Scorpio N Facelift: महिंद्रा स्कॉर्पिओ N नव्या रूपात येणार, जाणून घ्या काय असेल खास!

महिंद्राची लोकप्रिय SUV स्कॉर्पिओ N 2026 मध्ये एका नवीन फेसलिफ्टसह बाजारात येणार आहे. या गाडीच्या टेस्टिंग दरम्यान काही फोटो समोर आले आहेत.

Mahindra Scorpio N 2026 Facelift Details Leaked Ahead of Launch

महिंद्रा स्कॉर्पिओ N (Mahindra Scorpio N) आपल्या दमदार लूक, जबरदस्त रोड प्रेझेन्स, ऑफ-रोड क्षमता आणि पॉवरफुल इंजिनमुळे भारतात प्रचंड लोकप्रिय आहे. ही SUV पहिल्यांदा जून 2022 मध्ये लॉन्च झाली होती. नेहमीच्या स्कॉर्पिओपेक्षा ही एक मोठी आणि अधिक प्रीमियम गाडी होती. यात मोठे डिझाइन बदल, नवीन फीचर्स, उत्तम तंत्रज्ञान आणि एक नवीन इंजिन देण्यात आलं होतं. लॉन्च झाल्यापासून या SUV मध्ये फारसे बदल झालेले नाहीत. पण आता महिंद्रा ही SUV अपडेट करण्याच्या तयारीत असल्याची बातमी आहे.

गाडीची लोकप्रियता पाहता, कंपनी आता 2026 महिंद्रा स्कॉर्पिओ N फेसलिफ्ट लॉन्च करण्याच्या तयारीत आहे. अधिकृत लॉन्चची तारीख अजून जाहीर झालेली नाही, पण 2026 च्या मध्यापर्यंत ही गाडी विक्रीसाठी उपलब्ध होईल अशी अपेक्षा आहे. कंपनी सध्या नवीन स्कॉर्पिओ N ची जोरदार चाचणी करत आहे आणि टेस्ट मॉडेल अनेकदा कॅमेऱ्यात कैद झाले आहेत, ज्यामुळे काही डिटेल्स समोर आले आहेत.

नवा लूक आणि डिझाइन

समोर आलेल्या फोटोंवरून स्पष्ट होतंय की, नवीन स्कॉर्पिओ N चं मूळ डिझाइन तसंच दमदार आणि उंच ठेवलं जाईल. गाडीच्या पुढच्या भागात नवीन ग्रिल, एलईडी डीआरएल सिग्नेचरसह अपडेटेड हेडलॅम्प्स आणि थोडा बदल केलेला बंपर दिसेल. या SUV मध्ये पुन्हा डिझाइन केलेले आणि पूर्वीपेक्षा मोठे अलॉय व्हील्स असू शकतात. गाडीच्या आकारमानात कोणताही बदल होणार नाही. तिची लांबी 4,662 मिमी, रुंदी 1,917 मिमी आणि उंची 1,857 मिमी असेल. व्हीलबेस 2,750 मिमी आणि ग्राउंड क्लिअरन्स 187 मिमी इतकाच राहील.

इंजिनमध्ये काय बदल?

2026 स्कॉर्पिओ N फेसलिफ्टमध्ये सध्याचेच 2.2-लिटर टर्बो-डिझेल आणि 2.0-लिटर टर्बो-पेट्रोल इंजिन वापरले जातील. डिझेल इंजिन 132PS ते 175PS पर्यंत पॉवर निर्माण करेल, तर पेट्रोल इंजिन 200PS पर्यंत पॉवर देईल. गिअरबॉक्सचे पर्यायही तेच राहतील, ज्यात 6-स्पीड मॅन्युअल आणि 6-स्पीड टॉर्क कन्व्हर्टर ऑटोमॅटिक ट्रान्समिशनचा समावेश असेल.

आणखी प्रीमियम फीचर्स मिळणार

गाडीच्या इंटिरियरबद्दल संपूर्ण माहिती अजून समोर आलेली नाही. पण नवीन स्कॉर्पिओ N फेसलिफ्टमध्ये मोठी टचस्क्रीन इन्फोटेनमेंट सिस्टीम, डॉल्बी अॅटमॉससह (Dolby Atmos) हार्मन कार्डन (Harman Kardon) ऑडिओ सिस्टीम, पॅनोरॅमिक सनरूफ, पूर्णपणे डिजिटल TFT इन्स्ट्रुमेंट क्लस्टर, मेमरी फंक्शन असलेली ड्रायव्हर सीट आणि पॉवर्ड फ्रंट सीट्स मिळण्याची शक्यता आहे. इतर फीचर्स सध्याच्या मॉडेलप्रमाणेच राहतील अशी अपेक्षा आहे.