घरातला एखादा रिकामा कोपरा आता रिकामा राहणार नाही. थोडी क्रिएटिव्हिटी आणि काही सोप्या आयडिया वापरून तुम्ही तुमच्या घराचा प्रत्येक कोपरा सुंदर बनवू शकता.
आपल्या घरात प्रत्येक जागेला महत्त्व असतं, पण अनेकदा खोलीतला एखादा कोपरा रिकामाच राहतो. तिथे ना धड फर्निचर ठेवता येतं, ना सजावट करता येते. हाच रिकामा कोपरा घराचं सौंदर्य कमी करतो. पण तुम्ही ठरवलं तर याच कोपऱ्याला घरातला सगळ्यात आकर्षक स्पॉट बनवू शकता. यासाठी खाली दिलेल्या ५ आयडिया नक्की तुमच्या कामी येतील.
ग्रीन प्लांट कॉर्नर देईल नॅचरल आणि पॉझिटिव्ह फिल
रिकाम्या कोपऱ्याला सजवण्याचा सगळ्यात सोपा आणि बजेटमधला मार्ग म्हणजे तिथे इनडोअर प्लांट्स ठेवणं. तुम्ही एक मोठं झाड (जसं की अरेका पाम किंवा रबर प्लांट) जमिनीवर ठेवा आणि त्याच्या बाजूला वेगवेगळ्या उंचीच्या स्टँडवर १-२ छोटी झाडं ठेवा. सोबतच, भिंतीवर मॅक्रेम प्लांट हँगर किंवा वॉल शेल्फ लावू शकता. जर कोपऱ्यात अंधार असेल, तर स्नेक प्लांट किंवा जीजी प्लांटसारखी कमी प्रकाशात वाढणारी झाडं निवडा. हा कोपरा केवळ सुंदर दिसणार नाही, तर घरात ताजेपणा आणि सकारात्मक ऊर्जाही आणेल.
Related Articles
रीडिंग किंवा रिलॅक्स कॉर्नर बनेल 'मी-टाइम' स्पेस
तुमच्या बेडरूम किंवा लिव्हिंग रूममध्ये एखादा कोपरा रिकामा असेल, तर त्याला एक छोटासा 'रीडिंग कॉर्नर' बनवा. इथे तुम्ही एक आरामदायी खुर्ची किंवा बीन बॅग, मऊ कुशन, एक फ्लोअर लॅम्प आणि एक छोटं साईड टेबल ठेवू शकता. भिंतीवर एक छोटं शेल्फ लावून त्यावर तुमची आवडती पुस्तकंही ठेवता येतात. संध्याकाळचा चहा, पुस्तक वाचन आणि निवांत वेळेसाठी हा कोपरा परफेक्ट आहे.
कॉर्नर शेल्फ आणि डेकोर पीसने लहान जागेत मोठा स्टाइल
घराच्या कोपऱ्यात L-शेप किंवा त्रिकोणी कॉर्नर शेल्फ लावून तुम्ही त्या जागेचा स्मार्ट वापर करू शकता. वरच्या शेल्फवर एक छोटं रोप, मधल्या शेल्फवर फोटो फ्रेम आणि खालच्या शेल्फवर सुगंधी मेणबत्ती किंवा छोटा शोपीस ठेवा. पण लक्षात ठेवा की खूप जास्त सामान ठेवू नका. कमीत कमी वस्तूंनी केलेली सजावट जास्त आकर्षक दिसते. विशेषतः लहान घरांसाठी ही आयडिया खूप उपयोगी आहे.
आरसा आणि लाईट डेकोरमुळे लहान घर दिसेल मोठं
जर तुमची खोली लहान असेल, तर कोपऱ्यात एक लांब स्टँडिंग आरसा ठेवा. आरसा लावल्यामुळे खोली मोठी दिसते आणि घरातला प्रकाश सगळीकडे पसरतो. यामुळे अंधार असलेला कोपराही उजळ दिसतो. तुम्ही आरशासोबत फेरी लाईट्स किंवा छोटा फ्लोअर लॅम्पही ठेवू शकता. हा कोपरा इन्स्टाग्रामवर फोटो काढण्यासाठीही एक परफेक्ट स्पॉट बनेल.
मिनी मंदिर किंवा आर्ट कॉर्नरने मिळेल क्लासी लुक
तुमच्या घरात पूजेसाठी वेगळी जागा नसेल, तर रिकाम्या कोपऱ्यात एक छोटंसं देवघर बनवू शकता. देवघरासाठी तुम्ही छोटं वॉल शेल्फ, पितळेचा दिवा, ताजी फुलं आणि मंद प्रकाश देणारी लाईट वापरू शकता. जर तुम्हाला देवघर नको असेल, तर तुम्ही त्या कोपऱ्याला 'आर्ट कॉर्नर' बनवू शकता. यासाठी एक मोठं पेंटिंग, त्याखाली एक कन्सोल टेबल आणि बाजूला एक स्टायलिश लॅम्प ठेवा. हा कोपरा तुमच्या घराला एक क्लासी आणि डिझायनर लुक देईल.
