार पडला की SIP थांबवावी किंवा जास्त फंड म्हणजे जास्त फायदा, अशा समजुती चुकीच्या ठरू शकतात. योग्य फंड निवड, संयम आणि शिस्त हीच SIP यशस्वी होण्याची गुरुकिल्ली आहे.
Investment Advice : म्युच्युअल फंडातील सिस्टेमॅटिक इन्व्हेस्टमेंट प्लॅन म्हणजेच SIP हा आज लाखो गुंतवणूकदारांसाठी दीर्घकालीन संपत्ती निर्माण करण्याचा लोकप्रिय मार्ग बनला आहे. दर महिन्याला थोडी-थोडी गुंतवणूक करून मोठे आर्थिक उद्दिष्ट साध्य करता येते, त्यामुळे SIP कडे सुरक्षित आणि सोपा पर्याय म्हणून पाहिले जाते. मात्र SIP बाबत अनेक गैरसमज आजही गुंतवणूकदारांमध्ये पसरलेले आहेत. या चुकीच्या समजुतींमुळे अनेकदा चुकीचे आर्थिक निर्णय घेतले जातात आणि अपेक्षित परतावा मिळत नाही. त्यामुळे SIP संदर्भातील काही मोठे मिथक आणि त्यामागील सत्य समजून घेणे अत्यंत महत्त्वाचे आहे.
मिथक 1 : SIP मधून लगेच आणि कायम उच्च परतावा मिळतो
अनेक नवीन गुंतवणूकदारांना वाटते की SIP सुरू केल्यावर दरवर्षी चांगला आणि स्थिर परतावा मिळणारच. सोशल मीडियावर SIP ला झटपट श्रीमंत होण्याचा मार्ग म्हणून दाखवले जाते. मात्र प्रत्यक्षात SIP हा कोणताही जादुई फॉर्म्युला नाही. SIP चा खरा फायदा दीर्घकालीन गुंतवणूक आणि सातत्यपूर्ण शिस्तीत असतो. परतावा हा निवडलेल्या म्युच्युअल फंडाचा दर्जा, बाजाराची परिस्थिती आणि गुंतवणुकीचा कालावधी यावर अवलंबून असतो. सामान्यतः 7 ते 15 वर्षांच्या कालावधीत SIP मधून चांगली वाढ दिसून येते.
मिथक 2 : प्रत्येक लोकप्रिय फंडात SIP सुरू करावी
अनेक गुंतवणूकदार जास्त फंड म्हणजे जास्त नफा असा समज करून 8 ते 10 फंडांमध्ये SIP सुरू करतात. मात्र त्यामुळे पोर्टफोलिओ गुंतागुंतीचा होतो आणि अनेक फंडांमध्ये समान कंपन्यांमध्ये गुंतवणूक असल्याने खरे डायव्हर्सिफिकेशन मिळत नाही.तज्ज्ञांच्या मते, 3 ते 5 दर्जेदार फंड निवडणे अधिक योग्य ठरते. उदाहरणार्थ, लार्ज कॅप, फ्लेक्सी कॅप, मिड कॅप किंवा हायब्रिड फंड. तसेच हे फंड आपल्या आर्थिक उद्दिष्टांशी जोडणे महत्त्वाचे असते.
Related Articles
मिथक 3 : SIP कधीही बंद करू नये
काही गुंतवणूकदारांना वाटते की SIP मध्ये खंड पडला किंवा ती बंद केली तर संपूर्ण गुंतवणूक बिघडते. मात्र जीवनात आर्थिक परिस्थिती सतत बदलत असते. नोकरी बदलणे, उत्पन्न कमी-जास्त होणे किंवा आपत्कालीन खर्च यामुळे SIP थांबवण्याची वेळ येऊ शकते.SIP हा कोणताही कायमस्वरूपी करार नसतो. गरजेनुसार SIP थांबवता, बदलता किंवा काही काळासाठी ‘पॉज’ देखील करता येते. जर एखादा फंड सतत खराब कामगिरी करत असेल, तर चांगल्या फंडात स्विच करणे हा शहाणपणाचा निर्णय ठरू शकतो.
मिथक 4 : बाजार घसरला की SIP बंद करावी
शेअर बाजारात घसरण झाली की अनेक गुंतवणूकदार घाबरून SIP बंद करतात. मात्र प्रत्यक्षात बाजारातील घसरण SIP गुंतवणूकदारांसाठी फायदेशीर ठरू शकते.जेव्हा NAV कमी असतो, तेव्हा त्याच रकमेवर अधिक युनिट्स मिळतात. उदाहरणार्थ, 5 हजार रुपयांत NAV 100 असताना 50 युनिट्स मिळतात. पण NAV 80 वर आल्यास त्याच रकमेत 62.5 युनिट्स मिळू शकतात. यामुळे सरासरी खरेदी खर्च कमी होतो आणि भविष्यात बाजार वाढल्यास अधिक फायदा मिळू शकतो.
मिथक 5 : SIP आपोआप नफा देते
अनेक लोक SIP ला बँकेच्या FD सारखा सुरक्षित पर्याय समजतात. पण SIP स्वतः गुंतवणूक उत्पादन नसून गुंतवणूक करण्याची एक पद्धत आहे. प्रत्यक्ष परतावा हा निवडलेल्या म्युच्युअल फंडावर अवलंबून असतो.फंडचा पोर्टफोलिओ, फंड मॅनेजरची रणनीती, जोखीम आणि पूर्वीची कामगिरी या सर्व गोष्टींचा परिणाम परताव्यावर होतो. त्यामुळे SIP सुरू करण्यापूर्वी फंडाचा सखोल अभ्यास करणे अत्यंत आवश्यक आहे.
गुंतवणुकीत संयम आणि योग्य रणनीती महत्त्वाची
SIP हा दीर्घकालीन संपत्ती निर्माण करण्यासाठी प्रभावी पर्याय आहे. मात्र चुकीच्या अपेक्षा आणि गैरसमज टाळणे गरजेचे आहे. योग्य फंड निवड, नियमित गुंतवणूक आणि दीर्घकालीन दृष्टीकोन यामुळेच SIP मधून चांगला परतावा मिळू शकतो.
