लेक्सस इंडियाने आपल्या LX या लक्झरी SUV च्या 117 गाड्या परत बोलावल्या आहेत. या गाड्यांच्या ट्रान्समिशनमध्ये एक सॉफ्टवेअर प्रॉब्लेम आहे, ज्यामुळे गाडीचं मोठं नुकसान होऊ शकतं.
Lexus Recalls टोयोटा किर्लोस्कर मोटरच्या मालकीची लक्झरी कार कंपनी लेक्सस इंडियाने (Lexus India) आपल्या LX या महागड्या SUV गाड्या परत बोलावण्याचा (Recall) निर्णय घेतला आहे. या गाडीची एक्स-शोरूम किंमत तब्बल २.८० कोटी रुपयांपासून सुरू होते. गाडीच्या ट्रान्समिशनमध्ये एक मोठी समस्या आढळल्यामुळे कंपनीने हा निर्णय घेतला आहे. ६ मार्च २०२५ ते २९ सप्टेंबर २०२५ दरम्यान तयार झालेल्या ११७ गाड्यांना ही समस्या जाणवत आहे.
लेक्सस LX SUV मध्ये नेमकी समस्या काय?
कंपनीने दिलेल्या माहितीनुसार, लेक्सस LX मध्ये १०-स्पीड ऑटोमॅटिक ट्रान्समिशन आहे. गिअर बदलण्यासाठी यात 'लिनियर सोलनॉइड' (linear solenoid) नावाचा एक पार्ट वापरला जातो. काही विशिष्ट ड्रायव्हिंग परिस्थितीत हा सोलनॉइड पार्ट फेल होऊ शकतो. अशावेळी, एका सॉफ्टवेअरमधील चुकीमुळे (bug) ट्रान्समिशन कंट्रोल युनिट (TCU) आणि इंजिन कंट्रोल युनिट (ECU) यांच्यातील संवाद थांबतो. म्हणजेच, पार्ट खराब झाल्याची माहिती इंजिनपर्यंत पोहोचत नाही. वेळीच दुरुस्ती न केल्यास, काही गिअर्समध्ये ट्रान्समिशन गरजेपेक्षा जास्त वेगाने फिरू (over-rev) शकते. ही समस्या सोडवण्यासाठी कंपनी एक सॉफ्टवेअर अपडेट मोफत करून देणार आहे. कंपनीने हेही स्पष्ट केलं आहे की, ही समस्या फक्त भारतातील गाड्यांमध्ये नसून, जगभरातील अनेक देशांमध्ये याच कारणामुळे लेक्सस LX गाड्या परत बोलावण्यात आल्या आहेत.
ट्रान्समिशन खराब होऊ शकतं
कंपनीचं म्हणणं आहे की, गाडी वेगात असताना ही समस्या उद्भवल्यास ट्रान्समिशन खराब होऊ शकतं आणि इंजिनची पॉवर कमी होऊ शकते. इतकंच नाही, तर ट्रान्समिशनच्या बाहेरील भागाला (housing) नुकसान पोहोचून त्यातून ट्रान्समिशन ऑईल गळती होण्याचीही शक्यता आहे. कंट्रोल युनिटचं फर्मवेअर अपडेट करून ही समस्या सोडवता येऊ शकते. विशेष म्हणजे, सध्याच्या जनरेशनची LX लाँच झाल्यापासून ही चौथी वेळ आहे, जेव्हा गाडीला कोणत्या ना कोणत्या कारणामुळे परत बोलावण्यात आलं आहे.
Related Articles
भारतातील लेक्सस LX 500d मॉडेल
सध्या भारतीय बाजारात लेक्सस LX 500d हे मॉडेल उपलब्ध आहे. यात ३.३-लिटर ट्विन-टर्बोचार्ज्ड V6 इंजिन आहे, जे १०-स्पीड ऑटोमॅटिक ट्रान्समिशनशी जोडलेलं आहे. हे इंजिन ३०४ हॉर्सपॉवर आणि ७०० Nm टॉर्क निर्माण करतं. याशिवाय, गाडीत ॲडॉप्टिव्ह व्हेरिएबल सस्पेन्शन आणि फोर-व्हील ॲक्टिव्ह हाईट कंट्रोल यांसारखे फीचर्सही आहेत.
