हायवेवर स्कूटर चालवताना टायरमधली हवा योग्य असणं खूप गरजेचं आहे. टायरमध्ये जास्त हवा भरली असेल, तर तो फुटण्याचा किंवा अपघात होण्याचा धोका असतो. सुरक्षित प्रवासासाठी पुढच्या टायरमध्ये 22-24 PSI आणि मागच्या टायरमध्ये 29-36 PSI हवा असणं योग्य आहे.
मुंबई : हायवेवर लांबच्या प्रवासाला जाताना स्कूटरच्या टायरमध्ये नेमकी किती हवा असावी, असा प्रश्न अनेकांना पडतो. कारण हायवेवर गाड्या वेगाने चालवाव्या लागतात. अशा वेळी टायरमध्ये हवा जास्त असली तरी त्रास आणि कमी असली तरी त्रास. त्यामुळे हवेचा दाब योग्य प्रमाणात असणं गरजेचं आहे. नाहीतर अपघाताचा धोका वाढतो आणि गाडीवरही वाईट परिणाम होतो. मग टायरमध्ये हवा असावी तरी किती?
ऑटोमोबाईल तज्ज्ञ आणि प्रमुख टायर कंपन्यांच्या म्हणण्यानुसार, स्कूटरच्या टायरचा आकार आणि क्षमता ही कार किंवा बाईकपेक्षा वेगळी असते. त्यामुळे टायरमधला हवेचा दाब हा ठरलेल्या मानकांनुसारच असायला हवा.
हायवेवर हवा किती असावी?
हायवेवर स्कूटर चालवताना टायरमध्ये 35 किंवा 40 PSI हवा भरणं धोक्याचं ठरू शकतं. अनेकदा गॅरेजवाले मीटर न तपासता टायरमध्ये खूप हवा भरतात, ज्यामुळे धोका वाढतो. हायवेवर आपण गाडी वेगाने चालवतो. या वेगामुळे रस्ता आणि टायरच्या रबरमध्ये घर्षण होतं, ज्यामुळे टायरमधली हवा गरम होते. हवा गरम झाली की त्याचा दाब आपोआप 2 ते 4 PSI ने वाढतो. तज्ज्ञांच्या मते, जर तुमच्या टायरमध्ये आधीच 40 PSI हवा असेल, तर ती गरम झाल्यावर दाब आणखी वाढतो आणि टायर फुटण्याची शक्यता असते.
Related Articles
स्कूटरसाठी योग्य नियम काय?
होंडा अ‍ॅक्टिव्हा, टीव्हीएस ज्युपिटर आणि सुझुकी अ‍ॅक्सेस यांसारख्या स्कूटरसाठी कंपन्यांनी हवेच्या दाबाचे ठराविक तक्ते दिले आहेत. अधिकृत मार्गदर्शक तत्त्वांनुसार, स्कूटरवर एकटं प्रवास करताना पुढच्या टायरमध्ये 22 ते 24 PSI आणि मागच्या टायरमध्ये 29 PSI हवा भरावी. जर मागे कोणी बसलं असेल किंवा जास्त सामान असेल, तर पुढच्या टायरमध्ये 22 ते 24 PSI च ठेवा आणि मागच्या टायरमधली हवा 36 PSI पर्यंत वाढवा. लांबच्या प्रवासात गाडीचा तोल सांभाळण्यासाठी पुढच्या टायरमधली हवा 25 PSI च्या वर कधीच जाऊ देऊ नका. हवा जास्त असेल तर हँडल जास्त हलतं आणि गाडीवरचं नियंत्रण सुटू शकतं.
टायरमध्ये योग्य हवा ठेवल्यास स्कूटरचं काम आणि मायलेज दोन्ही चांगलं राहतं. योग्य हवा असल्यावर इंजिनवर जास्त ताण पडत नाही, गाडी सुरळीत चालते आणि पेट्रोलही वाचतं.
दुसरीकडे, जर टायरमध्ये हवा खूप कमी असेल, तर त्याचा थेट परिणाम ड्रायव्हिंगवर होतो. गाडीचा बॅलन्स बिघडतो. कमी हवा असलेले टायर रस्त्याला जास्त घासतात, ज्यामुळे मायलेज कमी मिळतं आणि टायर लवकर झिजतात. त्यामुळे हायवेवर गाडी नेण्यापूर्वी टायरमधली हवा नक्की तपासून घ्या.
