कॅन्सर हा गंभीर आजार असला तरी, रोजच्या जगण्यात थोडे बदल करून आपण त्याचा धोका नक्कीच कमी करू शकतो. वजन आटोक्यात ठेवणं, ताणतणाव कमी करणं, पुरेशी झोप, योग्य आहार, नियमित व्यायाम आणि लसीकरण या ६ सोप्या सवयींमुळे कॅन्सरला दूर ठेवता येतं.

शरीरात पेशींची अनैसर्गिक वाढ होणं आणि त्या इतर अवयवांमध्ये पसरणं म्हणजे कॅन्सर. पण, आपण आपल्या रोजच्या जीवनशैलीत काही छोटे बदल केले, तर या जीवघेण्या आजाराला सहज दूर ठेवता येतं.

कॅन्सरचा धोका कमी करणाऱ्या ६ सोप्या सवयी

शरीरातील काही पेशी जेव्हा अनियंत्रितपणे वाढतात आणि इतर भागांत पसरतात, तेव्हा त्याला आपण कॅन्सर म्हणतो. पण, आपल्या रोजच्या जगण्यात थोडे बदल केले तर कॅन्सरचा धोका बऱ्याच अंशी कमी करता येतो. कॅन्सरला प्रतिबंध करणाऱ्या या ६ सवयींबद्दल आपण जाणून घेऊया.

वजन आटोक्यात ठेवा

तुमचं वजन नेहमी योग्य असायला हवं. अंगावरची अतिरिक्त चरबी कमी करा. कारण, वजन वाढल्यामुळे शरीरातील इन्सुलिन आणि इस्ट्रोजेनची पातळी बदलते. यामुळे कॅन्सरच्या पेशी वेगाने पसरण्याचा धोका वाढतो.

ताणतणाव कमी करा

मानसिक ताण किंवा स्ट्रेस नियंत्रणात ठेवणं खूप गरजेचं आहे. शरीराची रोगप्रतिकारक शक्ती वाढवण्यासाठी रोज न चुकता ध्यान, श्वासोच्छवासाचे व्यायाम आणि योगासने करा.

कॅन्सर प्रतिबंधक लस

काही विशिष्ट प्रकारचे कॅन्सर रोखण्यासाठी लसीकरण खूप फायदेशीर ठरतं. उदाहरणार्थ, सर्व्हायकल कॅन्सर (cervical cancer) टाळण्यासाठी एचपीव्ही (HPV) लस आणि लिव्हर कॅन्सर (liver cancer) रोखण्यासाठी हेपेटायटीस बी (Hepatitis B) ची लस तुम्ही घेऊ शकता.

रोज ७ ते ८ तासांची झोप

रोज रात्री किमान ७ ते ८ तास शांत झोप घेणं आवश्यक आहे. दीर्घकाळ झोप न लागणं किंवा इन्सोम्नियामुळे कॅन्सरचा धोका वाढतो. झोपेचा आणि कॅन्सरचा थेट संबंध आहे. त्यामुळे झोप पूर्ण झाली नाही तर कॅन्सरची शक्यता बळावते.

आरोग्यदायी आहार

तुमच्या रोजच्या आहारात भरपूर फळे, पालेभाज्या, डाळी आणि फॅट-फ्री प्रोटीनचा समावेश करा. प्रोसेस्ड फूड, रेड मीट (red meat) आणि जास्त गोड पेये पिणं टाळा. रोज सकस आणि संतुलित आहार घेतल्यास वजनही नियंत्रणात राहतं आणि इतर आजारही जवळपास फिरकत नाहीत.

आठवड्यातून किमान १५० मिनिटे व्यायाम

आठवड्यातून किमान १५० मिनिटे हलका व्यायाम (जसे की वेगात चालणे किंवा सायकल चालवणे) किंवा ७५ मिनिटे हेवी वर्कआऊट करायला हवा. यामुळे शरीरातील हार्मोन्सचे संतुलन राखले जाते आणि सूज किंवा इन्फ्लेमेशन कमी होते.