वेस्ट इंडिजविरुद्धच्या तिसऱ्या टी-२० सामन्यात तिलक वर्मा आणि अक्षर पटेल यांच्यात झालेल्या विचित्र रन-आऊटची सध्या जोरदार चर्चा आहे. यावर आता टीम इंडियाचा उपकर्णधार तिलक वर्माने मौन सोडलं आहे. बाउंड्री लाईनवर असलेल्या जाहिरातींच्या बोर्डवरील फ्लॅशमुळे आपला गोंधळ उडाला आणि चेंडू सीमारेषेपार गेल्याचं वाटल्याने आपण थांबलो, असा खुलासा त्याने केला आहे.
टीम इंडियाचा उपकर्णधार तिलक वर्माने रविवारी, ११ ऑक्टोबरला इंदूरच्या होळकर स्टेडियमवर झालेल्या एका विचित्र रन-आऊटवर आता मौन सोडलं आहे. भारतीय संघाने वेस्ट इंडिजविरुद्धचा हा तिसरा टी-२० सामना १४ धावांनी जिंकला. पण या विजयापेक्षा तिलक वर्मा आणि अक्षर पटेल यांच्यात झालेल्या त्या गोंधळाचीच जास्त चर्चा झाली.
भारतीय संघाने या सामन्यात २२३ धावांचा डोंगर उभा केला. पण १७ व्या षटकात एक भन्नाट प्रकार घडला. गुडाकेश मोती गोलंदाजी करत होता आणि अक्षर पटेल स्ट्राईकवर होता. अक्षरने एका लो फुल-टॉस चेंडूवर डीप बॅकवर्ड स्क्वेअर लेगच्या दिशेने फटका मारला. चेंडू बाउंड्री लाईनच्या बाहेर गेला असं वाटल्याने दोन्ही फलंदाज खेळपट्टीच्या मधोमध थांबले.
पण तिथे उभ्या असलेल्या कामिल पूरनने हवेत झेप घेत अप्रतिम क्षेत्ररक्षण केलं आणि चेंडू सीमारेषेच्या आत ढकलला. अक्षर पटेल आणि तिलक वर्मा यांना मात्र चेंडू बाउंड्री लाईनला लागलाय आणि डेड झालाय, असंच वाटत होतं.
मैदानातून चेंडू वेगाने परत आल्यावर अक्षर पटेलच्या लक्षात धोका आला. त्याने लगेच धाव घेत आपली क्रीज गाठली. पण तिलक वर्माला काहीच समजलं नाही. विकेटकीपर शाई होपने चेंडू गुडाकेश मोतीकडे फेकला आणि त्याने शांतपणे बेल्स उडवत तिलक वर्माला रन-आऊट केलं. हा प्रकार पाहून संपूर्ण स्टेडियम अवाक् झालं होतं.
हे पण वाचा: 'टीम फर्स्ट' अप्रोचवर तिलक वर्माची प्रतिक्रिया, मिडल-ऑर्डरची भूमिका स्वीकारली
विचित्र रन-आऊटवर तिलक वर्मा काय म्हणाला?
तिलक वर्माने हैदराबादमध्ये होणाऱ्या चौथ्या टी-२० सामन्यापूर्वी या व्हायरल रन-आऊटवर भाष्य केलं. जाहिरातींच्या बोर्डवर अचानक चमकलेल्या फ्लॅशमुळे आपला गोंधळ उडाला आणि आपण मध्येच थांबलो, असं त्याने सांगितलं.
"मला वैयक्तिकरित्या असं वाटलं की बाउंड्री लाईनच्या अगदी बाहेर जे होर्डिंग्ज आहेत, त्यावर अचानक एक फ्लॅश चमकला. तो फ्लॅश पाहिल्यावर मला वाटलं की क्षेत्ररक्षकाचा होर्डिंगला स्पर्श झालाय आणि तो आत आलाय," असं तिलक पत्रकार परिषदेत म्हणाला.
"अक्षरलाही तसंच वाटलं. म्हणूनच आम्ही दोघेही एकाच वेळी थांबलो. असं नव्हतं की मी आधी थांबलो किंवा तो आधी थांबला. मला वाटतं दोघांचाही तोच समज झाला. चेंडू बाउंड्री पार गेलाय असं वाटल्याने आम्ही थांबलो."
"पण दुर्दैवाने अक्षरने मागे वळून चेंडू पाहिला. मी नॉन-स्ट्राईकर एंडला असल्याने माझी पाठ चेंडूकडे होती, त्यामुळे मला तो दिसला नाही," असंही त्याने पुढे सांगितलं.
या सामन्यात तिलक वर्माने १६ चेंडूत २८ धावा केल्या. पण या मजेशीर गैरसमजामुळे तो ज्या प्रकारे आऊट झाला, त्याची क्रिकेट विश्वात आणि सोशल मीडियावर जोरदार चर्चा रंगली.
'अक्षरला वाटलं चौकार गेलाय'
या विचित्र रन-आऊटबद्दल अधिक बोलताना तिलक वर्माने स्पष्ट केलं की, कामिल पूरनने ज्या प्रकारे चेंडू अडवला, तो पाहून दोघांनाही तो चौकारच वाटला होता.
जर अक्षरने मला ओरडून सांगितलं असतं, तर मी नक्कीच धावलो असतो, असंही तो हसत हसत म्हणाला.
"मला एवढंच सांगायचंय की जर कोणी अक्षरला ओरडून सांगितलं असतं... आमचे सहकारी डगआऊटमधून 'गो, गो, गो!' असं ओरडत होते. पण अक्षरलाही काहीच माहित नव्हतं, त्यालाही तो चौकारच वाटला होता," असं टीम इंडियाचा टी-२० उपकर्णधार म्हणाला.
"जर अक्षर थोडा जरी ओरडला असता, तरी मी धावलो असतो. मला वाटलं बाउंड्री गेलीये, म्हणून मी चालत होतो. पण असं होतं कधी कधी. आता यापुढे बाउंड्री गेली तरी मी थांबणार नाही, धावतच राहीन," असं तो पुढे म्हणाला.
दरम्यान, टीम इंडिया आता या मालिकेत ३-१ अशी विजयी आघाडी घेण्याच्या प्रयत्नात असेल. तर दुसरीकडे वेस्ट इंडिजचा संघ मालिका बरोबरीत सोडवण्यासाठी धडपड करेल. जेणेकरून शनिवारी, १७ ऑक्टोबरला बेंगळुरूच्या एम. चिन्नास्वामी स्टेडियमवर होणारा पाचवा टी-२० सामना निर्णायक ठरू शकेल.
