ठाण्यातील शिवसेना ठाकरे गटाचे नेते प्रदीप पूर्णेकर यांच्या हत्येवरून संजय राऊत यांनी गंभीर आरोप केले आहेत. ड्रग माफिया आणि बिल्डर लॉबीच्या विरोधात आवाज उठवल्यानेच पूर्णेकरांचा आवाज कायमचा दाबण्यात आला, असा दावा राऊत यांनी केला आहे.
मुंबई : शिवसेना (उद्धव बाळासाहेब ठाकरे) पक्षाचे खासदार संजय राऊत यांनी एक मोठा आरोप केला आहे. ठाण्यातील स्थानिक ड्रग माफिया, गुंड आणि बिल्डर लॉबीला भिडल्यामुळेच पक्षाचे नेते प्रदीप पूर्णेकर यांचा 'आवाज कायमचा दाबण्यात आला', असं राऊत म्हणाले. या हत्येत सामील असलेल्यांवर कडक कारवाई व्हावी, अशी मागणीही त्यांनी केली आहे.
पत्रकारांशी बोलताना राऊत म्हणाले की, पूर्णेकर हे शिवसेनेचे एक निष्ठावान कार्यकर्ते होते. ते ड्रग्सचं जाळं आणि बिल्डर लॉबीविरोधात सातत्याने आवाज उठवत होते. "त्यांच्यावर सात गोळ्या झाडण्यात आल्या... त्यांची हत्या झाली आणि त्यांना खूप निर्घृणपणे मारहाण करण्यात आली. ते आमचे अत्यंत निष्ठावान सहकारी होते. ते स्थानिक ड्रग माफियांच्या विरोधात लढत होते. शिंदे गटाच्या गुंडांविरुद्ध आणि बिल्डर लॉबीविरुद्ध ते ठामपणे उभे राहिले. आमच्या मते, म्हणूनच त्यांचा आवाज दाबण्यात आला," असं राऊत यांनी स्पष्ट केलं.
राऊत यांनी पुढे असाही आरोप केला की, पूर्णेकर यांचा मुलगा राम याने ही संपूर्ण घटना स्वतः पाहिली आणि ऐकली आहे, पण तरीही एफआयआरमध्ये (FIR) त्याचं नाव नाही. तसेच, माजी महापौर मीनाक्षी शिंदे आणि त्यांचे पती राजेंद्र शिंदे हेच या हत्येचे 'मुख्य सूत्रधार' असल्याचा दावा राऊत यांनी केला असून, त्यांचीही नावे एफआयआरमध्ये नसल्याचं त्यांनी निदर्शनास आणून दिलं. "त्यांचा मुलगा राम याने हे सगळं स्वतः पाहिलं आणि ऐकलं आहे, पण एफआयआरमध्ये त्याच्या नावाचा साधा उल्लेखही नाही. इथल्या माजी महापौर मीनाक्षी शिंदे आणि त्यांचे पती राजेंद्र शिंदे हेच मुख्य सूत्रधार आहेत असं आमचं मत आहे, पण त्यांचीही नावे यात टाकण्यात आलेली नाहीत," असं राऊत म्हणाले. ठाकरे गटाच्या कार्यकर्त्यांनी पोलिसांची भेट घेऊन ही नावे एफआयआरमध्ये समाविष्ट करण्याचा आग्रह धरला आहे. यावर पोलिसांनी कारवाईचं आश्वासन दिलं असल्याचंही राऊत यांनी सांगितलं.
Related Articles
मंगळवारी रात्री ठाण्यातील मानपाडा-गणेश नगर भागात दुचाकीवरून आलेल्या अज्ञात हल्लेखोरांनी पूर्णेकर यांची गोळ्या झाडून हत्या केली. पोलिसांच्या माहितीनुसार, ही घटना रात्री साडेनऊच्या सुमारास त्यांच्या कार्यालयाबाहेर घडली. हल्लेखोरांनी त्यांच्यावर गोळीबार केला आणि तिथून पळ काढला. पूर्णेकर यांच्या छातीत दोन गोळ्या लागल्या आणि नंतर उपचारादरम्यान त्यांचा मृत्यू झाला. हल्लेखोरांची ओळख पटवण्यासाठी आणि या हत्येमागचं नेमकं कारण शोधण्यासाठी पोलिसांनी तपास सुरू केला आहे.
पूर्णेकर यांच्या कुटुंबानेही न्यायाची मागणी केली आहे. जोपर्यंत आरोपींना अटक होत नाही, तोपर्यंत अंत्यसंस्कार करणार नाही, अशी भूमिका त्यांचे भाऊ जयनाथ यांनी घेतली.तत्पूर्वी, पूर्णेकर यांचे सासरे संजय खांगडे यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना न्याय देण्याचं आणि वाढत्या गुन्हेगारीला आळा घालण्यासाठी पावलं उचलण्याचं आवाहन केलं.
