Chhava Ride Government Taxi App: ओला-उबरला रामराम! महाराष्ट्रात येतंय हक्काचं 'सरकारी' ॲप; आता प्रवास होणार स्वस्त!

Chhava Ride Government Taxi App: खाजगी कॅब कंपन्यांच्या मनमानीला पर्याय म्हणून महाराष्ट्र सरकार छावा राईड हे नवीन टॅक्सी अॅप सुरू करतंय. एसटी महामंडळ आणि परिवहन विभागामार्फत चालवली जाणारी ही सेवा प्रवाशांना कमी दरात सुरक्षित प्रवास उपलब्ध करून देईल. 

Image Credit : our own

महाराष्ट्रात धावणार सरकारी 'छावा राईड'

मुंबई : टॅक्सीसाठी तासनतास वाट पाहणे, ऐनवेळी होणारे 'राईड कॅन्सल' आणि अव्वाच्या सव्वा भाडेवाढ... या सर्व त्रासातून आता महाराष्ट्रातील जनतेची सुटका होणार आहे. खाजगी कॅब कंपन्यांच्या मनमानी कारभाराला चाप लावण्यासाठी राज्य सरकारने कंबर कसली असून, लवकरच 'छावा राईड' (Chhava Ride) नावाचे सरकारी टॅक्सी अॅप लाँच होणार आहे. 

Image Credit : Freepic

काय आहे सरकारची नवी योजना?

एसटी महामंडळ आणि परिवहन विभागाच्या संयुक्त विद्यमाने ही सेवा सुरू केली जाणार आहे. 'भारत टॅक्सी'च्या यशस्वी पावलावर पाऊल ठेवत, आता 'छावा राईड'च्या माध्यमातून प्रवाशांना सुरक्षित आणि खिशाला परवडणारा प्रवास मिळणार आहे. 

Image Credit : our own

'छावा राईड'ची खास वैशिष्ट्ये

एसटी महामंडळाचा पुढाकार: ही सेवा एसटी महामंडळामार्फत चालवली जाईल, ज्यामुळे महामंडळाच्या उत्पन्नात भर पडेल.

कमी दरात प्रवास: खाजगी कंपन्यांच्या 'सर्ज प्रायसिंग'ला पर्याय म्हणून परवडणारे दर असतील.

सुरक्षितता: सरकारी देखरेखीखाली असल्याने प्रवाशांच्या, विशेषतः महिलांच्या सुरक्षिततेला प्राधान्य दिले जाईल.

मराठी तरुणांना रोजगार: या सेवेमुळे राज्यातील हजारो तरुणांना हक्काचा रोजगार उपलब्ध होणार असल्याची माहिती परिवहन मंत्री प्रताप सरनाईक यांनी दिली आहे. 

Image Credit : our own

कधीपासून होणार सुरुवात?

या प्रकल्पासाठी नेमलेल्या विशेष समितीचा अहवाल याच महिन्याअखेर सादर होईल. त्यानंतर मार्च किंवा एप्रिल २०२६ मध्ये निविदा प्रक्रिया पूर्ण करून ही सेवा प्रत्यक्ष रस्त्यावर उतरवण्याची तयारी सुरू आहे. 

Image Credit : Freepic

प्रवाशांचा होणार फायदा

आता मुंबईकरांना आणि संपूर्ण महाराष्ट्राला ओला-उबर व्यतिरिक्त एक विश्वासार्ह 'आपला' पर्याय मिळणार आहे. यामुळे बाजारातील मक्तेदारी संपून स्पर्धा वाढेल आणि पर्यायाने प्रवाशांचा फायदा होईल.