मुंबई लोकलच्या दरवाज्याला लटकून प्रवास करणाऱ्या महिलांचा एक व्हिडिओ व्हायरल झाला आहे. यावरून काही जण याला 'नारी शक्ती' म्हणत आहेत, तर काही जणांनी याला व्यवस्थेचं अपयश म्हणत चांगल्या सुविधांची मागणी केली आहे.
मुंबई : मुंबई लोकलच्या गर्दीचा एक धक्कादायक व्हायरल व्हिडीओ सध्या सोशल मीडियावर चर्चेत आहे. यात काही महिला गर्दीने खचाखच भरलेल्या ट्रेनच्या दरवाज्याला अक्षरशः लटकून प्रवास करताना दिसत आहेत. @pallvika नावाच्या एका ‘X’ युझरने हा व्हिडिओ 'नारी शक्ती का नमन' असं कॅप्शन देऊन शेअर केला. यानंतर मुंबईकरांच्या रोजच्या संघर्षावर आणि रेल्वेच्या सुरक्षेवर एक नवी चर्चा सुरू झाली आहे.
काहींनी 'नारी शक्ती' म्हटलं, तर काहींनी व्यवस्थेवर प्रश्न उचलले
काही युझर्सनी या महिलांच्या हिमतीला 'नारी शक्ती' म्हणत त्यांचं कौतुक केलं, तर अनेकांनी या जीवघेण्या प्रवासाला 'मुंबईचं स्पिरीट' म्हणणं चुकीचं असल्याचं म्हटलं आहे. त्यांच्या मते, यावर कौतुक करण्याऐवजी मुंबईतील सार्वजनिक वाहतूक व्यवस्था सुधारण्यावर लक्ष केंद्रित करायला हवं.
Related Articles
एका युझरने या महिलांच्या धैर्याचं कौतुक करत लिहिलं, "या मुलींची आंतरिक शक्ती मला आवडली. पुरुषांसाठीही त्या एक उदाहरण आहेत. त्या करू शकतात, तर दुसरे का नाही? कामावर जाणाऱ्या या मुलींचा आत्मविश्वास, धैर्य आणि प्रामाणिकपणा बघा. कमी पगारासाठी त्या जीव धोक्यात घालत असतील, पण त्यांची कामाप्रती असलेली निष्ठा दिसून येते."
तर दुसऱ्या एका युझरने याला शौर्य म्हणावं की मूर्खपणा, असा प्रश्न विचारला. तो म्हणतो, "हा पराक्रम आहे की मूर्खपणा, हे सांगता येत नाही. कारण अपघात झाला असता, तर याच महिलेला 'मुंबईच्या महिलेचा मूर्खपणा' असं म्हटलं गेलं असतं. मुंबईकरांच्या गरजा पूर्ण करण्यासाठी मुंबई रेल्वे नेटवर्कमध्ये खूप सुधारणा करण्याची गरज आहे."
तिसऱ्या एका युझरने अशा धोकादायक प्रवासाला 'मुंबईचं स्पिरीट' म्हणण्याच्या वृत्तीवर टीका केली. त्याने लिहिलं, “सलाम! मृतप्राय झालेली रेल्वे व्यवस्था प्रवाशांच्या सुरक्षेचा कधीच विचार करत नाही. आणि काही मूर्ख लोक सुरक्षेसाठी चांगल्या रेल्वे पायाभूत सुविधांची मागणी करण्याऐवजी याला 'स्पिरीट ऑफ मुंबई' म्हणतात!” या वादामुळे मुंबई लोकल ट्रेनमधील प्रचंड गर्दीचा प्रश्न पुन्हा एकदा ऐरणीवर आला आहे. जास्त डबे, ट्रेनच्या फेऱ्या वाढवणे आणि प्रवाशांच्या सुरक्षेसाठी चांगले उपाय योजावेत, अशी मागणी प्रवासी अनेक वर्षांपासून करत आहेत.
