- Home
- Mumbai
- ठाणे स्थानकाचा कायापालट! आता मुसळधार पावसातही लोकल धावणार सुसाट; रेल्वेचा 'गेमचेंजर' प्रकल्प फत्ते
ठाणे स्थानकाचा कायापालट! आता मुसळधार पावसातही लोकल धावणार सुसाट; रेल्वेचा 'गेमचेंजर' प्रकल्प फत्ते
Thane Station Waterlogging Solution: ठाणे स्थानकात पावसाळ्यात पाणी साचण्याच्या समस्येवर मध्य रेल्वेने मायक्रोटनेलिंग प्रकल्पाद्वारे तोडगा काढला. या बोगद्यामुळे पावसाच्या पाण्याचा जलद निचरा होणार असून मुसळधार पावसातही लोकल सेवा विस्कळीत होणार नाही.
ठाणे स्थानकाचा कायापालट! आता मुसळधार पावसातही लोकल धावणार सुसाट
ठाणे : दरवर्षी पावसाळा आला की मुंबईकरांच्या उरात धडकी भरते ती म्हणजे 'लोकल ठप्प' होण्याची. त्यातही ठाणे स्थानकातील पाणी साचण्याच्या समस्येमुळे कर्जत, कसारा आणि पनवेलला जाणाऱ्या लाखो प्रवाशांचे प्रचंड हाल व्हायचे. मात्र, आता ही चिंता कायमची मिटणार आहे. मध्य रेल्वेने ठाणे स्थानकात एक 'हायटेक गेमचेंजर' प्रकल्प राबवला असून, यंदाच्या पावसाळ्यात रेल्वे रुळ पाण्याखाली जाण्याचे टेन्शन आता प्रवाशांना राहणार नाही.
काय आहे हा प्रकल्प?
ठाणे स्थानकातील फलाट क्रमांक १ ते १० च्या खालून मध्य रेल्वेने 'मायक्रोटनेलिंग'चे काम यशस्वीपणे पूर्ण केले आहे. हे महामुंबईतील सर्वात लांबीचे मायक्रोटनेल ठरले असून, या अत्याधुनिक बोगद्यामुळे आता पावसाच्या पाण्याचा निचरा सेकंदात होणार आहे.
प्रवाशांना दिलासा देणारी 'बटन प्रणाली'
पाण्याचा वेगवान निचरा: ठाणे पश्चिमेकडून येणारे पावसाचे पाणी आता थेट पूर्वेकडे वळवले जाईल.
स्मार्ट सिस्टीम: या टनेलसाठी एक स्वतंत्र यंत्रणा असून, केवळ एक बटण दाबताच साचलेल्या पाण्याचा निचरा सुरू होईल.
विक्रमी वेळेत पूर्ण: १ डिसेंबर २०२४ ला सुरू झालेले हे काम अवघ्या दीड महिन्यात म्हणजेच १५ जानेवारी २०२५ रोजी पूर्ण करण्यात आले.
खडतर प्रवास, पण यशस्वी टप्पा
ठाणे स्थानकाखालील कठीण खडक आणि चिकणमातीमुळे हे काम अत्यंत आव्हानात्मक होते. मात्र, रेल्वेने लेझर तंत्रज्ञान, हायड्रोलिक जॅक आणि अत्याधुनिक बोरिंग मशिनचा वापर करून हे आव्हान पेलले आहे. यामुळे फलाट १, २ आणि ३ वर पाणी साचून लोकल सेवा विस्कळीत होण्याचे प्रकार आता इतिहासजमा होणार आहेत. या प्रकल्पामुळे ठाणेकरांसह कर्जत-कसारा आणि पनवेलच्या प्रवाशांना मोठा दिलासा मिळणार असून, मध्य रेल्वेने पावसाळ्यापूर्वीच प्रवाशांना ही मोठी 'गुड न्यूज' दिली आहे.
