- Home
- Sports
- Cricket
- IND vs WI 1st ODI : तिरुवनंतपुरममध्ये भारत-विंडीज भिडणार, रोहित-विराट रचणार इतिहास
IND vs WI 1st ODI : तिरुवनंतपुरममध्ये भारत-विंडीज भिडणार, रोहित-विराट रचणार इतिहास
भारत आणि वेस्ट इंडिज यांच्यातील तिरुवनंतपुरम वनडे सामना अनेक ऐतिहासिक विक्रमांचा साक्षीदार ठरणार आहे. रोहित शर्मा आणि विराट कोहलीची जोडी एका मोठ्या विक्रमाच्या उंबरठ्यावर आहे. तर कोहलीची नजर सचिन तेंडुलकरच्या ऑल-टाइम रेकॉर्ड्सवर असेल.
रोहित-विराट मोडणार सचिन तेंडुलकरचे वर्ल्ड रेकॉर्ड्स
भारत आणि वेस्ट इंडिज यांच्यातील तीन वनडे सामन्यांच्या मालिकेतील पहिला सामना तिरुवनंतपुरमच्या ग्रीनफिल्ड इंटरनॅशनल स्टेडियमवर खेळवला जाईल. या सामन्यात भारताचे सीनियर फलंदाज रोहित शर्मा आणि विराट कोहली मैदानात उतरताच आंतरराष्ट्रीय क्रिकेटमध्ये एक नवा इतिहास रचला जाऊ शकतो. आतापर्यंत जागतिक क्रिकेटमध्ये कोणत्याही जोडीला न जमलेला एक खास विक्रम रोहित-विराटच्या जोडीपासून फक्त १८ धावा दूर आहे.
यावर्षी टीम इंडियाने आतापर्यंत ३ वनडे मालिका खेळल्या आहेत. यात न्यूझीलंड आणि इंग्लंडकडून पराभव पत्करावा लागला, तर अफगाणिस्तानवर विजय मिळवला. आता वेस्ट इंडिजवर वर्चस्व गाजवण्यासाठी टीम इंडिया सज्ज झाली आहे.
विंडीजविरुद्ध १००० धावांची भागीदारी पूर्ण करण्याची संधी
वनडे क्रिकेटच्या इतिहासात एकाच संघाविरुद्ध १००० किंवा त्याहून अधिक धावा करणाऱ्या २३ जोड्या आहेत. पण वेस्ट इंडिजविरुद्ध कोणत्याही ओपनिंग किंवा मिडल ऑर्डर जोडीला १००० धावांचा टप्पा ओलांडता आलेला नाही.
रोहित शर्मा आणि विराट कोहलीने वेस्ट इंडिजविरुद्ध १५ वनडे डावांमध्ये ७० पेक्षा जास्त सरासरीने ९८२ धावा केल्या आहेत. यात ४ शतकी आणि २ अर्धशतकी भागीदाऱ्या आहेत. तिरुवनंतपुरमच्या सामन्यात या दोघांनी आणखी १८ धावांची भागीदारी केली, तर ते विंडीजविरुद्ध १००० धावा पूर्ण करणारी जगातील पहिली जोडी ठरतील.
ऑस्ट्रेलियाविरुद्ध रोहित-विराटच्या नावावर १४५४ धावांचा विक्रम आहे. पण एकाच संघाविरुद्ध सर्वाधिक धावांचा वर्ल्ड रेकॉर्ड वेस्ट इंडिजच्या डेसमंड हेन्स आणि रिची रिचर्डसन यांच्या नावावर आहे. त्यांनी पाकिस्तानविरुद्ध १४८४ धावा केल्या होत्या.
सचिन तेंडुलकरच्या ४ मोठ्या विक्रमांवर विराट कोहलीची नजर
क्रिकेटचा देव मानल्या जाणाऱ्या सचिन तेंडुलकरचे ४ मोठे विक्रम मोडण्याच्या अगदी जवळ विराट कोहली पोहोचला आहे.
• सर्वात जलद १५००० वनडे धावा: वनडेत १५००० धावांचा टप्पा गाठण्यासाठी विराटला फक्त ५९ धावांची गरज आहे. त्याने ३०२ डावांत १४,९४१ धावा केल्या आहेत. या सामन्यात ५९ धावा केल्यास तो सचिनचा (३७७ डाव) विक्रम मोडून जगात सर्वात वेगाने १५ हजार धावा करणारा खेळाडू बनेल.
