Hyundai Creta Electric: आता चार्जिंगसाठी 58 मिनिटं नाही तर 39 मिनिटंच पुरेशी...
Hyundai Creta Electric: भारतातील इलेक्ट्रीक कार मार्केट झपाट्याने बदलत चालले आहे. आता Hyundai Creta Electric 100kW DC फास्ट चार्जिंगला सपोर्ट करते. त्यामुळे 10 ते 80 टक्के चार्जिंगसाठी फक्त 39 मिनिटे लागतील.
फास्ट चार्जिंग अपडेट
इलेक्ट्रिक चारचाकी वाहनांच्या बाजारात Hyundai Creta Electric ला चांगला प्रतिसाद मिळत आहे. आता ग्राहकांची सोय आणखी वाढवण्यासाठी, Hyundai ने एक महत्त्वाचे अपडेट आणले आहे. आता ही इलेक्ट्रिक SUV 100kW DC फास्ट चार्जिंगला सपोर्ट करते. यामुळे, सार्वजनिक फास्ट चार्जिंग स्टेशनवर चार्जिंगसाठी लागणारा वेळ कमी झाला आहे. पूर्वी फक्त 50kW चार्जिंग असल्यामुळे 10 ते 80 टक्के चार्ज होण्यासाठी सुमारे 58 मिनिटे लागायची. आता या अपडेटनंतर, तेवढ्याच चार्जिंगसाठी फक्त 39 मिनिटे पुरेशी आहेत.
Hyundai Creta Electric
विशेष म्हणजे, ही नवीन चार्जिंग सुविधा कोणत्याही हार्डवेअर बदलाशिवाय दिली जात आहे. ही सुविधा केवळ सॉफ्टवेअर अपडेटद्वारे लागू करण्यात आली आहे. Creta Electric च्या मालकांना हे अपडेट ओव्हर-द-एअर (OTA) पद्धतीने मिळेल, त्यामुळे सर्व्हिस सेंटरला जाण्याची गरज नाही. एका चार्जमध्ये जास्तीत जास्त 510 किलोमीटरपर्यंत प्रवास करता येतो, हे देखील या कारचे वैशिष्ट्य आहे. 42kWh बॅटरी व्हेरिएंट 18.02 लाख ते 22.33 लाख रुपयांपर्यंतच्या किमतीत उपलब्ध आहे. तर लाँग रेंज व्हेरिएंटची किंमत 20 लाख ते 23.96 लाख रुपयांपर्यंत ठेवण्यात आली आहे.
क्रेटा इलेक्ट्रिक रेंज
Hyundai Creta Electric दोन बॅटरी पर्यायांमध्ये येते. 42kWh बॅटरी 420 किमी रेंज देते, तर 51.4kWh बॅटरी 510 किमी रेंज देते. लाँग रेंज व्हेरिएंट फक्त 7.9 सेकंदात 0 ते 100 किमी/तास वेग गाठण्यास सक्षम आहे. यात इको, नॉर्मल आणि स्पोर्ट असे तीन ड्राइव्ह मोड दिले आहेत. सिंगल पेडल ड्रायव्हिंगसाठी आय-पेडल तंत्रज्ञानही यात आहे. ही SUV एक्झिक्युटिव्ह, स्मार्ट, प्रीमियम आणि एक्सलन्स या 4 व्हेरिएंटमध्ये उपलब्ध आहे.
क्रेटा इलेक्ट्रिकचे फीचर्स
फीचर्सबद्दल बोलायचे झाल्यास, यात 10.25-इंचाचे दोन मोठे स्क्रीन, नवीन फ्लोटिंग सेंट्रल कन्सोल, 360-डिग्री कॅमेरा, ADAS सुरक्षा फीचर्स आणि पॅनोरॅमिक सनरूफ यांसारख्या सुविधा आहेत. तसेच, एका इलेक्ट्रिक वाहनातून दुसऱ्या वाहनाला चार्ज करण्यासाठी V2V तंत्रज्ञानही दिले आहे. रंगांच्या बाबतीत, 8 मोनोटोन, 3 मॅट फिनिश आणि ड्युअल-टोन पर्यायांसह एकूण 10 रंगांचे पर्याय उपलब्ध आहेत. या अपडेटमुळे, Creta Electric दैनंदिन आणि लांबच्या प्रवासासाठी अधिक उपयुक्त झाली आहे.
