गूगलची Pixel 11 सीरीज 12 ऑगस्टला लाँच होणार आहे. 'पिक्सल ग्लो' नावाचं एक नवीन नोटिफिकेशन लाईट फीचर या सीरीजचं मुख्य आकर्षण असेल. Tensor G6 प्रोसेसरसह येणाऱ्या या सीरीजमध्ये Pixel 11, Pixel 11 Pro आणि Pixel 11 Pro Fold सह चार मॉडेल्स असण्याची शक्यता आहे.
मुंबई : गूगल आपली नवीन फ्लॅगशिप स्मार्टफोन सीरीज, Pixel 11, येत्या 12 ऑगस्टला सादर करणार आहे. गेल्या आठवड्यातच कंपनीने Pixel 11 सीरीज येणार असल्याची अधिकृत घोषणा केली होती. आता कंपनीने आपल्या ऑनलाइन स्टोअरच्या होमपेजवर एक नवीन टीझर व्हिडिओ शेअर केला आहे. या व्हिडिओमुळे 'पिक्सल ग्लो' (Pixel Glow) नावाच्या नवीन फीचरची चर्चा खरी ठरली आहे.
या टीझर व्हिडिओमध्ये गूगलच्या खास रंगांमध्ये एक गोल LED लाईट चमकताना दिसत आहे. ही एक प्रकारची नोटिफिकेशन लाईट असणार आहे, असा अंदाज वर्तवला जात आहे. वेगवेगळ्या ॲप्ससाठी वेगवेगळे रंग सेट करण्याची सोय यात असू शकते, अशीही चर्चा आहे. पण याबद्दलची खरी माहिती 12 ऑगस्टच्या लाँच इव्हेंटमध्येच समोर येईल. गूगलने हेही स्पष्ट केलं आहे की, लाँचच्या दिवसापासूनच Pixel 11 सीरीजची प्री-ऑर्डर सुरू होईल. या सीरीजमध्ये Pixel 11, Pixel 11 Pro, Pixel 11 Pro XL आणि Pixel 11 Pro Fold असे चार मॉडेल्स सादर केले जातील, असं बोललं जातंय.
लीक झालेल्या माहितीनुसार, Pixel 11 Pro Fold हा फोन पाइन (Pine) आणि मिडनाइट (Midnight) या रंगांमध्ये येईल. तर Pixel 11 Pro साठी ड्यून (Dune), लाईट फॉग (Light Fog), पाइन (Pine) आणि स्टर्लिंग (Sterling) असे चार रंगांचे पर्याय मिळतील. डिझाइनमध्ये फार मोठे बदल नसले तरी, साध्या मॉडेल्समध्ये गूगल आडवा कॅमेरा बार तसाच ठेवणार आहे. पण Pixel 11 Pro Fold मध्ये मात्र कॅमेरा आयलँडचं डिझाइन बदललेलं दिसेल. यात मुख्य आणि अल्ट्रावाइड कॅमेऱ्यांची जागा बदलली असून, ऑटोफोकस सेन्सरमध्येही बदल करण्यात आला आहे. तसेच LED फ्लॅशचा आकारही मोठा केल्याचं रिपोर्ट्समध्ये म्हटलं आहे.
Related Articles
या फोनमध्ये काय खास असेल? डिस्प्लेच्या बाबतीत ही नवीन सीरीज जुन्या सीरीजसारखीच असेल. Pixel 11 आणि Pixel 11 Pro मध्ये 6.3-इंचाचा OLED डिस्प्ले, तर Pixel 11 Pro XL मध्ये 6.8-इंचाचा OLED पॅनल मिळण्याची शक्यता आहे. Pixel 11 Pro Fold मध्ये 6.4-इंचाचा बाहेरील डिस्प्ले आणि 8-इंचाची आतली फोल्डेबल स्क्रीन असू शकते. परफॉर्मेंसच्या बाबतीत गूगल मोठा बदल करण्याच्या तयारीत आहे. सर्व मॉडेल्समध्ये TSMC च्या 2 नॅनोमीटर टेक्नॉलॉजीवर बनवलेला Tensor G6 प्रोसेसर दिला जाईल, अशी माहिती आहे. जुन्या Tensor G5 चिपच्या तुलनेत ही नवीन चिप जास्त वेगवान आणि कमी बॅटरी वापरणारी असेल, अशी अपेक्षा आहे.
याशिवाय, गूगल अनेक वर्षांपासून वापरत असलेलं सॅमसंगचं सेल्युलर मॉडेम बदलून मीडियाटेकचं नवीन M90 मॉडेम वापरू शकतं, अशीही चर्चा आहे. तसेच, Pixel 11 सीरीज Android 17 या नव्या ऑपरेटिंग सिस्टीमसोबत येईल, असेही संकेत मिळत आहेत.
