Bike Market: लाँग राईड करायचीय? 3 लाखांपेक्षा कमी किमतीच्या टॉप 6 क्रूझर बाईक्स!
Bike Market: भारतात क्रूझर बाईक्सची मागणी दिवसेंदिवस वाढत आहे. जर तुम्ही 3 लाखांच्या बजेटमध्ये एक दमदार क्रूझर बाईक शोधत असाल, तर ही यादी खास तुमच्यासाठी आहे. चला पाहूया या बजेटमधील टॉप 6 बाईक्स.
भारतात क्रूझर बाईक्सची वाढती क्रेझ
सध्या भारतात क्रूझर बाईक्सची क्रेझ वाढली आहे. विशेषतः तरुणांमध्ये या बाईक्स खूप लोकप्रिय होत आहेत. आरामदायक सीट, कमी उंची, रिलॅक्स रायडिंग पोझिशन आणि लांबच्या प्रवासासाठी उत्तम असल्यामुळे या बाईक्स अनेकांची पहिली पसंती ठरत आहेत. जर तुम्ही 3 लाखांच्या बजेटमध्ये एक चांगली क्रूझर बाईक घेण्याचा विचार करत असाल, तर हे 6 पर्याय तुमच्यासाठी बेस्ट आहेत.
रॉयल एनफील्ड मेटिओर 350
या यादीत पहिलं नाव आहे रॉयल एनफील्ड मेटिओर 350 चं. यात 349cc क्षमतेचं एअर-ऑइल कूल्ड J-सिरीज इंजिन आहे, जे 20.2 bhp पॉवर आणि 27 Nm टॉर्क जनरेट करतं. आरामदायक सीट, पुढे आलेले फूटपेग्स आणि रिलॅक्स हँडलबारमुळे लांबचा प्रवास सुखकर होतो. याच्या टॉप व्हेरिएंटमध्ये फॅक्टरी-फिटेड बॅकरेस्टही मिळतो. ही बाईक हायवेवर ताशी 90-100 किमी वेगाने अगदी सहज धावते. याची एक्स-शोरूम किंमत 1.99 लाख रुपयांपासून सुरू होते.
बजाज अॅव्हेंजर क्रूझ 220
या बाईकमध्ये 220cc क्षमतेचं ऑइल-कूल्ड DTS-i इंजिन आहे. हे इंजिन 18.7 bhp पॉवर आणि 17.5 Nm टॉर्क निर्माण करतं. फक्त 737 मिमी सीटची उंची, रुंद हँडलबार आणि पुढच्या बाजूला लांब विंडशील्ड यामुळे ही बाईक लक्ष वेधून घेते. कमी बजेटमध्ये अस्सल क्रूझर बाईकचा लूक आणि बजाजचं देशव्यापी सर्व्हिस नेटवर्क यामुळे या मॉडेलच्या देखभालीचा खर्चही खूप कमी आहे. याची एक्स-शोरूम किंमत 1.30 लाख रुपयांपासून सुरू होते.
जावा पेराक
जावा पेराक मॉडेलमध्ये 334cc क्षमतेचं लिक्विड-कूल्ड सिंगल-सिलेंडर इंजिन आहे. हे इंजिन 29.5bhp पॉवर आणि 32.7 Nm टॉर्क जनरेट करतं. 750 मिमी उंचीची सिंगल-फ्लोटिंग टॅन लेदर सीट आणि ड्युअल एक्झॉस्टमुळे या बाईकला एक खास रेट्रो-स्टेल्थ कस्टम लूक मिळतो. याची एक्स-शोरूम किंमत 2.20 लाख रुपयांपासून सुरू होते.
येझदी रोडस्टर (Yezdi Roadster)
या बाईकमध्ये 334cc क्षमतेचं लिक्विड-कूल्ड इंजिन आहे. पुढच्या बाजूला असलेले फूटपेग्स, कमी उंचीची सीट आणि मस्क्युलर डिझाइनसोबतच यात बार-एंड मिररही देण्यात आले आहेत. याची एक्स-शोरूम किंमत 1.97 लाख रुपयांपासून सुरू होते.
हार्ले-डेव्हिडसन X440
हार्ले-डेव्हिडसन X440 (Harley-Davidson X440) यामध्ये शक्तिशाली 440cc क्षमतेचं एअर-ऑइल कूल्ड इंजिन आहे. हे इंजिन 27 bhp पॉवर आणि 38 Nm टॉर्क निर्माण करतं. ही बाईक उत्तम लो-एंड परफॉर्मन्स देते. याची एक्स-शोरूम किंमत 2.59 लाख रुपयांपासून सुरू होते. कीवे के-लाइट 250V (Keeway K-Light 250V) या बाईकमध्ये 249cc क्षमतेचं एअर-कूल्ड V-ट्विन इंजिन आहे. हे इंजिन 18.7 bhp पॉवर आणि 19 Nm टॉर्क निर्माण करतं. रुंद फूट कंट्रोल आणि मस्क्युलर बॉडीवर्क ही या मॉडेलची वैशिष्ट्ये आहेत. याची एक्स-शोरूम किंमत 2.50 लाख रुपयांपासून सुरू होते.
