आजकालच्या महागाईच्या काळात चांगला पगार मिळवण्यासोबतच लवकर निवृत्त होण्याचं स्वप्न अनेकजण पाहतात. अशाच एका २८ वर्षांच्या तरुणाने वयाच्या ४२ व्या वर्षी ५ कोटी रुपये जमवून निवृत्त होता येईल का, असा प्रश्न ChatGPT ला विचारला. त्यावर एआयने दिलेलं उत्तर नक्की वाचा.
मुंबई : आजकालच्या महागाईच्या काळात नुसता चांगला पगार असून भागत नाही, तर भविष्यासाठी भरपूर पैसे साठवून लवकर निवृत्त (Retire) होण्याकडे अनेकांचा कल असतो. पण महिन्याला ७० हजार रुपये पगार असणारा माणूस वयाच्या ४२ व्या वर्षी ५ कोटी रुपये जमवून नोकरीतून निवृत्त होऊ शकतो का? या प्रश्नाचं उत्तर शोधण्यासाठी एका तरुणाने चक्क ChatGPT ची मदत घेतली. निवृत्तीचं हे टार्गेट पूर्ण करण्यासाठी किती वेळ लागेल, याचं अचूक गणित या आर्टिफिशियल इंटेलिजन्सने (AI) मांडलं आहे.
हा २८ वर्षांचा तरुण नोएडामध्ये राहतो. त्याने स्वतःचा पगार, महिन्याचा खर्च आणि भविष्यात वाढणारा पगार या गोष्टींचा आधार घेत ChatGPT ला एक इन्व्हेस्टमेंट प्लॅन बनवायला सांगितला.
७० हजार पगारात महिन्याला किती बचत होते?
Related Articles
या तरुणाच्या हातात महिन्याला ७० हजार रुपये पगार येतो. त्यातून १४ हजार रुपये घरभाड्यावर खर्च होतात. बाकीचे खर्च पकडून महिन्याचा एकूण खर्च ४५ हजार रुपयांवर जातो.
म्हणजेच, महिन्याशेवटी गुंतवणुकीसाठी त्याच्याकडे २५ हजार रुपये उरतात.
मासिक पगार: ७०,००० रुपये
घरभाडे: १४,००० रुपये
एकूण मासिक खर्च: ४५,००० रुपये
गुंतवणुकीसाठी उरणारी रक्कम: २५,००० रुपये
पगारातून उरणारे हे २५ हजार रुपये सिस्टिमॅटिक इन्व्हेस्टमेंट प्लॅन (SIP) मध्ये गुंतवून, १४ वर्षांत ५ कोटी रुपये जमवण्याचं त्याचं ध्येय आहे.
ChatGPT ने वापरलेले ३ महत्त्वाचे मुद्दे
या रिटायरमेंट प्लॅनसाठी तीन महत्त्वाचे अंदाज गृहीत धरण्यात आले आहेत.
१. पगारवाढ: दरवर्षी पगार १० टक्क्यांनी वाढेल.
२. SIP मध्ये वाढ: दरवर्षी गुंतवणुकीची रक्कम १० टक्क्यांनी वाढवली जाईल (Step-up SIP).
३. गुंतवणुकीवरील परतावा: दरवर्षी १५ टक्के रिटर्न मिळेल.
या अंदाजानुसार, सुरुवातीला २५ हजार रुपये असलेली मासिक SIP १४ व्या वर्षापर्यंत जवळपास ८६,३०७ रुपयांवर पोहोचेल. याच काळात त्या तरुणाचा पगारही बऱ्यापैकी वाढलेला असेल.
पण इथे एक गोष्ट लक्षात ठेवली पाहिजे की, १० टक्के पगारवाढ आणि १५ टक्के रिटर्न नेहमीच फिक्स नसतात. शेअर बाजारावर आधारित गुंतवणुकीत परतावा कमी-जास्त होऊ शकतो.
वयाच्या ४२ व्या वर्षी ५ कोटी जमवणं शक्य आहे का?
हाच या गणितातला सर्वात महत्त्वाचा प्रश्न आहे. २८ व्या वर्षापासून गुंतवणूक सुरू करून, दरवर्षी SIP ची रक्कम १० टक्क्यांनी वाढवली, तरी ChatGPT च्या गणितानुसार ४२ व्या वर्षापर्यंत त्याच्याकडे सुमारे २.१० कोटी रुपयेच जमा होतील.
या २.१० कोटी रुपयांमध्ये तरुणाची स्वतःची गुंतवणूक सुमारे ८३.९२ लाख रुपये असेल. तर उरलेले १.२६ कोटी रुपये हा गुंतवणुकीवर मिळालेला परतावा (Return) असेल. हे गणित सतत गुंतवणूक आणि ठराविक परताव्याच्या अंदाजावर आधारित आहे. त्यामुळे याच प्लॅननुसार पुढे गेल्यास ४२ व्या वर्षी ५ कोटींचं टार्गेट गाठणं कठीण आहे. यासाठी एकतर गुंतवणुकीची रक्कम वाढवावी लागेल, उत्पन्नाचे इतर मार्ग शोधावे लागतील किंवा निवृत्तीचं वय थोडं पुढे ढकलावं लागेल.
मग ५ कोटी जमवायला किती वर्षे लागतील?
या रिपोर्टमधील गणितानुसार, सुरुवातीची २५ हजार रुपयांची SIP दरवर्षी १० टक्क्यांनी वाढवली आणि त्यावर सलग १५ टक्के वार्षिक परतावा मिळाला, तर ५ कोटींचं टार्गेट गाठायला सुमारे १८ वर्षे १० महिने लागतील. म्हणजेच, २८ व्या वर्षी गुंतवणूक सुरू केली, तर वयाच्या ४७ व्या वर्षी ५ कोटींचं ध्येय पूर्ण होऊ शकतं. हे त्याने ठरवलेल्या ४२ वर्षांच्या वयापेक्षा ५ वर्षे उशिरा आहे.
पण लक्षात ठेवा, १५ टक्के रिटर्न हा फक्त गणितासाठी धरलेला अंदाज आहे. तो फिक्स परतावा मानू नये. खऱ्या मार्केटमधील परिस्थितीनुसार हा आकडा कमी किंवा जास्त असू शकतो.