• लिस्ट-ए करिअरमधील सर्वाधिक शतके: लिस्ट-ए क्रिकेटमध्ये सचिनच्या नावावर ६० शतकांचा विक्रम आहे. विराट सध्या ५९ शतकांवर आहे. सचिनला मागे टाकण्यासाठी त्याला आणखी २ शतके हवी आहेत.
• भारतात सर्वाधिक आंतरराष्ट्रीय शतके: मायदेशात खेळताना विराटने ४१ आंतरराष्ट्रीय शतके झळकावली आहेत. सचिनचा ४२ शतकांचा विक्रम मोडण्यासाठी त्याला आणखी २ शतके हवी आहेत.
• भारतात सर्वाधिक वनडे धावा: भारतात सर्वाधिक वनडे धावांचा विक्रम सचिनच्या (१६४ सामन्यांत ६९७६ धावा) नावावर आहे. विराट (१३० सामन्यांत ६८६७ धावा) हा विक्रम मोडण्यापासून ११० धावा दूर आहे.
याशिवाय, वेस्ट इंडिजविरुद्ध विराटने ४३ सामन्यांत २२६१ धावा आणि ९ शतके केली आहेत. या सामन्यात आणखी एक शतक झळकावल्यास, दोन वेगवेगळ्या संघांविरुद्ध (श्रीलंका आणि वेस्ट इंडिज) प्रत्येकी १० शतके करणारा तो पहिला फलंदाज ठरेल.
ओपनर म्हणून रोहित शर्मा खेळणार आपला २०० वा वनडे डाव
भारताचा ओपनर रोहित शर्मा या सामन्यातून आंतरराष्ट्रीय वनडेत ओपनर म्हणून आपला २०० वा डाव खेळणार आहे. आतापर्यंत ओपनर म्हणून १९९ डावांमध्ये त्याने ५४.५० ची सरासरी आणि ९६.३९ च्या स्ट्राईक रेटने ९८६५ धावा केल्या आहेत. यात ३२ शतके आणि ४९ अर्धशतकांचा समावेश आहे. त्याची सर्वोच्च धावसंख्या २६४ आहे.
या मालिकेत रोहित शर्मा आणखी काही विक्रम करू शकतो:
• वनडेत १२००० धावा: वनडेत १२,००० धावा पूर्ण करण्यासाठी रोहितला १०५ धावांची गरज आहे. सध्या २८० डावांत त्याच्या ११८९५ धावा आहेत. भारतातून फक्त सचिन आणि कोहलीने हा टप्पा ओलांडला आहे.
• ओपनर म्हणून १०००० धावा: ओपनर म्हणून १०,००० धावा पूर्ण करण्यासाठी रोहितला १३५ धावा हव्या आहेत. जगात फक्त सचिन, जयसूर्या आणि ख्रिस गेल यांनीच ही कामगिरी केली आहे.
• २००० चौकार: आंतरराष्ट्रीय क्रिकेटमध्ये २००० चौकार पूर्ण करण्यासाठी रोहितला आणखी १८ चौकारांची गरज आहे.
टीम इंडियाची प्लेइंग इलेव्हन, पिच आणि वेदर रिपोर्ट
या सामन्यात चौथ्या क्रमांकाची फलंदाजी आणि बॉलिंग कॉम्बिनेशन भारतासाठी खूप महत्त्वाचे ठरणार आहे. श्रेयस अय्यर आणि अक्षर पटेल उपलब्ध नसल्यामुळे चौथ्या क्रमांकासाठी ऋतुराज गायकवाड शर्यतीत आहे. हार्दिक पांड्या आणि जसप्रीत बुमराह संघात नसल्याने नितीश कुमार रेड्डी १० षटकांची जबाबदारी सांभाळेल. नमन धीर पदार्पण करण्याची शक्यता आहे. सराव करताना शुभमन गिलच्या कोपरला चेंडू लागला असला तरी तो पूर्णपणे फिट असल्याचे मॅनेजमेंटने स्पष्ट केले आहे.
ग्रीनफिल्ड स्टेडियमची खेळपट्टी सीम बॉलर्ससाठी अनुकूल असते. यापूर्वी येथे झालेल्या वनडेत विंडीजचा संघ अवघ्या १०४ धावांवर ऑलआऊट झाला होता, तेव्हा रवींद्र जडेजाने ४ विकेट्स घेतल्या होत्या. सामन्यादरम्यान पावसाची कोणतीही शक्यता नाही आणि हवामान उष्ण राहील. गेल्या २० वर्षांत वेस्ट इंडिजला भारताविरुद्ध वनडे मालिका जिंकता आलेली नाही.
