उन्हाळ्यात बागेत पडलेली सुकी पानं कचरा समजून जाळू नका. या पानांपासून तुम्ही घरच्या घरी उत्तम सेंद्रिय खत बनवू शकता, तण काढू शकता आणि झाडांना थंडीपासून वाचवू शकता. जाणून घ्या या 'ब्राऊन गोल्ड'चे फायदे.
उन्हाळा आला की बाग सुक्या पानांनी भरून जाते. अनेक जण बाग स्वच्छ करण्यासाठी ही पानं सरळ जाळून टाकतात. पण तुम्हाला माहित आहे का, ही सुकी पानं कचरा नसून तुमच्या बागेसाठी एक खजिना आहेत. यांचा पुन्हा वापर करून तुम्ही बागकामातले अनेक खर्च वाचवू शकता. चला, जाणून घेऊया सुक्या पानांचा वापर कसा करायचा.
सुक्या पानांपासून बनवा खत
जंगलात साफसफाई करायला कोणी नसतं, तरीही तिथली माती नेहमी सुपीक असते. याचं कारण म्हणजे, दरवर्षी झाडांवरून पडणारी पानं मातीत मिसळून तिला पोषण देतात. हीच पद्धत आपण आपल्या बागेत आणि शेतातही वापरू शकतो. पानं मातीत कुजल्यावर बुरशी आणि जिवाणू (fungus-bacteria) त्यांचं विघटन करतात. यामुळे मातीचा पोत सुधारतो आणि झाडांची मुळं मजबूत होतात. पानांपासून कंपोस्ट खत बनवणं खूप सोपं आहे. यासाठी सुकी पानं, वाळलेली रोपं आणि स्वयंपाकघरातील ओला कचरा एकत्र करून झाडांच्या मुळाशी घाला. काही महिन्यांतच याचं उत्तम खत तयार होईल आणि तुमची झाडं हिरवीगार दिसतील.
Related Articles
सुकी पानं आहेत निसर्गाचे मित्र
निसर्ग जितका स्वच्छ राहील, तितकं आपलं आयुष्य सोपं होईल. थंडी असो वा उन्हाळा, फुलपाखरं आणि मधमाश्यांसारखे अनेक कीटक सुक्या फांद्यांमध्ये आणि पालापाचोळ्यात आपलं घर बनवतात. त्यामुळे बागेच्या एखाद्या कोपऱ्यात तुम्ही ही पानं तशीच सोडून देऊ शकता.
फांद्यांपासून बनवा घर
जिथे झाडं-झुडपं असतात, तिथे पक्षी येणारच. उन्हाळ्यात पक्षी खाणं आणि पाण्याच्या शोधात दूरवर फिरतात. तुम्ही सुक्या पानांच्या आणि फांद्यांच्या ढिगाऱ्यातून त्यांच्यासाठी एक छोटं घर तयार करू शकता. हे घर लहान प्राणी आणि पक्ष्यांसाठी एक सुरक्षित जागा बनेल.
तण कसं काढायचं?
जेव्हा एखाद्या जमिनीत पाणी किंवा खताशिवाय अनावश्यक झाडं उगवतात, तेव्हा त्याला 'तण' म्हणतात. हे तण काढणं सोपं नसतं, पण सुकी पानं तुमचं काम सोपं करतील. यासाठी 'शीट मल्चिंग' (Sheet Mulching) नावाचं तंत्र वापरा. जमिनीवर एक पुठ्ठा (cardboard) अंथरा. त्यावर सुकी पानं आणि खत टाकून तसंच सोडून द्या. काही दिवसांतच तिथलं अनावश्यक गवत आपोआप नाहीसं होईल.
थंडीपासून बचावासाठी वापर
हिवाळ्यात तापमान कमी झाल्यामुळे झाडांना थंडी लागते आणि ती खराब होतात. अशावेळी तुम्ही वाळलेली पानं साठवून ठेवू शकता. ही पानं थंडीत कोबी, पालक यांसारख्या पिकांना सुरक्षित ठेवतात. इतकंच नाही, तर गाजर, बीट यांसारख्या जमिनीत वाढणाऱ्या भाज्यांनाही खराब होण्यापासून वाचवतात.
थोडक्यात काय, तर झाडांवरून गळून पडलेल्या फांद्या आणि सुकी पानं निरुपयोगी नसून बागेसाठी एक नैसर्गिक वरदान आहेत. यांचा योग्य वापर केल्यास तुमची माती तर सुपीक होईलच, पण कमी पैशात झाडंही निरोगी राहतील.
