आशियाई क्रीडा स्पर्धा २०२६ च्या पुरुष क्रिकेट फायनलमध्ये भारताने नाणेफेक जिंकून पाकिस्तानविरुद्ध प्रथम फलंदाजीचा निर्णय घेतला आहे.
निशीन : जपानमधील निशिन येथे शनिवारी आशियाई क्रीडा स्पर्धा २०२६ च्या पुरुष क्रिकेटचा सुवर्णपदकाचा सामना रंगत आहे. या महामुकाबल्यात भारताने कट्टर प्रतिस्पर्धी पाकिस्तानविरुद्ध नाणेफेक जिंकून प्रथम फलंदाजी करण्याचा निर्णय घेतला. कर्णधार श्रेयस अय्यरने टॉस जिंकल्यानंतर बॅटिंगची निवड केली. क्रिकइन्फोच्या माहितीनुसार, दोन्ही कर्णधार नाणेफेकीसाठी मैदानावर आले, पण त्यांच्यात हस्तांदोलन (हँडशेक) झाले नाही.
दोन्ही संघात कोणताही बदल नाही
सेमीफायनलमध्ये श्रीलंकेचा १२४ धावांनी धुव्वा उडवणाऱ्या टीम इंडियाने फायनलसाठी प्लेइंग इलेव्हनमध्ये कोणताही बदल केलेला नाही. पाकिस्ताननेही आपला विजयी संघ कायम ठेवला आहे. भारताकडून वैभव सूर्यवंशी आणि अभिषेक शर्मा डावाची सुरुवात करतील. त्यानंतर संजू सॅमसन, श्रेयस अय्यर, ईशान किशन, तिलक वर्मा आणि शिवम दुबे यांच्यावर मधल्या फळीची जबाबदारी असेल. गोलंदाजीमध्ये अक्षर पटेल, वॉशिंग्टन सुंदर, रवी बिश्नोई आणि जसप्रीत बुमराह यांचा समावेश आहे.
पाकिस्तानचे नेतृत्व साहिबजादा फरहान करत आहे. त्यांच्या फलंदाजीच्या फळीत माझ सदाकत, उस्मान खान, सईम अयुब, हसन नवाज, अब्दुल समद आणि अराफत मिन्हास यांचा समावेश आहे. तर अहमद दानियाल, मोहम्मद वसीम ज्युनियर, अबरार अहमद आणि सुफियान मुकीम हे गोलंदाजीची धुरा सांभाळतील.
या खेळाडूंवर असेल नजर
आशियाई क्रीडा स्पर्धेत भारत आणि पाकिस्तानचे पुरुष क्रिकेट संघ पहिल्यांदाच आमनेसामने आले आहेत. पाकिस्तानची मदार कर्णधार फरहानवर असेल. या सलामीवीराने भारताविरुद्धच्या चार टी-२० डावांमध्ये ३८.७५ च्या सरासरीने दोन अर्धशतके झळकावली आहेत. तसेच त्याने भारताविरुद्ध सर्वाधिक ९ षटकार मारले असून, टी-२० आंतरराष्ट्रीय क्रिकेटमध्ये भारताविरुद्ध अशी कामगिरी करणारा तो एकमेव पाकिस्तानी फलंदाज आहे.
दुसरीकडे, भारताचा संजू सॅमसन पाकिस्तानविरुद्ध मोठी खेळी करण्याच्या प्रयत्नात असेल. श्रीलंकेविरुद्धच्या सेमीफायनलमध्ये तो अवघ्या ७ धावांवर बाद झाला होता. विशेष म्हणजे, पाकिस्तान हा एकमेव असा संघ आहे ज्याच्याविरुद्ध सॅमसनचा टी-२० स्ट्राईक रेट १०० पेक्षा कमी आहे. अर्थात, त्याने पाकिस्तानविरुद्ध आतापर्यंत फक्त दोनच सामने खेळले आहेत.
श्रीलंकेला कांस्यपदक
तत्पूर्वी, दिवसाच्या सुरुवातीला झालेल्या तिसऱ्या क्रमांकाच्या प्लेऑफ सामन्यात श्रीलंकेने बांगलादेशचा ६३ धावांनी पराभव करत कांस्यपदकावर नाव कोरले. थरिंदू रत्नायकेच्या ३२ चेंडूंतील ६५ धावांच्या खेळीच्या जोरावर श्रीलंकेने १६५/९ अशी मजल मारली होती. यानंतर त्यांनी बांगलादेशचा डाव १७.३ षटकांत अवघ्या १०२ धावांवर गुंडाळला. रत्नायकेने फलंदाजीसोबतच गोलंदाजीतही कमाल करत दोन विकेट्स घेतल्या.
श्रीलंकेची वरची फळी कोलमडली असताना रत्नायकेने ५ षटकार आणि ७ चौकार ठोकत संघाचा डाव सावरला. त्याने कर्णधार सहान अरचिगेसोबत सहाव्या विकेटसाठी अवघ्या ४६ चेंडूत ९३ धावांची महत्त्वपूर्ण भागीदारी केली.
(हेडलाईन वगळता या बातमीतील मजकूर एशियानेट न्यूजच्या संपादकीय टीमने संपादित केलेला नाही. ही बातमी सिंडिकेटेड फीडमधून थेट प्रकाशित करण्यात आली आहे.)
