MHADA Mumbai Lottery: मुंबईत हक्काच्या घराचं स्वप्न होणार पूर्ण! म्हाडाच्या ११८ घरांसाठी 'आधी येणाऱ्यास प्राधान्य'; जाणून घ्या प्रक्रिया

MHADA Mumbai Lottery: मुंबईत म्हाडाने प्रथम येणाऱ्यास प्रथम प्राधान्य तत्त्वावर ११८ सदनिकांची विक्री सुरू केली. अर्जदारांना अर्ज केल्यावर ४८ तासांत घराच्या किमतीच्या १०% रक्कम भरणे अनिवार्य आहे. हा नियम न पाळल्यास भरलेली अनामत रक्कम जप्त केली जाईल.

Image Credit : Twitter

मुंबईत हक्काच्या घराचं स्वप्न होणार पूर्ण!

मुंबई: मुंबईसारख्या महानगरात स्वतःच्या घराचे स्वप्न पाहणाऱ्यांसाठी म्हाडाने (MHADA) मोठी संधी आणली आहे. मुंबई गृहनिर्माण व क्षेत्रविकास मंडळाने शहरातील विविध भागांतील ११८ सदनिकांसाठी 'प्रथम येणाऱ्यास प्रथम प्राधान्य' (First Come First Served - FCFS) या तत्त्वावर विक्री प्रक्रिया सुरू केली आहे.

बुधवारी सकाळी ११ वाजेपासून या योजनेअंतर्गत अनामत रक्कमेसह अर्ज भरता येणार आहेत. मात्र, या प्रक्रियेत एक महत्त्वाचा नियम असून तो न पाळल्यास अर्जदारांचे मोठे आर्थिक नुकसान होऊ शकते.

Image Credit : Twitter

सावधान! १० टक्के रकमेची तरतूद असेल तरच अर्ज करा

म्हाडाने यावेळेस नियमावली कडक केली आहे. अर्जदाराने अनामत रक्कमेसह अर्ज भरल्यानंतर पुढील ४८ तासांच्या आत घराच्या एकूण किमतीच्या १० टक्के रक्कम भरणे अनिवार्य आहे.

जर ही रक्कम वेळेत भरली नाही, तर घरावरील तुमचा दावा रद्द होईल.

इतकेच नाही, तर तुम्ही भरलेली १ ते ६ लाखांपर्यंतची अनामत रक्कम जप्त केली जाईल.

त्यामुळे खिशात पूर्ण तरतूद असेल तरच या प्रक्रियेत उतरावे, असे आवाहन म्हाडा प्रशासनाने केले आहे.

Image Credit : Twitter

अनामत रक्कमेचे स्वरूप (Deposit Details)

घराच्या किमतीनुसार अनामत रक्कम खालीलप्रमाणे निश्चित करण्यात आली आहे.

घराची किंमत,अनामत रक्कम (Deposit)

५० लाखांपर्यंत,१ लाख रुपये

५० लाख ते १ कोटी,२ लाख रुपये

१ कोटी ते २ कोटी,४ लाख रुपये

२ कोटींच्या पुढे,६ लाख रुपये

Image Credit : Twitter

ही घरे रिक्त का राहिली?

मुंबईतील काही उच्च आणि मध्यम गटातील घरे त्यांच्या वाढीव किमतीमुळे, तर अल्प गटातील काही घरे गैरसोयीच्या ठिकाणी असल्यामुळे दोन-तीन वेळा सोडत काढूनही विकली गेली नव्हती. यामुळे म्हाडाचा मोठा महसूल अडकून पडला आहे. हा महसूल मोकळा करण्यासाठी आणि सर्वसामान्यांना घर मिळावे यासाठी म्हाडाने प्रथमच मुंबईत FCFS तत्त्वावर ही विक्री सुरू केली आहे. 

Image Credit : our own

अर्ज कसा करायचा?

१. म्हाडाच्या अधिकृत संकेतस्थळावर जाऊन नोंदणी करा (नोंदणी प्रक्रिया अद्यापही सुरू आहे).

२. आपल्या पसंतीचे घर निवडा.

३. विहित अनामत रक्कम भरून अर्ज निश्चित करा.

४. पुढील ४८ तासांत १० टक्के रक्कम भरून आपला ताबा पक्का करा.