IND vs SA one day series : गौतम गंभीरवरील राग अद्याप शांत झालेला नाही. अशातच सोशल मीडियावर आणखी एक व्हिडीओ व्हायरल झाला असून त्यामध्ये काही चाहते गौतमला कोचिंग सोडण्यास सांगत आहेत.
IND vs SA one day series : भारतीय संघाने दक्षिण आफ्रिकेविरुद्ध घरच्या मैदानावर कसोटी मालिका ०-२ अशी गमावल्यापासून गौतम गंभीर टीकेचा सामना करत आहे. जुलै २०२४ मध्ये न्यूझीलंडविरुद्धही भारताला ०-३ असा व्हाईटवॉश सहन करावा लागला. त्यांच्या प्रशिक्षकपदाच्या काळात, भारताने घरच्या मैदानावर खेळलेल्या नऊपैकी पाच कसोटी गमावल्या आहे.तर संघाला दोनदा क्लीन स्वीपही करावा लागला आहे. परिणामी, गंभीर आता घरच्या मैदानावर सर्वाधिक कसोटी पराभव पत्करणाऱ्या प्रशिक्षकांच्या यादीत अव्वल स्थानावर आहे.
गौतम गंभीरचा एकूण कोचिंग रेकॉर्ड १९ कसोटींचा आहे, ज्यामध्ये भारताने ७ जिंकले, १० गमावले आणि २ अनिर्णित राहिले. याचा अर्थ विजयाची टक्केवारी फक्त ३६.८२% आहे. दक्षिण आफ्रिकेविरुद्धच्या ०-२ अशा पराभवानंतर चाहते, दिग्गज आणि क्रिकेट तज्ज्ञ त्याच्या कामगिरीवर प्रश्नचिन्ह उपस्थित करत आहेत. अनेक जण गंभीरने किमान कसोटी संघाचे प्रशिक्षकपद सोडावे असे सुचवत आहेत.
सोशल मीडियात व्हिडीओ व्हायरल
दरम्यान, सोशल मीडियावर एक व्हिडिओ व्हायरल होत आहे, ज्यामध्ये असा दावा केला जात आहे की हा रांची एकदिवसीय सामन्यापूर्वीचा आहे. त्यात टीम इंडिया सराव करताना दिसत आहे, जिथे गंभीर देखील उपस्थित होता. त्यानंतर, एक चाहता त्याच्यावर ओरडतो, "घरी ३-०, आफ्रिकेविरुद्ध १-०... कोचिंग सोडा! जर तुम्ही घरच्या मैदानावर दक्षिण आफ्रिकेला हरवू शकत नसाल तर २०२७ चा विश्वचषक विसरून जा."
Related Articles
हा व्हिडिओ रांचीचा आहे की कोलकाता किंवा गुवाहाटी येथील अलिकडच्या कसोटी मालिकेतील ठिकाणांचा आहे हे स्पष्ट नसले तरी, GROK ने त्यांच्या उत्तरात असेही म्हटले आहे की तो गुवाहाटी येथील आहे. त्यांच्या उत्तरात त्यांनी म्हटले आहे की, " हा रांचीचा व्हिडिओ नाही. गौतम गंभीरविरुद्ध घोषणाबाजी गुवाहाटीतील बरसापारा स्टेडियममध्ये भारताने दक्षिण आफ्रिकेविरुद्ध कसोटी मालिका गमावल्यानंतर झाली." व्हायरल व्हिडीओ क्रिकेट सराव सत्रातील मीम क्लिप ही कदाचित आयपीएलमधील असू शकते.
भारताने कोलकाता येथे झालेला पहिला कसोटी सामना फक्त तीन दिवसांत ३० धावांनी गमावला होता. त्यानंतर गुवाहाटी येथे झालेला दुसरा कसोटी सामना ४०८ धावांनी गमावला, जो धावांच्या फरकाने भारताचा सर्वात मोठा कसोटी पराभव आहे.
कसोटी मालिकेनंतर, भारत रविवारी (३० नोव्हेंबर) एकदिवसीय मालिका खेळणार आहे. भारत आणि दक्षिण आफ्रिका यांच्यातील पहिला सामना रांची येथे खेळला जाईल. दुसरा एकदिवसीय सामना ३ डिसेंबर रोजी रायपूर येथे आणि शेवटचा सामना ६ डिसेंबर रोजी विशाखापट्टणम येथे खेळला जाईल. शुभमन गिल आणि श्रेयस अय्यर जखमी आहेत, त्यामुळे केएल राहुल या मालिकेचे नेतृत्व करेल. गिल, अक्षर, अय्यर आणि सिराज यांच्या जागी रुतुराज गायकवाड, रवींद्र जडेजा, तिलक वर्मा आणि ऋषभ पंत परतले आहेत. गिल बाहेर पडल्याने, यशस्वी जयस्वाल डावाची सुरुवात करण्याची शक्यता आहे, तर रुतुराज गायकवाड देखील दावेदार आहे.
