TCS च्या नाशिक युनिटमधील महिला कर्मचाऱ्यांनी लैंगिक छळ, अश्लील शेरेबाजी आणि धार्मिक अपमानाचे गंभीर आरोप केले आहेत.
नाशिक: टाटा कन्सल्टन्सी सर्व्हिसेस (TCS) च्या नाशिक युनिटमध्ये काम करणाऱ्या एका महिला कर्मचाऱ्याने तिच्या सहकाऱ्यांवर लैंगिक छळ आणि मानसिक त्रासाचे गंभीर आरोप केले आहेत. नोकरी सुरू केल्यापासूनच ऑफिसमध्ये 'प्लेअर', 'झीरो फिगर' अशा अपमानकारक कमेंट्स, अश्लील हावभाव आणि खासगी आयुष्याबद्दलच्या प्रश्नांना सामोरं जावं लागल्याचं या तरुणीने म्हटलं आहे.
ट्रेनिंगदरम्यानच छळाला सुरुवात
पीडित तरुणीने पोलिसांना दिलेल्या माहितीनुसार, तिने लग्नानंतर जून २०२५ मध्ये TCS नाशिकमध्ये नोकरी सुरू केली. ट्रेनिंगदरम्यान शाहरुख कुरेशी आणि जयेश गुंजाळ हे तिचे लीडर्स होते. तिने आरोप केला आहे की, रझा मेमन नावाचा एक दुसरा टीम लीड, जो तिच्या ट्रेनिंगशी संबंधित नव्हता, तो सतत तिच्याजवळ येऊन खासगी प्रश्न विचारायचा आणि तिच्या वैवाहिक आयुष्यावर कमेंट करायचा.
आक्षेपार्ह प्रश्न आणि शेरेबाजी
पीडितेच्या म्हणण्यानुसार, रझा मेमन तिला सतत विचारायचा की, 'तू पतीपासून दूर राहून स्वतःला कसं सांभाळतेस?' इतकंच नाही, तर तो हनिमूनबद्दल प्रश्न विचारायचा आणि तिच्या खासगी आयुष्यावरही बोलायचा. टीम लीडर शाहरुख कुरेशी या गोष्टींना प्रोत्साहन द्यायचा आणि तो स्वतःही तिच्या लग्नाबद्दल आणि खासगी आयुष्याबद्दल प्रश्न विचारायचा, असंही तिने सांगितलं.
Related Articles
'प्लेअर' नावाने चिडवणं आणि मानसिक दबाव
पीडितेने सांगितलं की, रझा मेमनने तिला 'प्लेअर' या नावाने बोलवायला सुरुवात केली होती. ऑफिसमध्ये तो तिला नेहमी याच नावाने हाक मारायचा. जेव्हा तिला कामात काही अडचण यायची, तेव्हा शाहरुख तिला मुद्दाम रझाकडे पाठवायचा, जिथे रझा तिचा अपमान करायचा.
साडीचा पदर खेचल्याचा आरोप
पीडितेने सांगितलं की, मार्च महिन्यात गुढीपाडव्याच्या दिवशी, म्हणजे आपल्या मराठी नवीन वर्षाच्या दिवशी, ती साडी नेसून ऑफिसला आली होती. तेव्हा रझा मेमनने तिचा पदर खेचला. ही घटना ऑफिसच्या लॉबीमध्ये घडली, ज्यामुळे तिला खूप अवघडल्यासारखं झालं. दुसरीकडे, रझा मेमनच्या कुटुंबीयांनी हे सर्व आरोप फेटाळून लावले आहेत. रझाचे काका अयाझ काझी यांनी म्हटलं आहे की, 'रझाच्या व्यावसायिक यशावर जळणारे लोक हे षडयंत्र रचत आहेत.'
दुसऱ्या कर्मचाऱ्यावरही छळाचे आरोप
पीडितेने आसिफ अन्सारी नावाच्या आणखी एका कर्मचाऱ्यावरही गंभीर आरोप केले आहेत. तिच्या म्हणण्यानुसार, आसिफ सतत तिच्याजवळ येऊन बसायचा, तिला चुकीच्या पद्धतीने स्पर्श करायचा आणि 'झीरो फिगर' अशी वैयक्तिक कमेंट करायचा. आसिफने अनेकदा तिला चुकीच्या पद्धतीने स्पर्श केला, मिठी मारली आणि तिच्या शरीरावरुन कमेंट्स केल्या, ज्यामुळे तिला प्रचंड मानसिक त्रास झाला.
ऑनलाइन छळ आणि पाठलाग
पीडितेने सांगितलं की, हा त्रास फक्त ऑफिसपुरता मर्यादित नव्हता. आसिफ अन्सारीने तिला सोशल मीडिया प्लॅटफॉर्म इन्स्टाग्राम आणि लिंक्डइनवर मेसेज करायला सुरुवात केली. तिने त्याला ब्लॉक केलं, पण तो सतत संपर्क साधण्याचा प्रयत्न करत होता. आसिफने हिंदू देवी-देवतांबद्दल आक्षेपार्ह वक्तव्यं केल्याचा आरोपही तिने केला आहे. जेव्हा तिने याला विरोध केला, तेव्हा तिला कामात त्रास देण्याची धमकी देण्यात आली.
अनेक महिलांचे आरोप, पोलिसांनी FIR दाखल केली
ही तरुणी त्या अर्धा डझनहून अधिक महिलांपैकी एक आहे, ज्यांनी आपल्या पुरुष सहकाऱ्यांवर लैंगिक छळ आणि जबरदस्तीने धर्मांतराचे आरोप केले आहेत. नाशिक पोलिसांच्या विशेष तपास पथकाने (SIT) या प्रकरणात आतापर्यंत ९ एफआयआर (FIR) दाखल केल्या आहेत आणि एका महिला ऑपरेशन्स मॅनेजरसह ८ जणांना अटक केली आहे.
TCS चं स्पष्टीकरण: 'झिरो टॉलरन्स' धोरण
TCS ने स्पष्ट केलं आहे की, कंपनी छळ आणि कोणत्याही प्रकारच्या जबरदस्तीविरोधात 'झिरो टॉलरन्स' म्हणजेच शून्य सहिष्णुतेचं धोरण अवलंबते. कंपनीच्या म्हणण्यानुसार, प्राथमिक तपासात त्यांच्या POSH (लैंगिक छळ प्रतिबंधक) चॅनेलवर अशा प्रकारची कोणतीही तक्रार आढळलेली नाही. तरीही, ज्या कर्मचाऱ्यांवर आरोप आहेत, त्यांना निलंबित करण्यात आलं असून, पुढील तपास सुरू आहे.
