महिंद्राने आपल्या लोकप्रिय एसयूव्ही थार रॉक्स आणि स्कॉर्पिओ क्लासिकच्या किमती वाढवल्या आहेत. थार रॉक्सच्या दरात तब्बल ७८,००० रुपयांपर्यंत वाढ झाली आहे,
महिंद्राची गाडी घेण्याचा प्लॅन करत असाल, तर तुमच्या खिशाला थोडी कात्री लागणार आहे. कंपनीने आपल्या दोन लोकप्रिय एसयूव्ही - थार रॉक्स आणि स्कॉर्पिओ क्लासिकच्या किमती वाढवल्या आहेत. महिंद्राने यापूर्वीच जाहीर केलं होतं की, जुलै महिन्यापासून प्रवासी वाहनांच्या किमतीत २.७ टक्क्यांपर्यंत आणि व्यावसायिक वाहनांच्या किमतीत २ टक्क्यांपर्यंत वाढ केली जाईल. याच घोषणेनुसार आता या दोन एसयूव्हीच्या वेगवेगळ्या व्हेरिएंट्ससाठी नवीन दर लागू झाले आहेत. ही दरवाढ इंजिन, गिअरबॉक्स आणि ड्राइव्हट्रेनवर अवलंबून आहे. विशेषतः थार रॉक्सच्या टॉप व्हेरिएंट्सच्या किमतीत सर्वाधिक वाढ झाली असून, काही मॉडेल्ससाठी तब्बल ७८,००० रुपये जास्त मोजावे लागतील.
थार रॉक्ससाठी मोजावे लागणार ७८,००० रुपये जास्त
पाच-दरवाजी महिंद्रा थार रॉक्स तिच्या ऑफ-रोड क्षमतेमुळे आणि दमदार डिझाइनमुळे भारतीय बाजारात प्रचंड लोकप्रिय आहे. आता कंपनीने तिच्या सर्व व्हेरिएंट्सच्या किमती बदलल्या आहेत. पेट्रोल मॉडेल्सच्या किमती १२,५०० ते ५९,००० रुपयांनी वाढल्या आहेत. सर्वात कमी वाढ MX1 मॅन्युअल टू-व्हील ड्राइव्ह व्हेरिएंटमध्ये झाली आहे, तर स्टार एडिशन ऑटोमॅटिक टू-व्हील ड्राइव्ह मॉडेल सर्वाधिक महाग झालं आहे. डिझेल व्हेरिएंट्सच्या किमतीत २२,५०० ते ७८,००० रुपयांपर्यंत वाढ झाली आहे. यात MX5 मॅन्युअल टू-व्हील ड्राइव्हची किंमत कमी वाढली आहे, तर AX7 L टू-व्हील ड्राइव्ह आणि AX7 L टू-व्हील ड्राइव्ह मोका इंटीरियरसारख्या टॉप व्हेरिएंट्ससाठी सर्वाधिक पैसे मोजावे लागतील.
स्कॉर्पिओ क्लासिकही महागली
महिंद्राने स्कॉर्पिओ क्लासिक एसयूव्हीच्या किमतीतही वाढ केली आहे. स्कॉर्पिओ-एन सोबतच विकली जाणारी ही एसयूव्ही आजही ग्रामीण भागात खूप लोकप्रिय आहे. या गाडीच्या एस मॅन्युअल ७-सीटर व्हेरिएंटची किंमत ३७,००० रुपयांनी वाढली आहे. तर एस मॅन्युअल ९-सीटर व्हेरिएंटसाठी ३९,००० रुपये जास्त द्यावे लागतील. एस११ मॅन्युअल ७-सीटर आणि एस११ मॅन्युअल ७-सीटर सी.सी. या दोन्ही व्हेरिएंट्सच्या किमती ४०,००० रुपयांनी वाढवण्यात आल्या आहेत. नवीन किमतींनुसार, स्कॉर्पिओ क्लासिकची एक्स-शोरूम किंमत आता १३.३७ लाख ते १७.४० लाख रुपयांपर्यंत पोहोचली आहे.
Related Articles
स्कॉर्पिओ-एन फेसलिफ्ट लवकरच येणार
किंमतवाढीसोबतच महिंद्राच्या पुढील मोठ्या लाँचचीही बाजारात उत्सुकता आहे. स्कॉर्पिओ-एन फेसलिफ्ट लवकरच सादर केली जाईल, असे रिपोर्ट्स आहेत. टेस्टिंगदरम्यान ही गाडी अनेकदा दिसली आहे. नवीन डिझाइन, अधिक प्रीमियम इंटीरियर आणि नवीन टेक्नॉलॉजीसह ही फेसलिफ्ट आवृत्ती बाजारात येईल अशी अपेक्षा आहे.
कच्च्या मालाच्या आणि उत्पादन खर्चात झालेल्या वाढीमुळे गाड्यांच्या किमती वाढवाव्या लागत असल्याचं कंपनीचं म्हणणं आहे. त्यामुळे येत्या काही महिन्यांत इतर मॉडेल्सच्या किमतीतही बदल होण्याची शक्यता नाकारता येत नाही.
