Online Shopping Discount : 999 ची वस्तू 499 ला? समजून घ्या मार्केटिंगचं गणित
MRP म्हणजे फक्त कमाल किरकोळ किंमत असते, ती वस्तूची खरी बाजारभाव नसते. त्यामुळे कोणतीही वस्तू खरेदी करण्यापूर्वी इतर वेबसाइट्सवर तिची मूळ किंमत नक्की तपासा. तसेच, कूपन आणि बँक ऑफर्सच्या अटी वाचायला विसरू नका.
ऑनलाइन शॉपिंगमधील डिस्काउंटचं सत्य!
आपण ऑनलाइन शॉपिंग ॲप उघडलं की अनेक ऑफर्स दिसतात. ९९९ रुपयांची वस्तू आज फक्त ४९९ रुपयांना, ५०% डिस्काउंट, लिमिटेड टाइम ऑफर, मेगा सेल अशा जाहिराती आपलं लक्ष वेधून घेतात. हे पाहिल्यावर 'अरे वा! निम्म्या किमतीत मिळतेय' असा विचार करून आपण लगेच ऑर्डर करतो. पण खरंच त्या वस्तूची किंमत ९९९ रुपये असते का? की डिस्काउंटच्या नावाखाली आपल्याला खरेदी करायला लावणारी ही एक मार्केटिंग ट्रिक आहे?
MRP म्हणजे नेमकं काय?
MRP (Maximum Retail Price) म्हणजे एखाद्या वस्तूची विक्री करण्यासाठी ठरवलेली कमाल किरकोळ किंमत. समजा, एखाद्या वस्तूवर ९९९ रुपये MRP छापली आहे. पण याचा अर्थ असा नाही की ती वस्तू नेहमी ९९९ रुपयांनाच विकली जाईल. विक्रेता ती वस्तू त्यापेक्षा कमी किमतीतही विकू शकतो. अनेकदा MRP वर मोठी सूट दाखवली जाते, पण बाजारात ती वस्तू आधीपासूनच कमी किमतीत मिळत असते. त्यामुळे फक्त MRP बघून आपण किती पैसे वाचवले, याचा हिशोब करणे चुकीचे आहे.
९९९ वरून ४९९ - हा खरा डिस्काउंट आहे का?
समजा एका वस्तूची MRP ९९९ रुपये आहे आणि ती ४९९ रुपयांना मिळत आहे. हिशोबानुसार तुम्हाला ५०० रुपयांचा डिस्काउंट मिळतोय. म्हणजेच सुमारे ५०% किंमत कमी झाली. पण हीच वस्तू दुसऱ्या वेबसाइटवर ५५० रुपयांना आणि जवळच्या दुकानात ५२० रुपयांना मिळत असेल तर? अशा वेळी ४९९ रुपये ही चांगली किंमत असू शकते. पण आपण ९९९ मधून ५०० रुपये वाचवले, असा विचार करणे चुकीचे आहे. त्यामुळे खरेदी करण्यापूर्वी २-३ ठिकाणी किंमत नक्की तपासा.
ऑनलाइन प्लॅटफॉर्मवर किंमत कमी होण्यामागे फक्त MRP डिस्काउंट नसतो, तर कूपन आणि बँक ऑफर्सही असतात. उदा. एका वस्तूची किंमत ९९९ वरून ६९९ रुपये होते. त्यानंतर १०० रुपयांचे कूपन मिळते. विशिष्ट बँक कार्ड वापरल्यास आणखी ५० रुपये सूट मिळते.
विक्री किंमत: ६९९ रुपये
कूपन डिस्काउंट: १०० रुपये
बँक ऑफर: ५० रुपये
अंतिम किंमत: ५४९ रुपये
इथे एक महत्त्वाची गोष्ट लक्षात घ्या. बँक ऑफरची रक्कम लगेच वजा होतेय की नंतर कॅशबॅक (Cashback) स्वरूपात मिळतेय, तसेच किमान खरेदीची अट आहे का, हे पाहणे गरजेचे असते. काही ऑफर्ससाठी विशिष्ट कार्ड किंवा पेमेंट पद्धत वापरणे बंधनकारक असू शकते.
ग्राहकांना आकर्षित करण्याची सायकॉलॉजी!
आधी ९९९ रुपये किंमत दाखवायची आणि नंतर ती खोडून ४९९ रुपये करायची, यामुळे ग्राहकांना आपण मोठी बचत करत असल्याचा भास होतो. ग्राहकांच्या खरेदीच्या निर्णयावर प्रभाव टाकणारी ही एक प्राईसिंग सायकॉलॉजी आहे. याशिवाय, 'ऑफर फक्त १० मिनिटे शिल्लक', 'फक्त २ वस्तू शिल्लक' असे मेसेज ग्राहकांना घाईघाईने खरेदी करायला भाग पाडतात. ही माहिती खरोखरच स्टॉक आणि वेळेवर आधारित आहे का, याकडे आपण लक्ष दिले पाहिजे.
स्मार्ट पद्धतीने शॉपिंग कशी करावी?
तुम्हाला हवी असलेली वस्तू इतर वेबसाइट्सवरही शोधा. डिलिव्हरी चार्जेससह एकूण किंमत किती होतेय, याचा हिशोब करा. कूपन, बँक डिस्काउंट आणि कॅशबॅकच्या अटी नीट तपासा. वस्तूचा दर्जा, साईझ, वॉरंटी आणि विक्रेत्याची विश्वासार्हता नक्की तपासा. फक्त डिस्काउंट मिळतोय म्हणून नको असलेली वस्तू खरेदी करणे म्हणजे बचत नव्हे, तर तो अतिरिक्त खर्च असतो.
ऑनलाइन शॉपिंगमधील प्रत्येक डिस्काउंट फसवणूक नसतो. तसेच, मोठा डिस्काउंट म्हणून जाहिरात केलेली प्रत्येक ऑफर तुम्हाला सर्वात कमी किंमत देईलच असेही नाही. 'किती टक्के डिस्काउंट मिळतोय?' यापेक्षा 'ही वस्तू मला खरोखर किती कमी किमतीत मिळतेय?' हे पाहणे जास्त महत्त्वाचे आहे. पुढच्या वेळी ९९९ ची वस्तू ४९९ ला दिसली, तर लगेच ऑर्डर करण्याऐवजी थोडा वेळ किमतींची तुलना करा. तुमची ही छोटीशी सवय तुमचे पैसे वाचवेल!
