आयुष्यातली पहिली बाईक घेण्याआधी फक्त तिची डिझाइन किंवा किंमत पाहू नका. ती बाईक तुम्ही कशासाठी वापरणार आहात, तिचं इंजिन, मायलेज आणि सेफ्टी फीचर्स तपासणंही महत्त्वाचं आहे. एकूण खर्च, सर्व्हिसिंग, रिसेल व्हॅल्यू आणि योग्य कर्ज व इन्शुरन्सची निवड करून तुम्ही भविष्यातला पश्चात्ताप टाळू शकता.
ऑफिसला जाण्यासाठी असो किंवा लाँग ट्रिपला, आयुष्यातली पहिली बाईक घेण्याचा आनंदच काही वेगळा असतो. पण योग्य मॉडेल निवडणं हे खूपच अवघड काम आहे. अनेक जण फक्त बाईकची डिझाइन आणि किंमत बघून निर्णय घेतात आणि त्यानंतर त्यांना पश्चात्ताप होतो. त्यामुळे बाईक घेण्यापूर्वी इंजिन, मायलेज, सेफ्टी फीचर्स आणि देखभालीचा खर्च यांसारख्या काही महत्त्वाच्या गोष्टी नक्कीच लक्षात घ्यायला हव्यात.
बाईक कशासाठी वापरणार आहात?
बाईक घेण्यापूर्वी स्वतःला पहिला प्रश्न विचारा की, तुम्ही ती नक्की कशासाठी वापरणार आहात? जर तुम्हाला रोज शहरातल्या शहरात कमी अंतरासाठी बाईक हवी असेल, तर कमी सीसीचं इंजिन आणि चांगलं मायलेज देणारं मॉडेल तुमच्यासाठी बेस्ट ठरेल. पण जर तुमचं ध्येय लाँग डिस्टन्स टूर किंवा ॲडव्हेंचर रायडिंग असेल, तर तुम्ही क्रूझर, स्पोर्ट्स किंवा ॲडव्हेंचर बाईकसारखे दमदार मॉडेल्स पाहू शकता.
Related Articles
फक्त किंमत नाही, एकूण खर्च तपासा
बाईकचं बजेट ठरवताना फक्त एक्स-शोरूम किंमत बघू नका. रजिस्ट्रेशन, इन्शुरन्स, रोड टॅक्स मिळून जी ऑन-रोड किंमत होते, तीच खरी किंमत असते. यासोबतच सर्व्हिसिंग, पेट्रोलचा खर्च, पार्ट्सची किंमत यांसारखे दीर्घकालीन खर्चही हिशोबात धरणं चांगलं. यामुळे बाईक घेतल्यानंतर अचानक आर्थिक ताण येणार नाही.
इंजिन आणि मायलेज सर्वात महत्त्वाचे
बाईकचा परफॉर्मन्स बऱ्याच अंशी इंजिनवर अवलंबून असतो. साधारणपणे, शहरातल्या रस्त्यांवर रोजच्या वापरासाठी १०० ते १५० सीसीची बाईक पुरेशी आहे. पण हायवेवर जास्त प्रवास असेल किंवा थोडी जास्त पॉवर हवी असेल, तर २०० सीसी किंवा त्याहून अधिक इंजिन असलेली बाईक पाहू शकता. पेट्रोलचे दर पाहता, चांगलं मायलेज देणारं मॉडेल निवडणं हे हुशारीचं काम आहे.
आराम आणि सुरक्षा सगळ्यात आधी
बाईक घेण्यापूर्वी सीटची उंची, हँडलबारची पोझिशन आणि तुमची बसण्याची पद्धत योग्य आहे की नाही, हे तपासा. शक्य असल्यास, शोरूममधून डिलिव्हरी घेण्यापूर्वी एक टेस्ट राइड नक्की घ्या. सुरक्षेसाठी ABS (ॲन्टि-लॉक ब्रेकिंग सिस्टीम), डिस्क ब्रेक, चांगल्या दर्जाचे टायर आणि प्रखर हेडलाइट आहे की नाही, हे जाणून घ्या. आपत्कालीन परिस्थितीत हे फीचर्स तुमचा जीव वाचवू शकतात.
सर्व्हिस सेंटर आणि रिसेल व्हॅल्यू पाहा
अशा ब्रँडची बाईक घ्यावी, ज्याचं सर्व्हिस सेंटर तुमच्या घराच्या जवळ असेल. पार्ट्स सहज मिळतात की नाही, हाही एक मोठा मुद्दा आहे. सहसा, लोकप्रिय ब्रँडच्या लोकप्रिय मॉडेल्सना रिसेल व्हॅल्यू किंवा जुन्या बाईकची किंमत चांगली मिळते. भविष्यात बाईक बदलताना याचा तुम्हाला आर्थिक फायदा होईल.
कर्ज घेणार असाल तर तुलना करायला विसरू नका
जर तुम्ही बाईक घेण्यासाठी कर्ज घेण्याचा विचार करत असाल, तर कोणत्याही एका बँकेची ऑफर बघून लगेच होकार देऊ नका. वेगवेगळ्या बँका आणि फायनान्स कंपन्यांचे व्याजदर, प्रोसेसिंग फी, मासिक हप्ता (EMI) आणि इतर अटींची नीट तुलना करा. योग्य कर्ज निवडल्यास तुम्ही एकूण खर्चावर बरेच पैसे वाचवू शकता.
वॉरंटी आणि इन्शुरन्सही महत्त्वाचे
बाईक घेताना कंपनी काही विशेष ऑफर देत आहे का, याकडेही लक्ष ठेवा. अनेकदा सणासुदीच्या काळात कॅश डिस्काउंट, फ्री ॲक्सेसरीज किंवा अतिरिक्त वॉरंटीसारखे फायदे मिळतात. यासोबतच, एक चांगली इन्शुरन्स पॉलिसी असणं खूप गरजेचं आहे. अपघात, चोरी किंवा नैसर्गिक आपत्तीसारख्या परिस्थितीत योग्य इन्शुरन्स तुमचं आर्थिक नुकसान बरंच कमी करेल. त्यामुळे फक्त किंमत न पाहता, वापर, खर्च, सुरक्षा आणि देखभाल या सर्व बाबी तपासूनच तुमची पहिली बाईक निवडा.
