Car market : टोयोटा किर्लोस्कर मोटर लवकरच आपली नवीन इलेक्ट्रिक कार अर्बन क्रूझर EV लाँच करणार आहे. मारुती सुझुकी eVitara चे हे रिबॅज केलेले मॉडेल 500 किलोमीटरपेक्षा जास्त रेंज आणि आकर्षक फीचर्ससह येईल. जाणून घ्या अधिक माहिती -
Car market : भारतीय ऑटोमोबाइल इंडस्ट्री विस्तारत आहे. भारतात मोटारींना फार मोठी मागणी तर आहेच, पण या कंपन्याच्या निर्यातीतही लक्षणीय वाढ झाली आहे. त्यामुळे बड्या कंपन्यांमध्ये स्पर्धा वाढली आहे. भारतीय एसयूव्ही बाजारपेठ काबीज करण्याचा प्रयत्न या कंपन्यांचा आहे. त्याचबरोबर इलेक्ट्रिक मोटारीचे मार्केटही वाढले आहे. त्यामुळे सर्वच बड्या कंपन्यांनी त्यावरही लक्ष केंद्रीत केले आहे. त्यामुळे ग्राहकांच्या दृष्टीने आरामदायी आणि सोयीसुविधा अससेले मॉडेल बाजारात आणली जात आहेत.
टोयोटा किर्लोस्कर मोटर (TKM) आपली इलेक्ट्रिक कार अर्बन क्रूझर EV लाँच करण्याच्या तयारीत आहे. हे मॉडेल मारुती सुझुकी eVitara चे रिबॅज व्हर्जन आहे. तरीही, यात काही कॉस्मेटिक बदल दिसतील. 2025 च्या भारत मोबिलिटी शोमध्ये टोयोटा अर्बन क्रूझर तिच्या प्रोडक्शन-रेडी स्वरूपात प्रदर्शित करण्यात आली होती. अंतिम मॉडेल या शोमध्ये दाखवलेल्या एडिशनसारखेच असेल.
अधिकृत टीझरमध्ये LED DRLs सह स्लिम हेडलॅम्प, एक वेगळे बोनेट आणि मध्यभागी टोयोटाचा सिग्नेचर बॅज ठळकपणे दिसतो. इतर लक्षणीय घटकांमध्ये BEV बॅज आणि फ्रंट फेंडरवर चार्जिंग पोर्टचा समावेश आहे. मापांबद्दल बोलायचे झाल्यास, अर्बन क्रूझर EV ही eVitara सारखीच असेल, तिची लांबी 4275 मिमी, रुंदी 1800 मिमी, उंची 1640 मिमी आणि व्हीलबेस 2700 मिमी असेल.
Related Articles
अपेक्षित वैशिष्ट्ये
आगामी टोयोटा अर्बन क्रूझर EV च्या इंटीरियरबद्दलची माहिती अद्याप गुप्त ठेवण्यात आली आहे. तथापि, ही इलेक्ट्रिक एसयूव्ही eVitara सोबत केबिन लेआउट आणि वैशिष्ट्ये शेअर करण्याची शक्यता आहे. म्हणजेच, यात 10.1-इंचाची टचस्क्रीन इन्फोटेनमेंट सिस्टम, 10.25-इंचाचा डिजिटल ड्रायव्हर डिस्प्ले, 10-वे इलेक्ट्रिकली ॲडजस्टेबल ड्रायव्हर सीट, इन्फिनिटी साउंड सिस्टम, वायरलेस फोन चार्जर, ग्लास रूफ, लेव्हल 2 ADAS, स्टँडर्ड म्हणून 7 एअरबॅग्ज, फ्रंट आणि रिअर पार्किंग सेन्सर्स, ब्लाइंड-स्पॉट मॉनिटरसह 360-डिग्री कॅमेरा, ऑटो होल्डसह इलेक्ट्रॉनिक पार्किंग ब्रेक आणि बरेच काही अपेक्षित आहे.
बॅटरी पर्याय आणि रेंज
या गाडीतील पॉवरट्रेन सेटअप मारुती eVitara मधून घेतला आहे, जो 49kWh आणि 61kWh बॅटरी पॅक पर्यायांसह येतो. दोन्ही बॅटरी पॅक फ्रंट-एक्सल-माउंटेड मोटरशी जोडलेले आहेत, जे अनुक्रमे 144bhp आणि 174bhp पॉवर देतात. eVitara पूर्ण चार्जवर 543 किमी ड्रायव्हिंग रेंज देईल असा दावा केला जातो. मोठ्या बॅटरी पॅकसह अर्बन क्रूझर EV 500 किलोमीटरपेक्षा जास्त रेंज देईल अशी अपेक्षा आहे.
स्पर्धक आणि किंमत
लाँच झाल्यावर, टोयोटा अर्बन क्रूझर EV महिंद्रा बीई 6, ह्युंदाई क्रेटा इलेक्ट्रिक, MG ZS EV आणि आगामी टाटा सिएरा EV यांच्याशी स्पर्धा करेल. या गाडीच्या एंट्री-लेव्हल व्हेरिएंटची किंमत सुमारे 16 लाख ते 17 लाख रुपयांपासून सुरू होण्याची शक्यता आहे.
