मुंबईचा रहिवासी कृष्णा ठाकूर याने इन्स्टाग्रामवर एक भावनिक व्हिडिओ शेअर केला आहे. ऑफिसला जाताना एका गरजू आणि बोलू न शकणाऱ्या अनोळखी व्यक्तीला मदत करण्यासाठी तो थांबला आणि त्याचा तो सामान्य प्रवास एका अविस्मरणीय अनुभवात बदलला.
मुंबई : एका बाईकरच्या छोट्याशा मदतीने सध्या इंटरनेटवर लोकांची मनं जिंकली आहेत. एका व्हायरल व्हिडिओने लाखो लोकांना आठवण करून दिली आहे की दयाळूपणा कायम लक्षात राहतो. मुंबईचा रहिवासी असलेल्या कृष्णा ठाकूरने हा भावनिक व्हिडिओ इन्स्टाग्रामवर शेअर केला आहे. ऑफिसला जाताना एका बोलू न शकणाऱ्या (speech-impaired) अनोळखी व्यक्तीला मदत केल्यानंतर त्याचा तो दिवस कसा अविस्मरणीय ठरला, हे या व्हिडिओत दिसतं.
ठाकूर त्याच्या ऑफिसला बाईकने जात होता. तेव्हा त्याला एक व्यक्ती दिसली, जिला बोलता येत नसल्याने संवाद साधायला त्रास होत होता. पुढे न जाता, कृष्णाने गाडी थांबवली, शांतपणे त्याला कुठे जायचं आहे हे समजून घेण्याचा प्रयत्न केला आणि त्याला लिफ्ट ऑफर केली.
व्हायरल झालेल्या व्हिडिओमध्ये कृष्णा सांगतो की, त्याने सुरुवातीला त्या व्यक्तीला विचारलं की त्याला चर्चगेटला जायचं आहे का. विशेष म्हणजे, तो रस्ता कृष्णाच्या मार्गात नव्हता, तरीही त्याने कोणताही विचार न करता मदत करण्याचा निर्णय घेतला.
Related Articles
"कधीकधी आयुष्य तुम्हाला वेळेवर पोहोचणं आणि दयाळू असणं यातला एक पर्याय निवडायला सांगतं," असं कृष्णा म्हणाला. तो पुढे म्हणाला, "मी ऑफिसला निघालो होतो, तेव्हा एका अनोळखी व्यक्तीने लिफ्ट मागितली. मी त्या दिशेने जातही नव्हतो, पण मी मदत करायचं ठरवलं."
ते दोघे शहरातून प्रवास करत असताना, बोलू न शकणाऱ्या त्या प्रवाशाने कृष्णाच्या खांद्यावर हळूच थोपटून त्याचे आभार मानले. एकही शब्द न बोलता तो त्याच्या मोटरसायकलचं कौतुक करत होता.
पण त्यांचा प्रवास चर्चगेटला संपला नाही.
“चर्चगेटला पोहोचल्यावर, त्याने फोनवर टाईप करून सांगितलं की त्याला खरंतर नरिमन पॉइंटला जायचं आहे. मला उशीर होत होता, पण मी त्याला शक्य तितक्या जवळ सोडलं,” असं कृष्णाने सांगितलं.
या भावनिक भेटीचा शेवट तर खूपच हृदयस्पर्शी होता. निरोप घेताना त्या अनोळखी व्यक्तीने केलेल्या एका कृतीने कृष्णाच्या मनावर कायमची छाप सोडली.
कृष्णा आठवण सांगतो, "जाण्यापूर्वी, त्याने मला हेल्मेट काढायला सांगितलं जेणेकरून तो माझा चेहरा पाहू शकेल. मग तो हसला, त्याने माझ्याशी हस्तांदोलन केलं आणि मला मिठी मारली. काही क्षण खरंच आयुष्यभर तुमच्यासोबत राहतात."
हा हृदयस्पर्शी व्हिडिओ व्हायरल झाल्यापासून सोशल मीडियावर कृष्णावर कौतुकाचा वर्षाव होत आहे. अनेक युजर्सनी त्यांचे स्वतःचे अनुभवही शेअर केले आहेत, जिथे अनोळखी लोकांनी त्यांना अनपेक्षितपणे मदत केली होती.
एका युजरने लिहिले, "अरे व्वा, हे खूपच गोड आहे. त्याला मदत केल्याबद्दल देव तुझं भलं करो."
दुसऱ्या एकाने कमेंट केली, “बाईकर समुदायाकडून तुला खूप खूप आदर, भावा. तुझा अभिमान वाटतो.”
