IAS Probationer Pooja Khedkar : वाशिममध्ये IAS प्रोबेशनर पूजा खेडकरांनी स्वीकारला पदभार, प्रसारमाध्यमांना दिली पहिली प्रतिक्रिया

IAS Probationer Pooja Khedkar : वाशिम : पुणे जिल्हाधिकारी कार्यालयात असताना सरंजामी थाटात वावरण्यामुळे चर्चेत असलेल्या पोब्रेशनरी IAS अधिकारी पूजा खेडकर यांची वाशिम येथे बदली करण्यात आली होती. गेल्या दोन दिवसांपासून पूजा खेडकर यांचे उत्पन्न, श्रीमंत थाट ते त्या सनदी अधिकारी होण्यास कशाप्रकारे पात्र नव्हत्या, याबाबत जोरदार चर्चा सुरु आहे. या पार्श्वभूमीवर गुरुवारी पूजा खेडकर यांनी वाशिममध्ये आपल्या पदाचा कार्यभार स्वीकारला. यावेळी त्यांनी पहिल्यांदाचा प्रसारमाध्यमांशी संवाद साधला.

पूजा खेडकर यांना त्यांच्याबाबत सुरु असलेल्या चर्चा आणि आरोपांबद्दल विचारण्यात आले. त्यावर पूजा खेडकर यांनी म्हटले की, मला सध्या काहीही बोलण्याची परवानगी नाही. मला वाशिममध्ये रुजू होताना आनंद होतोय, इथून पुढेही मला वाशिममध्ये काम करायला आवडेल. मला सरकारने काहीही बोलण्यासाठी परवानगी दिलेली नाही. यावेळी पूजा खेडकर यांना त्यांच्या उत्पन्नावरुन, नॉन-क्रीमिलेअर सर्टिफिकेटवरुन सुरु असलेल्या वादाबाबत विचारण्यात आले. त्यावर पूजा खेडकर यांनी, 'मी तुम्हाला काहीही सांगू शकत नाही, या प्रकरणात मला सरकारने काही बोलायला परवानगी दिलेली नाही. मी गुरुवारी वाशिमममध्ये रुजू झाली आहे', असे खेडकर यांनी म्हटले. यानंतर पूजा खेडकर तिथून निघून गेल्या.

पूजा खेडकर या महाराष्ट्र केडरच्या 2022 च्या बॅचमधील IAS अधिकारी आहेत. प्रशिक्षण पूर्ण झाल्यानंतर त्यांची पुण्यात प्रोबेशनरी अधिकारी म्हणून नियुक्ती झाली होती. मात्र या काळातील पूजा खेडकर यांचा रुबाब जिल्हाधिकाऱ्यांनाही लाजवणार होता. प्रोबेशनरी अधिकाऱ्यासाठी स्वतंत्र केबिन किंवा गाडीची सुविधा नसते. मात्र पूजा खेडकर या स्वत:च्या खासगी ऑडी गाडीवर लाल-निळा दिवा आणि महाराष्ट्र शासन अशी नेमप्लेट लावून फिरायच्या. याशिवाय पुणे जिल्हाधिकारी कार्यालयातील एका वरिष्ठ अधिकाऱ्याचे अँटी चेंबर बळकावून पूजा खेडकर यांनी तिकडे स्वत:चे कार्यालय थाटले होते. या कार्यालयातील फर्निचरही पूजा खेडकर यांनी बदलले होते. या सगळ्या सरंजामी थाटामुळे पूजा खेडकर या सरकारी अधिकाऱ्यांच्या वर्तुळात चर्चेचा विषय ठरल्या होत्या. अखेर पुण्याच्या जिल्हाधिकाऱ्यांनी पत्र लिहून त्यांच्या बदलीची शिफारस केल्यामुळे हा सर्व प्रकार उघड झाला होता.

पूजा खेडकर शिकाऊ उमेदवार म्हणून चार्ज स्वीकारणार

एक ना अनेक कारणावरून चर्चेत असलेल्या IAS प्रोबेशनल अधिकारी पूजा खेडकर यांची पुण्यावरून थेट वाशिम येथे बदली करण्यात आली. 8 जुलै रोजी बदलीच्या आदेशानुसार खेडकर शासनाकडून रुजू करण्याचे आदेश काढण्यात आले होते. नऊ तारखेला त्या संदर्भात तसे पत्र वाशिम जिल्हाधिकारी कार्यालयाकडे मिळाले होते. बुधवारी दुपारीला हे पत्र वाशिम जिल्हा अधिकारी प्राप्त झाले होते. गुरुवारी पूजा खेडकर ह्या प्रोबेशनल अधिकारी म्हणून वाशिम जिल्हाअधिकारी कार्यालयात वाशिम जिल्हा अधिकारी बूवनेश्वरी एस यांची त्यांनी भेट घेऊन गुरुवारी अधिकृतपणे त्यांनी आपला शिकाऊ उमेदवाराचा पदभार सांभाळला. गुरुवारी जिल्ह्यातील सर्वच अधिकाऱ्यांशी भेटी घेऊन शुक्रवारी पूजा खेडकर सार्वजनिक बांधकाम विभागात शिकाऊ उमेदवार म्हणून चार्ज स्वीकारणार आहेत.

आणखी वाचा : 

IAS Probationer Pooja Khedkar : IAS प्रोबेशनर पूजा खेडकर यांची संपत्ती किती? धक्कादायक माहिती उघड