- Home
- Maharashtra
- आता डोंगर-दऱ्यांतही घुमणार 'लालपरी'चा हॉर्न! दुर्गम आदिवासी पाड्यांसाठी खास 'पुण्यश्लोक अहिल्यादेवी' बस सेवा सुरू
आता डोंगर-दऱ्यांतही घुमणार 'लालपरी'चा हॉर्न! दुर्गम आदिवासी पाड्यांसाठी खास 'पुण्यश्लोक अहिल्यादेवी' बस सेवा सुरू
महाराष्ट्र सरकारने दुर्गम आदिवासी पाड्यांसाठी 'पुण्यश्लोक अहिल्यादेवी' नावाची खास बस सेवा सुरू केली आहे. "पाडा तिथे एसटी" या मोहिमेअंतर्गत, १०० अत्याधुनिक मिडी बसेस सह्याद्री आणि मेळघाटच्या दऱ्याखोऱ्यांत धावतील.
दुर्गम आदिवासी पाड्यांसाठी खास 'पुण्यश्लोक अहिल्यादेवी' बस सेवा सुरू
मुंबई : महाराष्ट्राची जीवनवाहिनी असलेली एसटी आता केवळ गावांपर्यंतच मर्यादित न राहता थेट आदिवासी पाड्यांच्या उंबरठ्यापर्यंत पोहोचणार आहे. स्वातंत्र्याच्या ७७ वर्षांनंतरही विकासाच्या मुख्य प्रवाहापासून दूर राहिलेल्या सह्याद्री आणि मेळघाटच्या दऱ्याखोऱ्यांतील पाड्यांसाठी राज्य सरकारने एक ऐतिहासिक निर्णय घेतला आहे. "गाव तिथे एसटी" या संकल्पनेचा विस्तार करत आता "पाडा तिथे एसटी" ही मोहीम हाती घेण्यात आली आहे.
खास 'मिडी' बसेसचा ताफा सज्ज
अरुंद रस्ते, तीव्र चढ-उतार आणि वळणावळणाचे घाट यामुळे दुर्गम भागात मोठ्या बसेस नेणे अशक्य होते. यावर उपाय म्हणून परिवहन मंत्री प्रताप सरनाईक यांनी ९ मीटर लांबीच्या, ३५ आसनी १०० अत्याधुनिक मिडी बसेस खरेदी करण्याचा निर्णय घेतला आहे. या बसेसना ‘पुण्यश्लोक अहिल्यादेवी’ असे नाव देण्यात आले असून, त्या खास करून दुर्गम भागातील भौगोलिक स्थितीचा विचार करून तयार करण्यात आल्या आहेत.
आदिवासी बांधवांची पायपीट थांबणार
राज्यातील ९३% लोकसंख्या एसटीशी जोडलेली असली, तरी मेळघाट आणि सह्याद्रीतील अनेक पाडे अद्याप वंचित होते. या निर्णयामुळे होणारे बदल
शिक्षण: ग्रामीण भागातील विद्यार्थ्यांना शिक्षणासाठी आता मैलोन्मैल चालत जाण्याची गरज उरणार नाही.
आरोग्य: आपत्कालीन परिस्थितीत माता-भगिनींना आणि रुग्णांना वेळेत दवाखान्यात पोहोचणे सोपे होईल.
रोजगार: दुर्गम भागातील तरुण रोजगाराच्या संधी शोधण्यासाठी शहरांशी सहज जोडले जातील.
विकासाचा नवा अध्याय
परिवहन मंत्री प्रताप सरनाईक यांनी या उपक्रमाचे वर्णन 'परिवर्तनाची गती' असे केले आहे. "दुर्गम भागातील आदिवासी समाज आता एसटीच्या माध्यमातून संपूर्ण महाराष्ट्राशी जोडला जाईल. विकासाची गंगा प्रत्येक पाड्यापर्यंत पोहोचवण्याचा आमचा निर्धार आहे," असा विश्वास त्यांनी व्यक्त केला. लवकरच डोंगर-दऱ्यांच्या शांततेत 'पुण्यश्लोक अहिल्यादेवी' बसचा हॉर्न घुमणार असून ती विकासाची नवी पहाट घेऊन येईल.
